SIŊ WORA 9 - Tupuri Bible

Manwur diŋ je yãã jar coo wo go de jar maga à de joŋ bon ɓaara mono

¹ Ne waŋ siŋ no. «Alamud laben.» Siŋ ma Dafidi.

² Ndi togoɗ ge Manwur yaŋ de jiili ɓi ɓuy Ndi dog wãɗge yaŋ go pur ti fẽẽre ngel see ɓo wo no.

³ Ndi joŋ ge fruygi yaŋ ni ɓo, ndi cag ge yaŋ go de fruygi Ndi ʼwaa ge siŋ yaŋ ma hã togoɗge ne ɗúu ɓo, Baa ma Ciŋ Hãã debaŋ no,

⁴ De maga jar hee ɓin dag wo we go blam no, Ɓaale ɓaara mbar ge day saara huɗ go,

⁵ Werga ndo kay ti ɓi, ndo de ko re ma see ɓin lay, Ndo de hayle ti paale waŋ ɓon diŋ je car kiida ma keɗede.

⁶ Ndo fĩɗ wer sir wo, ndo ii je debaycõõren go, Ndo tag ɗúu ɓaara go ma tum, hãã hãã wo pele.

⁷ Je hee bay wa so! A go de hasge ma tumtum. Ɓi leege maga ndo srog ra go, ɗiggi ti ti ɓaara taw we go.

⁸ Manwur de hayle diŋ ma tumtum Á de kaŋ paale waŋ ɓen diŋ ma caa kiida.

⁹ Wãã wããre tamsir ti ngel ɓe keɗed diŋ se, Caa kiida jar wo de deele lay.

¹⁰ Daga Manwur mo hay diŋ ngel yãã waŋ je maga à de joŋ coo ɓe mono. Ngel yãã waŋ ti wur ma nen coocoo no.

¹¹ Jar maga wo de ko ɗúu ɓo mono, wo de kaŋ ɗiggi ti ɓo Werga ndo bay go de tob jar maga kiɗ wo ndo mo wa Manwuri!

¹² ʼWaa we siŋ ma hã togoɗge ne Manwur maga de hayle Siyoŋ mono. Ngar we jag go yoo jar wo ti fẽẽre maga á joŋ ra go jag ciŋ kloŋe.

¹³ Werga á saʼ hee cíi maga kaa go mono, á fer ɗig ti ɓe Á bay go yõõ ti ti roo je ma nen coocoon wa.

¹⁴ Joŋ ɓil de el ɓon see ɓi, O Manwuri, Ko bon ɓi maga kaŋn me ti diŋ jar hee ɓin wo mono, Ndo diŋ je maga ndo ɗii me le go jag tuu húulí mono,

¹⁵ Nen maga ndi mo fer togoɗ moge de togoɗge ɓon wo ɓuy, Jag tiŋ ni may ma Siyoŋ no, Day nen maga ndi mo hay nen fruygi wer pẽẽge ɓo no.

¹⁶ Wer sir yõɓ wo ɓi tuu ɓaara maga saara ter ra mono. Ɓaale ɓaara bag ti bày maga saara hay yoŋ ne mono.

¹⁷ Manwur naa nen see ɓe go, á joŋ jar ti ngel ɓe, