JERMI 12 - Le Bible en Tupurri

Ree caa je älaggen tu gaè ga le la?

¹ Manwuri, ndo raw keëed debañ, bay nen maga ndi yiñ kiida de äo wa, day ane ndi waçaç mbi ne ndo ti kiida äo maga ndo cag ra mono. Wer mayse ga jar debaycoçoçren sii wo ti ti faage äaaran la? Wer mayse ga jar cogob ma lag cogob mbaara tenen ti' go de yoçoç ti la?

² Ndo peë ra day saara laa ceçw go dra'a, mbaara de geçeçge day le' mbaara mbeere. Ndo see jag äaara mbañ, ane ndo go haçaç see jiili äaara.

³ Day ndo Manwur ndo de ko mege, nen äo de ko ndi day ndo go de da' wer ne ndi ga ndi na wer äo. Hoor ra go do saçaçre maga aè wo go de äaara ti ngeel ngaë naèy nono day gel ra go ma wur maga aè id jar go mono!

⁴ Sen joñ ge wo na haçaç hun so ga sirn la mbe nen lawge day fi ma äil pay mbe go tum de higgi mo la? Wer debaycoçoçre jar ma äil äen wo, nayre wo de dweere yee wo nen go werga aà hay waçaç wo gana: Manwur bay de ko fen maga naa wo ge le' ti de äe mo wa.

⁵ Hayga ndo ëee de jar äaale wo saara gay ndo go, joñge joñge ga ndo kaçaç ge ma ngafge de piiri wo la? Hayga ndo go de yoçoç ti na äil sir ma jam tawa no, ndo joñge joñge de maga bii ma äil Jurdeçeç dug gi le go mo la?

⁶ Gahaçyla heçeçre äon wo de see äaara tu wo de tiñ mani pan äon wo go de ree ti äo, aà wo de see äaara tu 'wad wo war ne ndo ti. Haç äil ne hara de maga aà a ge wo we de waçaçre ma de coçoçre ne ndo mo wa hase.

Baa tob tway äen go

⁷ Ndi tob tiñ mani äin go, ndi men tway mani äin go, ndi haç waçy maga maysee äi dan go ne jar hee äin wo do.

⁸ Tway mani äin hay kol go see äi do mingir ma yooway nono, aà ra ti äi ga se ba ndi go, diñ wersen so ndi kal caa hee go de äe.

⁹ Tway mani äin kol go see äi diñ weedwee ma bag naèy maga go de grud ci see yawla? Weere dweere ma bag naèy wo go de cir ti äe so yawla? See wee, wo wee tay nayre ma yoofi wo le äuy, aà mo a wo le ti reege ma kluu no!

¹⁰ Jar koëge wo debañ älag wo pay tlalum äin go, aà dag wo pay äin go. AÀ kol wo pay ma ti nen äin go diñ ngeel mapoëag poëage, go diñ tabuli.

¹¹ AÈ koln go diñ tabuli, aà go nen ree, aà kol go nen coocoo nen äi. Sirn go äuy nen coocoo werga jobo boñ bay ëig reen wa hase.

¹² Jar frum jarn a wo le go ti ngeel ma de mañge ciñ ma äil puulin wo äuy werga moslam mani Manwurn go de ree sirn go ti hagu äe leñleñ äuy, jobo boñ bay go jam wa.

¹³ AÀ hay jo' wo diñ coore ble day saara de weege diñ ëewseñ, aà hay gay wo see äaara de koë koëe. Soçoçre mo joñ nday ti feçeçre maga nday wee ra ni geñ gaa mono, kañn ne nday ti diñ bagge poçoç ma de haçaç mani Manwur no.

¹⁴ Manwur waçaç ti jar leege äe ma de älagge maga bag wo do ti tway maga se hay haçn ne Israyel jar mani äen wo gano: Ko wee ga ndi ndar ge ra yañ le go ti sir äaara no, ndi naa ge tiñ mani Judan yañ le go yoo äaara.

¹⁵ Ama blam maga ndi ndar ge ra we le go yoo äaara no, ndi ko ge decoo äaara yañ pa day ndi fer ge ra yañ le, wosela äuy äil tway äe, wosela äuy äil sir äe.

¹⁶ Day hayga aà had wo we ti faage mani jar äin wo, day ha' wo we de ëu äi ga: Manwur yañ tenen doga aà hay had wo jar mani äin wo ga aà mo ha' wo de Baal nono, ni saara lag ge yañ yoo jar mani äin wo.

¹⁷ Ama hayga aà day wo we laa mopo me' gaa no, ndi caa ge wer jar ma dosen no kayn wo go, ndi yee ge nen äaara go day ndi taw ge ra go. Kay diñ jag Manwuri.