ESAYI 58 - Le Bible en Tupurri

Heçeçge bii ma ti ngeel äe no

¹ Ngar jag go de eegre äo äuy, menn ti faage wa. Mañ geçeçge äo go ciñ do ro coçoç nono, ma sii debaycoçoçre mani jar äin wo ne hara, ma sii älagge jar ni Jakob wo ne hara.

² AÀ kië wo ndi tum nen naw, da wo tum ga saara mo hay ko faage äin wo. AÀ wië wo ndi ga ndi mo äod faage waçaçre ma ti ngeel äen wo ne saara. AÀ da wo ga saara mo ya' see saara see Baa do wer jar po maga wo de saçy joñ mo ma keëed nono, do wer jar po maga men wo mo ma ti ngeel äe maga Baa äaara hay kañ ne hara pel go gaa nono.

³ AÀ waçë wo gano: Da'ge wuur ba ti heçeçge biin ni na diñ mayse ga ndo bay ko wuur wa lay la? Da'ge wuur ba ti ferge ti see wuur gesiñ na diñ mayse ga se bay mañ mopo nen äo wa mo la? Diñ ga ti wur heçeçge bii äayn mono, nday haç see äay diñ ne fen maga ëiggi äay da sen mono, nday joñ bon jar joñ joñre ne ndayn wo debañ.

⁴ Nday heçeç bii na ma joñ dekwaçy de kaçaçra, ma leë kaçaçra, ma mbar jar do hun äay no. Nday bay heçeç biin do maga aè joñ ti wur äen nono day aè laa jag äay le ciñ lay na wa.

⁵ AÀ mbe mo na diñ heçeçge bii maga ndi da seno noga mbe mo na diñ wur maga je tabay fer ti see äe mbe gesiñ mo yawla? AÀ na diñ ga aè mo jel ti gesiñ tawa do gusuri noga aè mo suë ti taçy oçoçbe, go nen saçaçge mbe tawa tu yawla? AÀ mbe mo na diñ maga ndo ëe ga heçeçge bii noga wur ma de coçoçre jag Manwur mbe mo yawla?

⁶ Mokay diñ heçeçge bii maga sen coo jag äi mono: Pog see äo go jag hun no, naa jag jug go ne jar ma ti bon wo ti, men jar maga aè de kañ cee ne hara ti wo go ti see äaara day daga aè mo caa wer joñge gebe jar ma honla äuy go.

⁷ Äes hole äon de je maga koñne mono day yaçaç jar coo maga bay wo de duuli wa wo liñ. Hayga ndo ko jobo we go glog koë no, ni ndo hee oçoçbe ne hen see day tob je maga diñ kaw äo go wa.

⁸ Mo so no ni poëag äon naa ge nen yañ go do waa ma de jag toñ nono, ni waçaçge äon rug yañ go deparday. Keëedn see ge yañ pel äo, togoëge mani Manwurn joñ ge yañ le nen blam äo koë moge.

⁹ Mo so no ndo ëe ge ëu yañ day Manwur yiñ gi jag yañ ne ndo. Ndo ngar ge jag yañ day se waçaç yañ ga: Ndi la! Hayga ndo caa wer joñge gebe jarn we go ni äo, ndo caa wer mbarge jarn wo we go de waçaçre ma de koë koën wo,

¹⁰ hayga ndo haç mo maga ndo dan de see äo we go ne je ma koñne no, hayga ndo wuu je coon we go de reege no, poëag äon naa ge yañ le go nen suñgu no, suñgu ma ti äon kol ge yañ go do ngeel ma ti wur ëeger nono.

¹¹ Manwur kañ ge nen äo yañ ti faagen tumtum, aà wuu gi ndo yañ go tum ti ngeel ma bay reegen wo day haç ge eegre yañ ne ndo ti hoçoçgesee äo. Ndo joñ ge yañ do pay sugnee maga aè kag bii wer äe nono, do gutugri maga wo tum de bii äil nono.

¹² AÈ fer ge yañ boor tabul ma äaaäaan wo, aè fer ge boor tiñ wo ti ngeel maga jar ma ti wurpon hay äoë wo wer äaara ni na nen do äo. AÈ ëe ge ndo yañ ga je reb ywaalen wo, je ferge äod faagen wo, je ferge lag jar ti sir no.

Heçeçge wur Saba ma ti ngeel äen no

¹³ Hayga ndo ëaw see äo we wur Saba äi no, ndo joñ fen äo maga coo jag äo we ti wur äi ma bay ëagn gaa, hayga ndo ko wur Saban we do fen ma de wore, do wur ma bay ëag mani Manwur no, do wur ma de togoëge, day hayga ndo hoo sug we ti äe, ndo mañ we diñ blam faage äon gaa, ndo haç see äo we ne fen maga de coçoçre jag äo gaa lay, ne waçaçre ma de koë koën wo gaa lay no,

¹⁴ mo so no, Manwur joñ ge yañ diñ fen ma de coçoçre jag äo no day ndi hoo ge ndo yañ wo go ti ngeel ma de farge ciñ ma äil sirn wo. Ndi haç mo ma reege yañ ne ndo diñ fen maga pan äo Jakob hay menn mono werga jag Manwur hay waçaçn go.