Kalátɛ 1 - Hɛtɔnyɛ́ Hiɔ́sɔ

Mohóloniə

¹ Ɔwámɛ á Báwolo, tátá muɔŋgəlimə ɔ tɔ́mbákɛna na mɔsá ata na mɔndɔ, mba ɔ tɔ́mbákɛna na Yə́susu Kilísitusu na Huɛlɛ́ á Isə́ ɔwá a ná wɛɛ́ya huŋúə́síə́ ətíə́ yɛ bəwə́nú,

² na bənísə́ bəkimə ɔbá bá lɛ́á na mɛaŋɔ́á, ɔ bilúkunə bɛ́ bəlumininə bá Kalátɛ:

³ Huɛlɛ́ ɔ yəsúə́ Isə́ na Yə́susu Kilísitusu ɔ yəsúə́ Isə́lúkú bá bənú nyɔnɔ índíə́ na bumbə́nú.

⁴ Kilísitusu ɔwá a ná bɛ́hánɛ́na ɛlɔ́áyɛ́ mə́súə́ mabɛ́á, ɔkɛaka ɔwá, a bəsú háŋɔ́ná ɔ yɛ́ɛyɛ misí yɛ bɔbɛ́á, ɔwɔŋgɔkɔnɔ uhikiə wɔ́ Huɛlɛ́ ɔ yəsúə́ Isə́.

⁵ Tuúmə tɔ́ báá na wɛɛ́ya ɔ tɔɛya na tɔɛya Amɛna!

Ɔ́maná Imbə́nú Yɛɛsɛ ɛmɔtɛ́ yɛ́ lɛ́á

⁶ Mɛ lɛa ə́lə́mə́nə́tɔ́ ɔwá nɔ ná hútú wɛ́ɛ́yɛ́ əlimə túmə ɔwá a ná bənú ɛ́lɛ́ákɛ́na ɔ tɔ́mbákɛna na nyɔnɔ yɛ Kilísitusu ɔkɛaka ɔwá, nɔ siəkínə á Imbə́nú Yɛɛsɛ ɔ yinə́yinə́.

⁷ Ɔ taká, Imbə́nú Yɛɛsɛ yinə́yinə́ yɛ́ lɛ bámɛ́nɛ́na; mba bɛndɔ bá báka ɔbánɔ́ ɔbá bá ndɔ undumbú háá ɔ uwənú ətíə́, ɔbá bá ndɔ siə ɔ Imbə́nú yɛ Kilísitusu ɔtɛŋɛna.

⁸ Ábá wɔmɔtɛ́ mɔndɔ, ata bəsú, mbá ata áŋgɛlɛ yɛ nɔɔ́mɛná a ná bənú nɔ́ŋɔ́nákɛ́na, indimisi na wɛɛ́ya.

⁹ Tɔ ka nɔ́yɛ́ laa buɔnɔ́, mɛ ndɔ nɔ́yɛ́ híánɔlɔna ɔ ɔlaa isíŋáka; ábá wɔmɔtɛ́ mɔndɔ a ná bənú Imbə́nú Yɛɛsɛ nɔŋɔ́nákɛ́ná nifəŋə na yɛ́ɛ́yɛ́ ɔyɛ́á nɔ ná kúsə́nə, indimisi na wɛɛ́ya!

¹⁰ Nɔ́yɛ́, tátá tuúmə tɔ́ bɛndɔ mɛ ndɔ siə isíŋáka, mba tɔ́ Huɛlɛ́. Mɛ lɛ ndɔ siə ɔwá bɛndɔ bá mɛaŋɔ́á nyámáka, ábá bɛndɔ bá ndɔ mɛaŋɔ́á nyama tɔ́na, mɛ sa bámɛ́nɛ́ná mɔnyɛna wa Kilísitusu.

Huɛlɛ́ a ka Báwolo tɛ́fa Mɔsɔ́másɔma

¹¹ Ɔ taká, á bənísə́, mɛ ndɔ bənú nɔ́yɛ́ lɛna, yɛ́ɛ́yɛ́ Imbə́nú Yɛɛsɛ ɔyɛ́á mɛ ná bənú nɔ́ŋɔ́nákɛ́na, yɛ́ lɛ ndɔ húlínə na mɔndɔ.

