ESAYI 31 - Le Bible en Tupurri

Ree ti jar deñ see äaara see Ejipte no

¹ Ree ti jar maga raw wo wo Ejipte kië kayge, deñ wo see äaara ti piirin wo, day kañ wo ëiggi äaara ti ngaäa pus durgin wo de jar yaë piirin wo werga aà wo de eegre mono! Ree ti jar maga bay wo mbuë nen äaara ne je ma bayëag ma Israyeln ti wa, day kië wo Manwur gaa mono!

² Paga aà na diñ je ma de ëeñ maga faage kañge ree ne jar tin nen äe mo yaw no. AÀ bay go jwag jag äe ti waçaçre äen wo wa. AÀ ur de tiñ mani jar älaggen wo, de jar caa war jar joñ debaycoçoçren wo.

³ Je Ejipten diñ je tabay, aà bay diñ Baa wa. Piiri äen wo diñ nayre wo, aà bay wo diñ nenterse wa. De maga Manwur mañ ge do äe we ciñ no, je ma caa war Ejipten say ge go, je maga aè caa war äe le le' ge go gesiñ lay. Saara taw ge go jag ta' boñ äuy.

Je yaçaç Jerusalem go diñ Manwur boñ tu

⁴ Manwur hay riñ me do kay nono gana: Do maga mingiri noga weel mingir ra de pegge ne naèy maga se ban ti ti'i, men see äe go caa heçeçne do ngaäa jar koëge maga tay wo ti ngar jage noga mbarge äe gaa mono, Manwur Pantwayn cwaa ge le durgi ti huuli Siyoñ, weel huuli äen na dosen no lay.

⁵ Do maga weedwee dur ti weere äe wo no mono, Manwur Pantway ur gi yañ go ciñ ti Jerusalem dosen no lay. AÀ oo ge yañ ti äe, yaçaçn yañ go, oo ge yañ go ne hen nene day joñ ge yañ ga ree po mo caa ra wa so.

⁶ Fer wee le see je maga nday hay mañ äil wo go see äe has has mono, nday jar ni Israyel no!

⁷ Ti wur sen mo so no, wosela äuy lag ge baa äe maga se joñ ra de boo solay wo de boo biñni wo yañ wo go, baa se maga nday hay joñ ra de do äay wo mono.

⁸ Je Asirin le' ge yañ go jag moslam maga bay diñ moslam ma do je tabay wa mono. Moslam maga bay diñ ma do je tabay wa kaf ge nen äe yañ. AÀ yaçaç ge yañ de ëee do moslam no, weere ma joçoçre äen kol ge wo yañ go gebere.

⁹ Je maga hay do huuli äen nono dañ ge yañ de ëee do heçeçne, wañre äen caa ge wo heçeçne yañ go do drapo no. Kay diñ jag Manwur maga le de ngal wuu ti Siyoñ, day le de laa wuu ma hiä le Jerusalem mono.