Левит 24 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

24-тӥ ЛЮКЕТ

¹ Кузё-Инмар Моисейлы тазьы вераз, тазьы шуиз:

² «Израиль пиосты тыныд вӧйпу мульыысь пызьыртыса поттэм чылкыт вӧй вайыны кос – югыт карон понна, лампадаос кысылытэк ӝуаны мед быгатозы;

³ сӥзён-косонэн ковчеглэн катанчи сьӧраз, вӧсяськон скиния пушкын, Аарон [но солэн пиосыз] та лампадаосты Кузё-Инмар азе пуктылыны кулэ, ӝытысен ӵукнаозь ялан мед ӝуалозы шуыса: та тӥляд выжыостылы пумтэм вапумъёс ӵожелы сётэм пуктон-косон.

⁴ Чылкыт югдытон арбери вылэ соос котьку но Кузё-Инмар азе лампадаосты пуктылыны кулэ.

⁵ Чабей пызь басьты но солэсь дас кык бискыли нянь пыж; котькуд бискылиез пыжоно ефалэн кык дасмос пызь люкетэзлэсь;

⁶ соосты кык чурен пуктылы, котькуд чуре куать бискыли, Кузё-Инмар азе чылкыт ӝӧк вылэ пуктылы;

⁷ [котькуд] чур вылэ чылкыт ливан-ладан [но сылал] пон, та нянь бордын мед улоз Кузё-Инмарлы курбон сётонэз буре ваён понна;

⁸ котькуд суббота нуналэ израиль пиослэн нимынызы бискылиосты Кузё-Инмар азе тыроно: та пумтэм вапумъёслы сётӥськем сӥзён-косон.

⁹ Соос Ааронлы но солэн пиосызлы сётэмын луозы, соос та курбон нянез святой интыын сиёзы, уго та Кузё-Инмарлы ваем курбонъёс пӧлысь соослы сётоно быдӟым святыня: та пумтэм вапумъёслы сётэм пуктон-косон».

¹⁰ Одӥг израиль ныллэн египет воргоронэн шедьтэм пиез израиль пиос азе потӥз но израиль ныллэн пиез станысен израиль пиосмуртэн ченгешонэ вуиз;

¹¹ израиль ныллэн пиез [Кузё-Инмарлэсь] нимзэ лек кылъёсын сантэмаса вераз. Соку сое Моисей доры вайизы – та пилэн анаезлэн нимыз Саломиф, Даврийлэн нылыз, со Дан выжыысь вал, –

¹² та пиез возьмаськисьёс киулэ сётӥзы Кузё-Инмарлэн эрикез со пумысен ялэмын луытозьлы.

¹³ Кузё-Инмар Моисейлы тазьы шуыса вераз:

¹⁴ «Лек кылын вераськисез станлэн сьӧраз потты но, верамез кылӥсьёс ваньзы солэн йыр вылаз кизэс мед понозы, вань калык сое изэн зӥръяса мед жугоз.

¹⁵ Израиль пиослы шу: ”Кин аслэсьтыз Инмарзэ лек кылын куаретӥз ке, со ас вылаз сьӧлыксэ нуоз;

¹⁶ Кузё-Инмарлэсь нимзэ ултӥясь мурт виемын луыны кулэ, вань калык сое изэн зӥръяса мед виёз: сьӧрлось лыктэм мурт-а со, та музъемын весяк улӥсь-а со, – [Кузё-Инмарлэсь] нимзэ сантэманы кутскиз ке, виемын луоз.

¹⁷ Кин ке но мукет муртэ вииз ке, со мурт виемын луоз.

¹⁸ Кин ке но пудоез вииз ке, со понна дун тырыны кулэ, пудо понна пудо.

¹⁹ Кин ке но матысь муртсэ яраё кариз ке, со муртлы озьы ик кароно, мар со мукет муртлы лэсьтӥз:

²⁰ тӥям понна тӥян, син понна син, пинь понна пинь; кызьы со мукет адямилэсь мугорзэ яраё кариз, озьы ик солы но лэсьтоно.

²¹ Кин ке но пудоез вииз ке, со понна дун тырыны кулэ; нош кин ке но адямиез вииз ке, сое ассэ но виёно.

²² Тӥляд одӥг кадь судды луыны кулэ: сьӧрлось лыктэм муртлы но, та музъемын весяк улӥсь муртлы но, уго Мон тӥляд Инмарды Кузё-Инмар”».

²³ Соку Моисей Израиль пиослы вераз; лек кылын куаретӥсь муртэ станлэн сьӧраз поттӥзы но изэн зӥръяса виизы, израиль пиос лэсьтӥзы озьы, кызьы Кузё-Инмар Моисейлы косӥз.