Есфирь 2 - Библия удмурт кылын: Вуж Сӥзёнлэн канонэн юнматымтэ люкетъёсыз пыртэмын

2-тӥ ЛЮКЕТ

¹ Вань та ортчем учыръёс бере, Артаксеркс эксэйлэн йыркурез буйгам бере, со Астинез тодаз вайиз, мар со лэсьтӥз, со пумысен кыӵе пуктон-косон кутэмын вал.

² Эксэй бордын ужаса-тыршыса улӥсь егит пиос солы шуизы: «Эксэйлы егит, чебер нылъёсты мед утчалозы вал,

³ аслаз кунысьтыз вань улосвылъёсы эксэй эскерись-чакласьёсты мед ыстысал, соос вань егит, чебер тусбуё нылъёсты Сузы шоркаре эксэйлэсь кышнооссэ возьмась Гегай нимо евнухлэн чаклам улсаз нылкышно корка мед люкасалзы, буяськон-зыраськон вӧйёс [мукетсэ но, мар кулэ] мед сётысалзы.

⁴ Чебереныз эксэйлэсь синзэ мальдытӥсь нылмурт Астинь интые эксэй кышно мед луоз». Та кыл эксэйлы сюлмызъя луиз, со озьы ик лэсьтӥз.

⁵ Сузы шоркарын улӥз Мардохей нимо одӥг иудей воргорон, со вал Вениамин выжыысь Кислэн Семей пиезлэн Иаир пиезлэн пиез.

⁶ Со Иудеялэн Иехония эксэеныз огдыре Иерусалимысь пленэ кутэмъёсын ӵош нуэмын вал, соосты мукет азе улыны нуиз Вавилонлэн Навуходоносор эксэез.

⁷ Со быдэ вуттӥз атаезлэн вынызлэсь Гадасса нылзэ – солэн мукет нимыз Есфирь, уго солэн атаез но, анаез но ӧй вал. Та нылмуртлэн ымнырыз чебер, мугорыз веськрес вал. Солэн атаез, анаез кулэм бере Мардохей сое ас дораз ныллы басьтӥз.

⁸ Эксэйлэсь косонзэ ялэм бере, солэн пуктон-косонэз потэм бере Сузы шоркаре трос нылъёсты Гегай мед учкоз-чаклалоз шуыса люказы, соку Есфирез но, кышномуртъёсты возьмась Гегай сое но эскерыса-чакласа мед возёз шуыса, эксэй юртэ басьтӥзы.

⁹ Гегай нылмуртлы синмаськиз, Есфирьлы со ӟеч мылкыдзэ возьматӥз, чик ӝегатскытэк солы буяськон-зыраськон вӧйёс вайиз, ваньзэ, мае солы сётыны чакламын вал, сётӥз, эксэй юртысь сизьым быръем егит нылъёсты солы юрттӥськыса улыны пуктӥз; сое, солэсь медо нылъёссэ но нылкышно коркалэн самой усто люкетаз интыяз.

¹⁰ Ас калыкез сярысь но, аслаз ӵыжы-выжыосыз сярысь но Есфирь номыр ӧз вера, уго со номыр но медаз вера шуыса, Мардохей солы косон сётӥз.

¹¹ Нуналлы быдэ Мардохей Есфирьлэсь тазалыксэ но мар соин луэмез тодон понна нылкышно коркалэн азбараз вуылӥз.

¹² Котькуд нылмуртлы Артаксеркс эксэй доры пырыны дыр вуэм бере, дас кык толэзь куспын нылмуртъёсын кулэ ужез быдэстэм бере, – уго сомында нуналъёс ӵоже кыстӥськизы соосты чебер карон буян-зыран ужъёс: куать толэзь ӵоже мирра вӧйын, куать толэзь ӵоже ческыт зыно арбериосын, кышномуртъёслэн мукет буяськон-наштаськон арбериосынызы зыраллязы.

¹³ Соку та нылмурт эксэй доры пырылӥз. Нылкышно коркась потыса, эксэй корка пырон понна мар гинэ со ӧз куры, солы ваньзэ сётылӥзы.

¹⁴ Ӝытазе со эксэй доры пыриз, нош ӵукна со мукетаз кышномурт корка берытскиз, сое чакласа улӥз Шаазгаз, дусымлы ваем нылъёсты возьмась эксэй юртысь евнух, со эксэй доры ӧз ни пырылы, – сое эксэй кулэ карыку гинэ ке шат, соку сое нимыныз ӧтьылӥз.

¹⁵ Мардохейлэн атаезлэн Аминадав вынызлэсь вордыны басьтэм Есфирь нимо нылызлы эксэй доры мыныны дыр вуиз. Соку Есфирь бордаз басьтыны номыр но ӧз куры, кышноосты возьмась Гегай эксэй евнух мар вераз, сое гинэ сьӧраз басьтӥз. Есфирез ваньмыз сое адӟисьёс гажаны кутскизы.

¹⁶ Есфирез Артаксеркс эксэй доры, эксэй юртэ басьтӥзы, со вал дасэтӥ толэзе – Тебеф толэзе, Артаксеркс эксэйын сизьыметӥ арзэ пукыкуз.

¹⁷ Вань кышноосыз пӧлысь эксэй Есфирез юнгес яратӥз, вань нылъёс пӧлысь со доры мылкыдыз куриськиз; Есфирьлэн йыр вылаз эксэй изьы понӥз, Астинь интые сое эксэй кышно кариз.

¹⁸ Вань кивалтӥсьёссэ, бордаз ужась-тыршисьёссэ люкаса, эксэй бадӟым юондыр – Есфирьлы сӥзем юондыр – ортчытӥз, со виын улосвылъёслэсь выт тыронъёссэс пичиятӥз, эксэйёслэн шырыт сямзыя кузьымъёс сётъяз.

¹⁹ Егит нылъёсты кыкетӥ ползэ люкаку, Мардохей эксэй капка дорын пуке вал,

²⁰ Мардохейлэн косэмезъя, Есфирь ялан ӧз вера на кыӵе выжыысь, кыӵе калык пӧлысь луэмзэ; нош Мардохейлэсь верам кылзэ Есфирь али но, со дорын улон-будон вакытаз кадь ик, быдэсъяз.

²¹ Со виын, Мардохей эксэй капка дорын пукон дыръя, ӧс выжыез возьмась эксэй юртысь Гавафаен Фарра нимо кык евнухъёс йырзы курен [Мардохеез ваньмызлэсь золгес санэ понэм понна] Артаксеркс эксэез виыны малпазы.

²² Та сярысь тодэм бераз Мардохей эксэйлэн кышноезлы, Есфирьлы, ивортӥз, нош Есфирь Мардохейлэн нимыныз эксэйлы вераз.

²³ Та ужез эскеризы но, вераськон шонер вылэм шуыса тодэм беразы, кыксэс ик писпуэ ошизы. Мардохейлэсь ӟеч ужзэ эксэй дорын нуналлы быдэ ортчись ужъёсты гожъян книгае гожтӥзы.