1 Yɔhánɛsɛ 1 - Hɛtɔnyɛ́ Hiɔ́sɔ

Yə́susu a lɛa Ɛtambá ɔyɛ́á yɛ́ ndɔ buɔmɔ́ índiə

¹ Tɔ ndɔ bənú híihi hiəfulə tilinə ɔkɛaka ɔwá, tɔ́ bənú ɛtambá lɛ́na ɔyɛ́á yɛ́ ndɔ buɔmɔ́ índiə. Ɛtambá ɔyɛ́á yɛ́ ná bámɛnɛna ubusíə́ ɔbɔ́á Huɛlɛ́ a misí bɔta, tɔ ka yɛɛ́ta ɔ́kɔ́kɛna, tɔ ka yɛɛ́ta siəkinə na mə́súə́ məə́sə, tɔ ka yɛɛ́ta lə́mbəkiə, tɔ ná yɛɛ́ta itíə́kə́ tɔ́na na mə́súə́ makátá.

² Wɛ́ɛ́yɛ́ ɔwá a ndɔ buɔmɔ́ índiənə a ka bífə́mə́ləniə, tɔ ka wɛɛ́ya siəkínə, tɔ ndɔ bənú lɛna yatɛ́ ɔyɛ́á tɔ ndɔ manya ɔ ɔwayɛ́ ɛsalɛ, wɛɛ́ya a ndɔ kɛa ɔwá tɔ́ buɔmɔ́ bɔ́ ikúílíə́kimə kusə́nə, a ka bámɛnɛna ɔ ɛmɛ́ŋɛ́ yɛ Isə́, a ka bəsú bínə́niə.

³ Tɔ ndɔ bənú nɔŋɔnɛna tɔ́na yatɛ́ ɔyɛ́á tɔ ná síə́kínə́, tɔ ná ɔkɔ́kɛ́ná tɔ́na, nɔ́yɛ́ mbá nɔ ŋɔ báá ɔ nɛtɔana na bəsú, tɔ lɛa iŋgində́ ɔ nɛtɔana na Huɛlɛ́ á Isə́, na wayɛ́á Mɔná á Yə́susu Kilísitusu.

⁴ Tɔ ndɔ bənú tilinə náana ɔkɛaka ɔwá, níə́súə́ nɛhɔnɔ nɛ́ bámɛ́nɛ́ná úndúə́tɔ.

Huɛlɛ́ a lɛa isəmú

⁵ Ɔ́ imbə́nú yɛ́ɛyɛ ɔyɛ́á yɛ́ ndɔ húlínə na Yə́susu Kilísitusu, ɔyɛ́á tɔ ndɔ bənú nɔŋɔnɛna: Huɛlɛ́ a lɛa isəmú, ibínə́binə yɛ́ lɛ bámɛ́nɛ́na ɔ ɛbɔ́ka ɔyɛ́á a lɛ́á.

⁶ Ábá tɔ ndɔ bɛ́laa ɔwá, tɔ báka ɔ nɛtɔana na wɛɛ́ya mbá nɔ́yɛ́ tɔ ndɔ niŋə ɔ ibínə́binə, tɔ lɛa bakanjakanja, tɔ lɛ bá bɛndɔ bá tɛ́nɛ́mátɔ.

⁷ Mba, ábá tɔ ndɔ niŋə ɔ isəmú ɛ́sɛ́á Huɛlɛ́ bɛ́múɛ́tɛ́ a lɛ́á ɔ isəmú, nɔ́yɛ́, tɔ lɛa ɔ nɛtɔana bəsú na bəsú, manɔ́ŋɔ́ tɔ́na má wayɛ́á Mɔná á Yə́susu má ndɔ bəsú nəŋəsiə ɔ mabɛ́á məkimə.

⁸ Ábá tɔ ndɔ bɛ́laa ɔwá, tɔ lɛa ɛŋaná bɔbɛ́á, bəsú bɛ́múɛ́tɛ́ tɔ ndɔ bínímbə, taká tɔ́na yɛ́ lɛ bá ɔ uwəsú mɔlɛ́má nuúmə́.

⁹ Ábá tɔ ndɔ mə́súə́ mabɛ́á bɛ́mɛ́nɛna, ɛ́sɛ́á Huɛlɛ́ a lɛ́á na yɔkɛ́nana na wataká, a ŋɔ bəsú mə́súə́ mabɛ́á nɛasɛna, a ŋɔ bəsú nəŋəsiə tɔ́na ɔ məndínə́ məkimə má bɔbɛ́á.

¹⁰ Ábá tɔ ndɔ bɛ́laa ɔwá tɔ lɛ bá bakɛamabɛ́á, tɔ ndɔ Huɛlɛ́ híə́nəsiə mɔkanjakanja, yáyɛ́á Ɛtambá tɔ́na yɛ́ lɛ bá ɔ uwəsú mɔlɛ́má nuúmə́.