Ырлар 20 - Ыдыктыг Библия

¹ Хөгжүм башкарыкчызынга. Мизмор-ыр. Давидтии.

² Дээрги-Чаяакчы! Сээң күчү-күжүң дээш, хаан өөрүшкү-маңнайлыг тур, Сенден келген камгалал дээш канчаар-даа аажок өөрүп-хөглеп тур!

³ Сен ооң күзээн чүүлдерин күүседип бердиң, ооң аксындан үнген дилег-сөзүнден ойталавадың. Сэла

⁴ Сен ону ачы-буян долган алгыш-йөрээл-биле уткудуң, ооң бажынга алдын оваадайны кедирдиң.

⁵ Хаан Сенден амыдыралдың тыныжын диледи, Сен аңаа кезээ мөңгеде узун назынны хайырладың.

⁶ Сенден келген камгалал дээш, ол өндүр улуг алдарлыг апарды: Сен аңаа чайынналчак мактал-хүндүнү хайырладың.

⁷ Сен аңаа ачы-буяныңны кезээ мөңгеде бердиң, Сээң чаныңга турарга тыптыр өөрүшкүнү шаңнап, ону хөглеттиң.

⁸ Хаан Дээрги-Чаяакчыга идегээр, Дээди Өрүкүнүң энерелиниң ачызында тендиш дивес.

⁹ Сээң холуң шупту дайзыннарыңны тудуп алыр, күштүг холуң шупту өжээтеннериңни тудуп алыр.

¹⁰ Килеңнээн үеңде оларга оттуг суугу дег сен; Дээрги-Чаяакчы аажок килеңнээш, оларның бажын чиир, олар отка чиртип аарлар.

¹¹ Сен оларның үре-салгалын чырык чер кырынга, оларның салгакчыларын кижи төрелгетен аразынга амылыг арттырбас сен.

¹² Сеңээ удур кара сагыштап турган дайзыннар болгай, ынчалза-даа ол кара сагыжын боттандырар харыы чок-тур!

¹³ Сен чаларың согуннарын оларның арыннарынче шыгаагаш, оларны хая көрүндүрүп, дестирер сен.

¹⁴ Дээрги-Чаяакчы, Бодуңнуң күжүң-биле кымдан-даа бедидир көдүрүл, Сээң күчү-күжүңнү алгап ырлап, алдаржыдаал!