¹² Tátá ɔ tɔ́mbákɛna na mɔndɔ mɛ́ ná yɛɛ́ta kusə́nə, ataná, mɔndɔ a ná mɛaŋɔ́á úkúnə́kíə́, mba, á Yə́susu a ná mɛaŋɔ́á mə́nyə́síə́.

¹³ Nɔ ka ɔ́kɔ́kɛna muɛsɛ ɛ́sɛ́á mɛ ná bá mɛ ndɔ bítíkə hata yɛ ikúíli ɔyɛ́á mɛ ná bámɛ́nɛ́ná ɔ ɛbasɛa yɛ́ Bɛyútɛnɛ, na yatɛ́ hilóbi hikimə mɛ ná ilúkunə yɛ́ Huɛlɛ́ tə́kə́sə́kə, mɛ siəkə ɔ yɛɛ́ta ɔ nímə́siə.

¹⁴ Ikúíli mɛ ná bá mɛ ndɔ kɛnda ɔ ɛbasɛa yɛ́ Bɛyútɛnɛ, mɛ ka nioko niəŋí nɛ́ bɛndɔ bá híə́míə́ hɛya báá yáyɛ́nátɔ, mɛ ɛnɛ́ma yɛ́ bɛ́ámɛ́á bisə́ tə́tə́kəniə na yamɛ́á iŋgínə́ yikimə.

¹⁵ Mba Huɛlɛ́ a ka mɛaŋɔ́á tɛ́fa ɔ ubotolokiə ɔ tɔna tɔ́ yamɛ́á inyə́, a ná mɛaŋɔ́á ɛ́lɛ́ákɛ́na ɔ tɔ́mbákɛna na yayɛ́á nyɔnɔ.

¹⁶ A ka siəkinə muɛsɛ ɔwá, a mɛaŋɔ́á wayɛ́á Mɔná mə́nyə́síə́, mɛ sa ákána ɔ malɛ́hána má mɔndɔ usiə ɔkɛaka ɔwá, mɛ kɛ́áka bááyɛ́ ɔbá bá lɛ bá Bɛyútɛnɛ bá wɛɛ́ya manya,

¹⁷ mɛ sa bála tɔ́na ɔ Yəlúsalɛma ɔ nɛnyáná na bááyɛ́ ɔbá bá ná taŋá ɔbáá basɔ́másɔma. Mba mɛ ka ákána ɔ bɔnɔŋɔ bɔ́ Alabíə́, əlimə yɛ́ nɔ́yɛ́, mɛ ná ndáhíáná ɔ Tamásɛ.

¹⁸ Əlimə yɛ tuɔŋɔ tɔ́lálɔ́, mɛ ná híánáka ɔ Yəlúsalɛma ɔkɛaka ɔwá mbá mɛ Bíə́lə manya, mɛ ná tuənə́kínə na wɛɛ́ya buniə bɔ́ tunó.

¹⁹ Mɛ sa mɔsɔ́másɔma muinə́muinə́ sinə, úhúlíə́ á Yákɔbɔ á ikukə yɛ́ Isə́lúkú.

²⁰ Yatɛ́ ɔyɛ́á mɛ ndɔ bənú tilinə, tátá bɛkanja, yɛ́ lɛa taká ɔ busíə́ bɔ́ Huɛlɛ́.

²¹ Əlimə yɛ nɔ́yɛ́, mɛ ná ákáná ɔ misí yɛ Sília na yɛ Silisíə́.

²² Mba, bilúkunə ɔ Kilísitusu bɛ́ misí yɛ Yútɛa bá sa bá bá ndɔ mɛaŋɔ́á manya.

²³ Bá ka bá bá ndɔ ɔ́kɔ ɔbánɔ́ bá sɛ́á: «Wɛ́ɛ́yɛ́ ɔwá a ná bá a ndɔ bəsú təkəsə ɔ yɛ́táyɛ́ ikúíli, a ndɔ Imbə́nú Yɛɛsɛ nɔŋɔna isíŋáka ɔyɛ́á a ná síə́kə unímə́siə.»

²⁴ Bɛ́táyɛ́ bilúkunə bá Huɛlɛ́ nyamaka ɛlɔ́áyɛ́ ámɛ.