ESAYI 24 - Le Bible en Tupurri

WAÇAÇRE TI WUR MA PELN WO NO Tamsir älag ge go

¹ Ko wee ga Manwur go de älag tamsiri, go de taw jar ma äil äen wo. AÀ älag ge sirn go, wel ge jar ma äil äen wo go.

² Ree maga da' ge je sii jagn diñ maga da' ge jar ma äuyn wo mo lay, mani je waçaç ree jarn do mani geben no lay, mani waçy tiñn do mani maygeben no lay, mani je maga yee mopo go do mani je maga yee yeege no lay, mani je taë mopo ne jarn do mani je maga taa taage no lay, mani je ma bay äere tin do je ma de äere tin no lay.

³ AÈ älag ge tamsir go älagge äuy tu, aè frumn gi go frumgi werga Manwur hay waçaç waçaçre sen go.

⁴ Tamsir go nen lawge, a go de sealge. Jag sir tawge äuy go nen gayri, go de sealge. Jar maga wo go de lagge ciñ ti jarn ciñ ti sir la taw ge wo lay.

⁵ Jar ma ti tamsir la glubn wo go werga aà cegaë wo jag liñgin wo go, äo' wo fo waçaçre ma de yergen wo go, älag wo tayge jag ma tumn go.

⁶ Diñ wersen so ga faëge go de taw tamsiri day jar ma äil äen wo de ree älagge sen ti mono. Diñ wersen so ga jar ma ti sirn la roë ge wo go day jar gwa' ge wo ne yemeg mbag koë no.

⁷ Yii ma defayn go nen coocoo, pay tlalum hig go lay. Jar maga äil äaara hay go de fruygi mo äuy wo de ndumgi.

⁸ Fruygi tembaln taw wo go, ngarge jag hraggen mañ wo jag go, fruygi dilnan caa wo wer go.

⁹ Jobo bay joo yii de siñ jag wa so hase, feçeçre joogen kol wo go wag jag jar joo rage no.

¹⁰ Äi leege ma de koë koën älag go, jag tiñn wo äuy wo go de teçgge, jobo bay wo kalge ni wa so.

¹¹ AÈ 'wad war ti faage wo wer maga yii bay wa. Fruygin äuy kol go diñ lawge, jag de fegn yee nen go äil sir no.

¹² Mo ma älag jar de gwa'ge äi leegen ni, jag tiñn wo go de hragge, gwa' go diñ tabuli.

¹³ Wo yoo wer jar wo mono, sir joñ ge do maga aè de jwa' koo Olifiye nono, do maga aè de fleg blam tlalum wo nono.

AÀ fruy wo de koë koëe

¹⁴ Ama jar ma lan wo mbaara de 'wad ware, 'wad wo war de fruygi, 'wad wo siñ le de fruygi le nen wur bo law ma mañ ti Manwur ciñ.

¹⁵ Togoë wee Manwur wo ti ngeel maga poëag wo ni mono. Togoë wee ëu Manwuri, Baa ma Israyeln wo ti kaali ma nen maarogn wo!

¹⁶ Go ti jag sir tawge naa laa siñ wo 'wadge gano: Hoo sug ti je ma keëed no! Ama ma äi ndi waçaç äin gano: Ndi go de yeege! Ndi go de yeege! Maaga ndi taw we go! Jar lag cogobn lag wo cogobe, cogobe! Jar lag cogobn lag wo cogobe.

¹⁷ Heçeçne, tu wo de bay wo go de cir ti äo, ndo je ma ti tamsir no!

¹⁸ Je maga dañ go do heçeçne maga caan go le' go äi tu. Je maga ëii le go ciñ jag tu mono, sen ba go ti bay. Gahaçyla jag ngeel ma ciñ buñ wo le go, dog tamsirn hrag wo go lay.

¹⁹ Tamsir mun äor go, tamsir crag go, aè gas tamsir go.

²⁰ Tamsir go de äa'ge doga je yii äa' nono. AÀ paa do mburyug nono. Debaycoçoçre äen de poçoçge äe. AÀ le' go day ur gi ciñ gaa so hase.

Kluu joñ ge go wurpo äuy do Baa boñ

²¹ Ti wur sen mono, Manwur joñ ge bon jar durgi ma ciñn wo yañ le ciñ, joñ ge bon wañre ma ti tamsir wo yañ ti tamsir la.

²² AÈ tay ge ra yañ go do jar ma ti paglam wo äuy äi tu, aè laa ge ra yañ ti dañgay äi tiñ dañgay. Naw joñ ge we go blam sen pur no, aè joñ ge bon äaara.

²³ Soçoçre ba ge few go, wur cog ge ti go gesiñ de soçoçre lay werga Manwur Pantway de hayge le wañ ti huuli Siyoñ äi leege Jerusalem. Togoëge äen naa ge nen yañ go pel jar kluuri mani äen wo.