Oseas 3 - Bible in Tzotzil de Chenalhó with Deuterocanon

Sc'oplal Oseas xchi'uc jmulavil ants

¹ Jech laj yalbun noxtoc li Muc'ul Diose: “Batan, bat xa ic'o, bat c'ano yan velta li avajnile, ac'o me c'anbil yu'un yan vinic, ac'o me jmulavil ants. Yu'un jech jc'anoj ec li israeletique, ac'o me ja' chich'ic ta muc' li yantic diosetique, ac'o me tsve'ic li pan pasbil ta taqui sat ts'usub ti chac'beic smotonin li diosetic yu'unique”, xiyutun.

² Jech la jman ta vo'lajunsep (15) saquil taq'uin, xchi'uc oxib ciento xchi'uc lajuneb xcha'vinic (330) anmul cebada.

³ Jech laj calbe: “Vo'ot cu'unot o ep jabil. Mu xa me xamulivaj, mu xa me xavac' aba ta yan vinic, jech jun co'nton o ta atojol ec li vu'une”, xcut.

⁴ Yu'un li israeletique ta to sta yorail ti ep c'ac'al mu'yuc ajvalil, mu'yuc jpasmantal yu'unique. Xchi'uc mu'yuc chaq'uic milbil matanal, mu'yuc tsva'anic tonetic sventa chich'ic ta muc'; mu'yuc c'u'il sventa pale, xchi'uc mu'yuc loc'ometic yu'unic ta snaic.

⁵ Ts'acal to ja'o chlic sutes yo'ntonic, chlic sa'ic li Muc'ul Dios yu'unique, chlic sa'ic li smomnich'on Davide, ti ja' ajvalil yu'unique. Ta slajebtic batel c'ac'ale ta xlic yich'ic ta muc' li Muc'ul Diose, jech ta xich'ic scotol li c'usitic ac'bilic yu'une.