Левит 19 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

19-тӥ ЛЮКЕТ

¹ Кузё-Инмар Моисейлы тазьы вераз, тазьы шуиз:

² «Вань израиль калыклы тазьы ялыса шу: ”Дун-чылкытэсь луэлэ, уго Мон Кузё-Инмар, тӥляд Инмарды, дун-чылкыт.

³ Ваньды ас анайдылэсь, ас атайдылэсь кышкалэ, Мынэсьтым субботаосме утьыса улэ. Мон Кузё-Инмар, тӥляд Инмарды.

⁴ Сульдэръёслы-идолъёслы эн йыбыртъялэ, ӵыжатыса-дурыса асьтэлы инмаръёс эн лэсьтэ. Мон Кузё-Инмар, тӥляд Инмарды.

⁵ Кузё-Инмарлы тупаса улонлы сӥзем курбон сётӥськоды ке, со курбонэз Инмар дорысь асьтэлы ӟеч эрик басьтон понна сётэ:

⁶ курбон сётон нуналады, ӵуказеяз но сое сие, нош куинетӥ нуналлы кылем курбон сӥльдэс тылын сутэ;

⁷ куинетӥ нуналаз но сое сииды на ке, со юрӟым уж, со Инмарлы ярамон уз луы;

⁸ кин со сӥлез сииз, со мурт ас вылаз сьӧлыкез нуоз, уго Кузё-Инмарлэсь святынязэ саптаз, со адями ас калыкез пӧлысь быдтэмын луоз.

⁹ Ас музъем вылысьтыды юдэс аракуды, анадылэн пумозяз ик юдэс эн аралэ, арам бервылад усьылэм шепъёсты эн бича,

¹⁰ виноград пурыостэ но одӥгтэм эн бича, виям виноград мульыостэ но эн бича – соосты куанер муртлы, сьӧрлось лыктэм муртлы кельты. Мон Кузё-Инмар, тӥляд Инмарды.

¹¹ Эн лушкаське, эн ӧрекчаське, огдэс огды эн пӧялэ.

¹² Ӧрекчаськыса Мынам нимыным кыл эн сётэ, аслад Инмаредлэсь нимзэ эн сантэма. Мон Кузё-Инмар, [тӥляд Инмарды].

¹³ Матысьтэ эн ултӥя, солэсь ваньбурзэ эн тала. Медъям муртэдлы дун тырондэ вуоно ӵукнаозьлы эн кельты.

¹⁴ Пельтэм муртэ лек кылын эн куареты, синтэм мурт мед канжаськоз шуыса, солэн азяз номыр но эн поны – Инмаредлэсь [Кузё-Инмарлэсь] кышкаса ул. Мон Кузё-Инмар, [тӥляд Инмарды].

¹⁵ Судын ужъёсты сэрттыкуды-пертчыкуды, шонертэм эн лэсьтэ; куанер адями азьын эн чеберъяськы, сӥё-дано муртлы кельшыны эн тыршы; матысьтэ судить кариськод ке, шонер судить кар.

¹⁶ Ас калыкед пӧлтӥ кыл нуллыса эн ветлы, матыседлэсь улонзэ быдтыны эн малпа. Мон Кузё-Инмар, [тӥляд Инмарды].

¹⁷ Сюлмыныд агай-выныныд тушмонъяськыса эн улы; матысь муртэдлэсь шексэ солэн азяз ик вера, соку со понна сьӧлык уд басьты.

¹⁸ Ас калыкед пӧлысь нокин вылэ но йыркуръяськыса эн улы, уродлы пумит уродэн пунэмзэ эн берыкты; астэ кызьы яратӥськод, матысьтэ но озьы ик яраты. Мон Кузё-Инмар, [тӥляд Инмарды].

¹⁹ Мынэсьтым пуктон-косонъёсме быдэсъяса улэ; аслэсьтыд пудодэ мукет выжыысь пудоен эн ворттылыты; бусыдэ кык пумо будос кидысэн эн кизьы; кык пумо шортъёслэсь – ыжгонэн етӥнлэсь – куэм дӥсянэз эн дӥся.

²⁰ Кышнолы курам ляльчи нылмуртэн пиосмурт изиз ке, нош со нылмурт понна йырдон тыремын ӧвӧл на яке солы эрик сётэмын ӧвӧл на ке, соосты вӧсь карыны кулэ, но виыны кулэ ӧвӧл, малы ке шуоно со ляльчи ныл эрике лэземын ӧй вал на;

²¹ со пиосмурт янгыш ужез понна Кузё-Инмарлы вӧсяськон скинияе пырон доры курбон сётыны така мед ваёз;

²² янгыш уж понна курбонлы ваем така вирын священник сое Кузё-Инмар азьын лэсьтэм сьӧлыкезлэсь чылкытатоз-сузялоз, лэсьтэм сьӧлыкез куштӥськоз.

²³ [Инмарлэн Кузё-Инмарлэн тӥледлы сётоно] музъемаз вуиды ке, отчы емыш сётӥсь кыӵе ке но писпу мерттӥды ке, солэсь емышъёссэ кырсесь, сиыны ярантэмесь шуыса лыдъялэ: куинь ар ӵоже солэсь емышъёссэ кырсесь шуыса лыдъялэ, соосты сиыны уг яра;

²⁴ нош ньылетӥ араз солэн вань емышъёсыз Кузё-Инмарлэн праздникъёсызлы сӥземын луыны кулэ;

²⁵ нош витетӥ араз солэсь емышъёссэ сиыны быгатӥськоды ини, солэсь будэтэм вань емышъёссэ асьтэлы бичаны быгатӥськоды. Мон Кузё-Инмар, тӥляд Инмарды.

²⁶ Виро сиёнэз эн сие; эн тунаське, эн пелляське.

²⁷ Котыр ласянь йырдэс эн ӵышке, тушедлэсь дуръёссэ эн сӧры.

²⁸ Кинды ке кулӥз ке, мугордэс эн вандылэ, мугор вылады номыр но эн гожъялэ. Мон Кузё-Инмар, [тӥляд Инмарды].

²⁹ Юмшаны-калгыны лэзьыса, нылдэ эн сапта, музъем азыса-калгыса медаз улы, юрӟым-кырсь ужъёсын музъем медаз пачылмы.

³⁰ Мынэсьтым субботаосме уте, вӧсяськон интыме но сӥлы карыса возе. Мон Кузё-Инмар.

³¹ Кулэмъёслэн лулъёссылы ӧтьыса вазиськисьёслы тӥ эн вазиське, туноос доры эн ветлэ, соосын асьтэдыз эн сапталэ. Мон Кузё-Инмар, тӥляд Инмарды.

³² Пурысьтам мурт пыриз ке, султы, пересь муртэ сӥлы кар, Инмаредлэсь [Кузё-Инмарлэсь] кышка. Мон Кузё-Инмар, [тӥляд Инмарды].

³³ Сьӧрлось лыктэм мурт тӥляд музъемады улыны интыяськиз ке, сое ӝикатыса-ёртыса эн возе;

³⁴ сьӧрлось лыктыса тӥ доры улыны интыяськем мурт тӥ понна та музъемын пырак улӥсь муртэн одӥг радын мед сылоз; сое астэ кадь ик яраты, уго тӥ но вазен Египет музъемын сьӧрлось лыктэм калык вал. Мон Кузё-Инмар, тӥляд Инмарды.

³⁵ Судын шонертэм ужез эн лэсьтэ, – кузьдалаез-ӝуждалаез, секталаез, быдӟалаез мертакуды, эн ӧрекчаське.

³⁶ Весъёсты шонер мед мерталозы, гираосты ярамонэсь-шонересь мед луозы, ефа шонер, гин оскиськымон мед луозы. Мон тӥляд Инмарды Кузё-Инмар, Египет музъемысь тӥледыз поттӥсь.

³⁷ Мынэсьтым вань пуктон-косонъёсме быдэсъялэ, вань законъёсме но быдэсъялэ. Мон Кузё-Инмар, [тӥляд Инмарды]”».