Левит 12 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

12-тӥ ЛЮКЕТ

¹ Кузё-Инмар Моисейлы тазьы шуиз:

² «Израиль пиослы вера: ”Кышномурт, секытэн луыса, пи нуны вайиз ке, со сизьым нунал ӵоже кырсь шуыса лыдъяськоз; саптаськыса висён дыръяз кадь ик со кырсь луоз;

³ тямысэтӥ нуналаз пичи пилы вандӥськон сямез ортчытозы;

⁴ куамын куинь нунал ӵоже кышномурт, виръёсызлэсь чылкытатӥськыса, ас дораз пукыны кулэ; чылкытатӥськон нуналъёсыз быдэсмытозь, со нокыӵе но вӧсяськон тӥрлыкъёс-арбериос борды йӧтылӥськыны кулэ ӧвӧл, вӧсяськон инты доры матаз ветлыны кулэ ӧвӧл.

⁵ Со ныл нуны вайиз ке, чылкытатӥськон дырыз ортчыку, кык арня ӵоже со кырсь шуыса лыдъяськоз, куатьтон куать нунал ӵоже со, вирызлэсь сузяськыса, гуртаз пукыны кулэ.

⁶ Пиез понна яке нылыз понна чылкытатӥськон нуналъёсыз йылпумъяськизы ке, со одӥг аресъем ыжпиез тылын сутӥськись курбон сётыны мед ваёз, озьы ик пинал гурт дыдыкез яке кыр дыдыкез сьӧлык понна курбон сётыны вӧсяськон скинияе пырон ӧс доры священниклы со вайыны кулэ;

⁷ тае священник Кузё-Инмар азьын курбон сётоз, озьы кышномуртэз сузялоз, соку со вир кошконэзлэсь сузяськоз, чылкыт луоз. Таӵе луэ пи яке ныл ваем кышномурт пумысен закон.

⁸ Нош солэн ыжпи вайыны моӵез ӧвӧл ке, соку со кык кыр дыдык яке кык пинал гурт дыдыкъёсты мед ваёз: одӥгзэ тылын сутӥськись курбон сётыны, нош мукетсэ сьӧлык понна курбон сётыны, священник сое чылкытатоз но, со чылкыт луоз”».