Bimənyí 1 - Hɛtɔnyɛ́ Hiɔ́sɔ

¹ Híihi hiəfulə hɛ́ báka na bimənyə́síníə́ ɔbɛ́á Yə́susu kilísitusu a ná kusə́nə. Huɛlɛ́ a ka wɛɛ́ya bɛɛ́ta índíə́ ɔkɛaka ɔwá, a báyɛ́á bɔnyɛna ínə́kíníə́ yatɛ́ ɔyɛ́á yɛ́ ná hɔ́ánána ɔndafámá ikúílí tɛ́tɛ́á. Ɔ́ ɛlɔ́áyɛ́ nɔ́yɛ́ Kilísitusu a ná yayɛ́á Áŋgɛlɛ lɔ́má ɔ wayɛ́á mɔnyɛna á Yɔhánɛsɛ ɔkɛaka ɔwá a wɛɛ́ya bɛɛ́ta mənyə́síə́.

² Wɔ́ɔwɔ a lɛ mumbóŋímboŋi; ɔwá bɛkɔa bikimə ɔbɛ́á a ná síə́kínə bɛ́ lɛa Ɛtambá yɛ́ Huɛlɛ́, taká ɔyɛ́á Yə́susu Kilísitusu a ná mənyə́síə́.

³ Nɛhɔnɔ na wɛ́ɛ́yɛ́ ɔwá a ndɔ fana, na bááyɛ́ ɔbá bá ndɔ bɛtambá bɛ́ Huɛlɛ́ ɔ́kɔ ɔ tɔ́mbákɛna na mɔhɛ́nátɔtányɛ́, bá tə́tə́kə́níə́ tɔ́na yatɛ́ ɔyɛ́á yɛ́ lɛ́á tilə́kə́tɔ́ umə́, bɔkɔasɛ́á ikúílí yɛ́ bɛ́táyɛ́ bɛkɔa yɛ́ lɛa hoóyi.

⁴ Ɔwámɛ á Yɔhánɛsɛ, mɛ ndɔ híihi hiəfulə tilinə ɔ bilúkunə Bɛ́lɛ́ndɔ́lɔ́mɔnɔ bɛ́ bəlumininə ɔ Kilísitusu ɔ misí yɛ Ásia mɛ sɛ́á, Huɛlɛ́ ɔwá a lɛ́á, ɔwá a ná bámɛ́nɛ́na, ɔwá a lɛ́á ɔ ɔsákɔna, á bənú inyonisiə na bumbə́nú índíə́! Imbúínyi ɛ́lɛ́ndɔ́lɔ́mɔnɔ ɔyɛ́á yɛ́ lɛ́á ɔ busíə́ bɔ́ híə́yíə́ hikómo hɛ́ bunəni bá bənú bɛɛ́ta índíə́ tɔ́na,

⁵ Yə́susu Kilísitusu á mumbóŋímboŋi wa yɔkɛ́nana, á bənú inyonisiə na bumbə́nú índíə́, ɔwayɛ́ ɔwá a lɛ́á mɔndɔ wəbusíə́ ɔ ɔhɔŋɔa ətíə́ yɛ bəwə́nú, a lɛa munəni wa bənəni bəkimə bá misí. A ndɔ bəsú hikiə ɛŋana nisúki, na máyɛ́á manɔ́ŋɔ́, a ka bəsú sɔ́tɔ́na ɔ uwəsú mabɛ́á.

⁶ A ka kɛaka tɔ ná híáná bɛláŋa bɛ́ nɛmanɛna, bətitiəmahánɛna ɛlɔ́áyɛ́ Huɛlɛ́ ɔ yayɛ́á Isə́ ɔnyɛna, tuúmə na nɛmanɛna tɔ́ bámɛ́nɛ́ná tɔ́áyɛ ɔ tɔɛya na tɔɛya! Nɔ́yɛ́ bɔ́ lɛ́á!

