Левит 10 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

10-тӥ ЛЮКЕТ

¹ Ааронлэн Надавен Авиуд пиосыз кыксы ик асьсэлэсь кадилозэс басьтӥзы, отчы тыл понӥзы, ческыт зын поттӥсь арбериос понӥзы но Кузё-Инмар азе ярантэм, Кузё-Инмарлэсь соосты вайыны косымтэзэ тылэз вайизы;

² соку Кузё-Инмар дорысь тыл потыса соосты сутӥз, Кузё-Инмарлэн син азяз соос кулӥзы.

³ Соку Моисей Ааронлы шуиз: «Тани Кузё-Инмар мар сярысь вераз, тазьы шуыкуз: ”Мынам матам лыктӥсьёс бордын Аслэсьтым дун-сьӧлыктэм луэмме возьмато, вань калык азьын данэ пото”». Аарон чус улӥз.

⁴ Ааронлэн атаезлэн Узиил вынызлэсь Мисаилэн Елцафан пиоссэ Моисей ӧтьытӥз но соослы шуиз: «Мынэ, вӧсяськон интыысь станлэн сьӧраз ӵыжы-выжыостылэсь шӧйёссэс поттэ».

⁵ Лыктӥзы но, дэременызы шобыртыса, соосты станлэн сьӧраз поттӥзы, Моисейлэн косэмезъя лэсьтӥзы.

⁶ Нош Ааронлы но солэн Елеазар, Ифамар пиосызлы Моисей шуиз: «Медад кулэ, вань калык вылэ вожпотон медад вае шуыса, йырдэс гольык эн кельтэ, дӥськуттэс эн кесялэ; нош тӥляд агай-вынъёсты, быдэс израиль калык, Кузё-Инмарлэн тылын сутэмъёсыз понна бӧрдыны быгатӥськоды;

⁷ медад кулэ шуыса, вӧсяськон скиниялэн ӧстӥз эн потэ, уго тӥляд вылады Кузё-Инмарлэн зырӟем вӧйыз». Моисейлэн верам кылызъя лэсьтӥзы.

⁸ Кузё-Инмар Ааронлы тазьы вераз, тазьы шуиз:

⁹ «Тон но, тынад пиосыд но медад кулэ шуыса, вӧсяськон скинияе пырыкуды [яке курбон сётон ӝӧк доры лыктыкуды], вина но, кудӟытӥсь юонъёсты огзэ но эн юэ; та тӥляд выжыостылы пумтэм вапумъёс ӵожелы сётэм пуктон-косон,

¹⁰ дун-чылкытэз дун-чылкыт луисьтэмлэсь, кырсез чылкытлэсь висъяны мед быгатоды,

¹¹ израиль пиосты Кузё-Инмарлэн Моисей пыр соослы верам вань пуктон-косонъёсызлы дышетыны мед быгатоды».

¹² Соку Моисей Ааронлы, Елеазарлы, Ифамарлы – Ааронлэн улэп кылем пиосызлы – шуиз: «Кузё-Инмарлы курбонлы ваем салам нянь пӧлысь кылем люкетсэ басьтэ но та юмалын пыжемез курбон сётон ӝӧк дорын сие, уго та быдӟым святыня;

¹³ сое святой интыын сие, уго Кузё-Инмарлы сётэм курбонъёс пӧлысь та тынад люкетэд, тынад пиосыдлэн но люкетсы: тазьы [Кузё-Инмар дорысь] мыным лэсьтыны косон сётэмын.

¹⁴ Курбон сӥльлэсь сэзъяса вылэ ӝутэм люкетсэ – мӧлязэ, пельпумзэ – чылкыт интыын сие, тон ачид но, пиосыд но, нылъёсыд но ваньды огазьын сие, уго та израиль пиослэн тупаса улонлы сӥзьыса сётэм курбонзы пӧлысь тыныд но, пиосыдлы но люкетлы сётэмын.

¹⁵ Кӧй курбонъёсын ӵош соос пудолэсь мӧлязэ, пельпумзэ, Кузё-Инмар азьын сэзъяса, вылэ ӝутыны кулэ, пумтэм вапумъёслы та тыныд но, пиосыдлы но, [нылъёсыдлы но] тонэн огазьын люкетлы мед луоз, кызьы Кузё-Инмар [Моисей пыр] косон сётӥз».

¹⁶ Сьӧлык понна курбон сётыны ваем кечтакаез Моисей утчаз, но тани, со сутэмын ни. Соку [Моисей] Ааронлэн Елеазарен Ифамар улэп кылем пиосыз вылэ вожзэ поттӥз, со шуиз:

¹⁷ «Малы тӥ сьӧлык понна курбон сётэм пудо сӥлез святой интыын ӧд сие? Уго со быдӟым святыня, тӥледлы со сётэмын калык вылысь сьӧлыкъёсты быдтон понна, Кузё-Инмар азьын соосты чылкытатон понна;

¹⁸ тани, солэн вирыз вӧсяськон скиния пушкы пыртэмын ӧвӧл, нош тӥ сое святой интыын сиыны кулэ вал, кызьы мыным косэмын вал».

¹⁹ Аарон Моисейлы шуиз: «Тани, туннэ соос Кузё-Инмар азьын сьӧлык понна курбонзэс вайизы, тылын сутӥськись курбонзэс вайизы, озьы ке но та учыр монэн луиз; туннэ мон сьӧлык понна курбон сётэм пудолэсь сӥльзэ сии ке, со Кузё-Инмарлэн син азяз ярамон луоз-а?»

²⁰ Тае Моисей кылӥз, кабыл басьтӥз.