ESAYI 56 - Le Bible en Tupurri

BAA RUU JAR ÄEN WO, KAY RA DE WAÇAÇRE PA Baa men jobo go faale gaa

¹ Manwur waçaç gano: Hoo wee sug ti mo ma de deele no, joñ wee mo ma keëed no. Gahaçyla peçeçge äin go mbañ ma age, keëed äin go mañ ma age lay.

² Wore ti je maga joñ dosen no mono, ti je tabay maga oo ti sen ngiñ, hoo sug ti wur Saba no day äo' fo äe go gaa, ëaw see äe see joñre ma de älaggen mono!

³ Daga waare maga de sa' see äe see Manwurn mo riñ ga: Manwur caa ge nen äi go sar de jar äen wo wa! Je ma de ndar äayn mo waçaç ga: Ndi diñ koo ma de heeg koë na wa!

⁴ Gahaçyla, Manwur waçaç gano: Jar ma de ndar äay maga hoo ge wo sug we ti wur Saba äin wo, mañ wo we diñ fen ma de coçoçre jag äi no day lag wo we ngiñ ti tayge jag äin no,

⁵ ndi boo ge ngeel ra ëu äaara yañ wo ne hara äil tiñ äin wo de kor äin wo. Ndi le' riñ äaara yañ go de dañ weeren wo de mayre binnin wo. Ndi kañ ge ëu ma tum maga taw go gaa yañ ne hara.

⁶ Waare maga sa' ge wo see äaara we see Manwur ma joñ peele ne hene, ma da ëu Manwuri, ma joñ ge diñ weere joçoçre äe jar maga hoo ge wo sug we ti wur Saba äi no day äo' wo fo äe go gaa, day lag ge wo we ngiñ ti tayge jag äin no,

⁷ ndi hoo ge ra yañ le go ti huuli äi ma bay ëag no, ndi haçge fruygi yañ ne hara äil tiñ tosge äi no. Ndi yaçaç ge do äaara yañ de siëgi jag äaara maga aè roë mo äen go äuyn wo de siëgi jag äaaran wo yañ werga aè ëe ge tiñ mani äin yañ ga tiñ tosge ma wer jar wo äuy.

⁸ Waçaçre ma jag Wañkluu, Manwur maga tay jar Israyel ma de welgen wo le gano: Ndi tay ge jar tigriñ wo yañ le see jar äi maga wo go de tayge mo pa.

Baa ruu jar ma peln wo

⁹ A wee le reege, nday äuy, nday nayre ma yoofin wo, nday äuy, nday nayre ma yoowayn wo no!

¹⁰ Jar gor ngeel go ne hen tin wo go reçwre, aà bay wo de ko mopo wa. AÀ wo äuy diñ wayre ma jag ba'ba' wo, kaçaç wo ma biggi ti mopo gaè. AÀ lwa' wo lwa'ge sag sag tu, wo mbaara de suuli tië tiëi, da wo leëge diñ naa.

¹¹ AÀ wo diñ wayre ma de koñne äil ga wuë wo gaa, wo diñ jar koëge maga bay wo de ko laa wer feçeçre wo wa. AÀ wo äuy see wo de ti ngeel see äaara, wosela äuy de kañ ti na diñ ti da'ge ma äe de see äe boñ tu.

¹² AÀ waçë wo gano: AÀ wee le ndi kië yii ne nday, naa taë go de feçeçre jooge ma de haçaçn wo! Naa joñ ge toñ dosen no pa werga aà gwa' wo ni debañ debañ ëa mono.