⁷ Nɔ́ siəkínə, a lɛa ɔ ɔsákɔna ətíə́ yɛ bɛlɔndɔ́, bɛndɔ bəkimə ata bááyɛ́ ɔbá bá ná wɛɛ́ya hɛfanda ósó, bá ŋɔ wɛɛ́ya siəkinə, məkúlə məkimə má misí má ŋɔ lɛlaka mɔŋɛ́ŋa ɛlɔ́áyɛ́ ayɛ́. Ɛ́ɛ! Nɔ́yɛ́ bɔ́ lɛ́á.

⁸ Isə́lúkú a Huɛlɛ́ a sɛ́á: «Mɛaŋɔ́á mɛ lɛ́á Álɛ́fa, mɛ lɛa tɔ́na Ɔmɛ́ka, (ɔ́ niɔŋɔ́, Wəbusíə́ na wənitifə́), mɛ lɛa wɛ́ɛ́yɛ́ ɔwá a lɛ́á, ɔwá a ná bámɛ́nɛ́na, wɛ́ɛ́yɛ́ ɔwá a lɛ́á ɔ ɔsákɔna, mɛ lɛa wa injiŋə yikimə.»

Yə́susu a nɔ́ Yɔhánɛsɛ bínə́niə ɔ Batamóso

⁹ Ɔwámɛ á Yɔhánɛsɛ, ɔwá mɛ lɛ́á wənúə́ munísə́ na yə́núə́ ikindəniə, ɔwá mɛ ndɔ nioko ɛta na bənú ɔ ɛmɔ́kɛ́, ɔ ilúkunə yɛ́ nɛmanɛna na nitiŋiminə ɔ nɛtɔana na Yə́susu Kilísitusu, mɛ ka báá ɔ ɛsɔ ɔ iloóló yɛ́ Batamóso ɛlɔ́áyɛ́ Ɛtambá yɛ́ Huɛlɛ́ na imbóŋi yɛ Yə́susu.

¹⁰ Ɔ hinó hɛ́ Isə́lúkú, Umbúínyi Mɔnaŋanaŋa wɔ́ ná ndá mɛaŋɔ́á ɛ́ta, mɛ ná nióni nɛŋɛ́ŋa ɔ́kɔ́ ɔ ɔwámɛ əlimə nɛ́ ndɔ sálála ɛ́sɛ́á mɔsɛ́bɛ́.

¹¹ Nɛ́ fə́mə́ləkəniə nɛ́ sɛ́á: «Tilə́kə́ ɔ hiəfulə yatɛ́ ɔyɛ́á ɔ ndɔ sinə, əlimə yɛ nɔ́yɛ́, ɔ́ yɛɛ́ta lɔ́mɛ́ná ɔ bɛɛ́bɛ bilúkunə bɛ́lɛ́ndɔ́lɔ́mɔnɔ bɛ́ bəlumininə ɔ Yə́susu: Ɔ Ɛfɛ́sɛ, ɔ Simíli, ɔ Bɛlɛkámɛ. Ɔ Tiatíli, ɔ Salatɛ́sɛ, ɔ Filətəfíə́ na ɔ Laɔtisə́.»

¹² Ɛnaka mɛ bɛ́kɔ́ŋɔ́ná ɔkɛaka ɔwá mɛ mɔndɔ siəlínə ɔwá a ndɔ mɛaŋɔ́á hɛ́na nɔ́yɛ́, mɛ ná bitiəkətiəkə yámá bɛ́lɛ́ndɔ́lɔ́mɔnɔ maákátɔ́ na kóolo.

¹³ Ətíə́ yɛ bɛ́ɛ́yɛ́ bitiəkətiəkə, ɛbɔ́tɛ́ná ɛ́mɔtɛ́ yɛ́ ka báá tɛ́nɛ́mátɔ́ hɔ́ákátɔ́ ɔ mɔndɔ; a ka bá na nilókiə lɛŋábákátɔ́, nɛ́ sukunuəkiə ɔ makɔlɔ́ na hɛlɔ́ŋa hɛ́ kóolo sɛ́lɛ́ndɛ́nátɔ́ ɔ ɛsasa.

