Ырлар 19 - Ыдыктыг Библия

¹ Хөгжүм башкарыкчызынга. Мизмор-ыр. Давидтии.

² Айыыл-халап хүнүнде Дээрги-Чаяакчы сени дыңнап кагзын – Израильдиң Бурганының ады сени кижи четпес бедикче көдүрзүн.

³ Ол сенче ыдыктыг черден дузадан чорутсун, Сион дагдан сени деткизин.

⁴ Сээң салганың бүгү өргүлдерни бодап келзин, бүрүн өрттеткен өргүлүңче сеткил ханыышкын-биле көрүп, хүлээп алзын. Сэла

⁵ Дээрги-Чаяакчы сээң күзээн чүвеңни хайырлазын, сээң бодап алган бүгү чүүлдериңни боттандырып берзин.

⁶ Сээң тиилелгең дээш өөрүп-байырлаар бис, Бурганывыстың ады дээш тугувус көдүрер бис. Дээрги-Чаяакчы шупту дилеглериңни күүсетсин.

⁷ Мен ам билир мен – Дээрги-Чаяакчы Бодунуң шилип алган хаанын камгалап турар, Ооң күштүг холу ыдыктыг дээрлеринден аңаа харыылап, тиилелгени хайырлап турар.

⁸ Чамдык улус дайынчы тергелери-биле, өске улус – аъттары-биле мактаныр, а бис Дээрги-Чаяакчының ады-биле – Бурганывыстың ады-биле мактанып турар бис!

⁹ Ол улус чайгыла бергеш, буурап каар, а бис бут кырынга чайгылыш чок турар бис.

¹⁰ Дээрги-Чаяакчы, хаанны камгала, дуза дилеп кый дээривиске, харыыла!