Левит 20 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

20-тӥ ЛЮКЕТ

¹ Кузё-Инмар Моисейлы тазьы вераз, тазьы шуиз:

² «Израиль пиослы тазьы шу: ”Израиль пиос пӧлысь яке израиль калык пӧлын улӥсь сьӧрлось лыктэм калык пӧлысь кин ке но аслэсьтыз нылпизэ Молохлы курбонлы сётӥз ке, со виемын мед луоз: та музъемлэн калыкез сое изъёсын зӥръяса мед виёз;

³ со адями шоры Мон Аслэсьтым ымнырме берыкто но сое ас калыкез пӧлысь быдто Молохлы ас нылпизэ курбонлы сётэм, Мынэсьтым вӧсяськон интыме саптамез понна, Мынэсьтым дун-шектэм нимме сантэмамез понна;

⁴ та музъемлэн калыкез аслэсьтыз синъёссэ ӧз ке берыкты нылпизэ Молохлы сётӥсь адями шоры, ӧз ке виы сое,

⁵ соку Мон ымнырме берыкто со адями шоры, солэн выжыез шоры но со адямиез ас калыкез пӧлысь быдто, солэн пытьы кузяз вань азыса ветлӥсьёсты, Молохлэн пытьы кузяз азыса ветлыны кутскемъёсты, ас калыксы пӧлысь быдто.

⁶ Кудӥз ке но адями кулэмъёслэсь лулъёссэс ӧтьыса вайылӥз ке, туноослы вазиськиз ке азыса-калгыса соослэн пытьы кузязы ветлон вылысь, соку Мон ымнырме та адями шоры берыкто но ас калыкез пӧлысь сое быдто.

⁷ Дунматске-чылкытатске, дун-чылкытэсь луэ, уго Мон Кузё-Инмар, тӥляд Инмарды, Мон [дун-чылкыт].

⁸ Мынэсьтым пуктон-косонъёсме уте, быдэсъялэ, уго Мон тӥледыз дун-чылкыт карись Кузё-Инмар.

⁹ Кин ке атайзэ яке анайзэ лек кылъёсын вӧсь кариз ке, сое виыны кулэ; атайзэ но анайзэ лек кылын вӧсь карисьлэн вирыз ас вылаз вуэ.

¹⁰ Бызем кышномуртэн кин ке но азыса-калгыса улӥз ке, матысь муртэзлэн кышноеныз кин ке но азыса-калгыса улӥз ке, – азыса-калгыса улӥсь пиосмурт но, кышномурт но – виемын луыны кулэ.

¹¹ Кин ке атаезлэн кышноеныз артэ выдӥз ке, со пиосмурт атаезлэсь гольыксэ усьтӥз – кыксы но соос виемын мед луозы, вирзы ас вылазы.

¹² Кин ке кенэныз артэ выдӥз ке, соос кыксы ик виемын мед луозы – юрӟым уж соос лэсьтӥзы, вирзы ас вылазы.

¹³ Кин ке пиосмуртэз кышно карыса артэ выдӥз ке, соос кыксы но юрӟым уж лэсьтӥзы, соос виемын мед луозы, вирзы ас вылазы.

¹⁴ Кин ке нылэз но солэсь анайзэ кышно басьтӥз ке – со законлы пумит улон; со пиосмуртэз но, со кышномуртъёсты но тыл вылын сутоно, законлы пумит улон тӥ пӧлын медаз луы шуыса.

¹⁵ Кин ке пудо вылын азон сьӧлык лэсьтӥз ке, со муртэ виёно, со пудоез но виёно.

¹⁶ Кыӵе ке кышномурт мыныса пудоен азон сьӧлык лэсьтӥз ке, со кышномуртэз ви, со пудоез но: кыксы но виемын мед луозы, соослэн вирзы асьсэ вылын.

¹⁷ Кин ке но сузэрзэ, атаезлэсь нылзэ яке анаезлэсь нылзэ, кутоз но солэсь гольыксэ адӟиз ке, нылмурт но со пиосмуртлэсь гольык интызэ адӟиз ке: та возьыттэм уж, соос кыкназы ик ас калыксылэн пиоссы азьын быдтэмын луыны кулэ, со ас сузэрезлэсь гольык интызэ усьтӥз: аслэсьтыз сьӧлыксэ со ас вылаз нуоз.

¹⁸ Вирын саптаськон висёнэз дыръя кин ке кышноез вӧзы выдӥз ке, солэсь гольык интызэ усьтӥз ке, со кышноезлэсь вир виянзэ кыре поттӥз, кышноез но аслэсьтыз вир виян интызэ усьтӥз – кыксы но ас калыксы пушкысь быдтэмын луыны кулэ.

¹⁹ Анаедлэн сузэрезлэсь гольыксэ, атаедлэн сузэрезлэсь гольыксэ эн усья, уго таӵе мурт аслэсьтыз гольыксэ усьтэм луэ, сьӧлыксэс соос ас вылазы нуозы.

²⁰ Кин кенакеныз артэ выдӥз ке, со агаезлэсь гольыксэ усьтэм луэ; сьӧлыксэс соос ас вылазы нуозы, нылпитэк кулозы.

²¹ Кин вынызлэсь яке агаезлэсь кышнозэ басьтӥз ке, со юрӟым уж лэсьтэ; со аслаз братэзлэсь гольык интызэ усьтӥз, соослэн нылпизы уз луы.

²² Мынэсьтым вань пуктон-косонъёсме уте, вань законъёсме уте, быдэсъялэ соосты, соку музъем Мынам тӥледыз отчы улыны нуэм берам тӥледыз ас вылысьтыз уз сэрпалты.

²³ Тӥляд азьысьтыды улляно калыклэн сямъёсызъя эн улэ, уго соос вань та ужъёсты лэсьтыса улӥзы, Мынам соослы туж воже потӥз,

²⁴ Мон тӥледлы шуи: ”Соослэсь музъемзэс киултэ, йӧлын чечыен бызись музъемез тӥледлы люкетлы сётӥсько”. Мон Кузё-Инмар, тӥляд Инмарды, вань калыкъёслэсь тӥледыз висъясь.

²⁵ Чылкыт пудоез кырсь пудолэсь, чылкыт тылобурдоез кырсь тылобурдолэсь висъяны быгатэ, асьтэлэсь лулъёстэс эн сапталэ пудоен, тылобурдоен, музъем вылтӥ вань нюж кыстӥськыса ветлӥсьёсын, кудъёссэ Мон кырсесь шуыса висъялляй.

²⁶ Мон азьын дун-чылкытэсь луэ, уго Мон Кузё-Инмар [тӥляд Инмарды] дун-чылкыт, Мон тӥледыз мукет калыкъёслэсь висъяй, тӥ Мынам калыке мед луоды шуыса.

²⁷ Пиосмуртъёс-а, кышномуртъёс-а кулэм муртъёслэсь лулъёссэс ӧтьыса вайылӥзы ке, яке тунаськыса улӥзы ке, виемын мед луозы: изъёсын зӥръяса сыӵеосты виылоно, соослэн вирзы ас вылазы”».