¹⁴ Wə́yíə́ mɔlɔ́á na tɔ́áyɛ́á tuhúínyi tɔ́ ka báá laŋɔlaŋɔ ɛ́sɛ́á mɔmbɔtɔ ata ɛ́sɛ́á ɔndánáná; máyɛ́á məə́sə má nɔmaka ɛ́sɛ́á ɔŋgalaŋgata wɔ́ hiwə.

¹⁵ Máyɛ́á makɔlɔ́ má nɔmaka nyɔákátɔ́ bolókotokoto ɛ́sɛ́á ilə́ŋú yɛ́ háátɔ́ ɔ hiwə, nɛ́áyɛ́á nióni nɛ́ hiŋəkə ɛ́sɛ́á mənífə́ má milomoti.

¹⁶ A ka bá na tusənji tɔ́lɛ́ndɔ́lɔ́mɔnɔ itíə́tɔ́ ɔ ɔwayɛ́ mɔkátá wɔ́ bɛnɔ́mɛ, mɔkɔ́átá lɛ́ákátɔ́ bɛsalɛ bikimə wɔ́ fámáka ɔ ɔwayɛ́ munuə, bɔ́áyɛ́á busíə́ bɔ́ nɔmaka ɛ́sɛ́á hiɔtɔ́tɔ́ hɛ́ kɔɔsɔ.

¹⁷ Ɛnaka mɛ wɛɛ́ya yámá, mɛ ná kɔ́á ɔ ɔwayɛ́ makɔlɔ́ ɛ́sɛ́á umimə, a ná mɛaŋɔ́á wə́yíə́ mɔkátá wɔ́ bɛnɔ́mɛ tálɛ́ná na ɔlaa a sɛ́á: «Ɔ lɛ kɔ́lɔ́má bɔ́ányɛ! Mɛ lɛa wəbusíə́ na wənitifə́.

¹⁸ Mɛ lɛa muɔmɔ́ mɛ ka báá wə́ə́tɔ́, mba isíŋáka, mɛ lɛa muɔmɔ́ ɛlɔ́áyɛ́ tɔɛya na tɔɛya. Mɛ lɛa na injiŋə yɛ nyɛmbɛ́ na bɔnɔŋɔ bɔ́ bəwə́nú itíə́tɔ.

¹⁹ Nɔ́yɛ́, tilə́kə́ yatɛ́ ɔyɛ́á ɔ ná siəkínə, yatɛ́ ɔyɛ́á yɛ́ lɛ́á, yatɛ́ ɔyɛ́á yɛ́ ŋɔ ndafámá tɔ́na.

²⁰ Ɛlɔ́áyɛ́ binífúnínə́ bɛ́ ɛndɔnɔ yɛ bítə́tɔ́ yɛ tusənji tɔ́lɛ́ndɔ́lɔ́mɔnɔ ɔtɔ́á ɔ ná siəkínə ɔ ɔwámɛ mɔkátá wɔ́ bɛnɔ́mɛ, na bitiəkətiəkə bɛ́lɛ́ndɔ́lɔ́mɔnɔ maákátɔ́ na kóolo: Tusənji tɔ́lɛ́ndɔ́lɔ́mɔnɔ, ɔ́ bɛáŋgɛlɛ bɛ́ bilúkunə bɛ́lɛ́ndɔ́lɔ́mɔnɔ bɛ́ bəlumininə, bitiəkətiəkə bɛ́lɛ́ndɔ́lɔ́mɔnɔ, ɔ́ bilúkunə bɛ́lɛ́ndɔ́lɔ́mɔnɔ bɛ́ bəlumininə.»