Ырлар 15 - Ыдыктыг Библия

Миктам-ыр. Давидтии.

¹ Мени кадагалап көр, Бурганым, хоргадалды Сенден алыр болгай мен.

² Дээрги-Чаяакчыга: «Сен – мээң Дээргим сен, меңээ Сенден өске ачы-буян чок» – деп чугааладым.

³ Ооң чер кырында ыдыктыг чонунче – ат-алдарлыг улузунче бүгү күзел-чүткүлүм угланды.

⁴ Өске бурганче далашкан улустуң түрегдели көвүдезин; мен оларның хан төккен өргүлдеринге киришпес мен, оларның бурганнарының аттарын безин адаар хөңнүм чок.

⁵ Дээрги-Чаяакчы – мээң үлүүм сен, салым-чолум Сенден хамааржыр.

⁶ Мээң хувааглыг черимниң кызыгаарын каас-чараш черлер таварты эрттирген сен, мээң Сенден алган өнчүм өндүр-чаагай-дыр.

⁷ Мени угаан киир сургаан Дээрги-Чаяакчыны алгап-йөрээр мен, дүне безин ишти-хөңнүм мени сургап турар.

⁸ Дээрги-Чаяакчыдан үргүлчү карак салбайн чордум, Ол мээң-биле-дир, ынчангаш тендиш дивес мен.

⁹ Ынчангаш мээң чүрээм өөрүп-байырлаан, мээң сеткилим өөрүп-хөглээн, мага-бодумга кандыг-даа айыыл кыжанмас-тыр.

¹⁰ Сен мээң амы-тынымны өлүглер оранынга калдырбас сен, Сеңээ бердинген чалчаңны тамыже киирбес сен.

¹¹ Сен меңээ амыдыралче орукту айтып бээр сен; Сээң-биле кады турарымга, өөрүшкү мени бүргээр, Сээң холуңда аас-кежик кезээ мөңгеде бар.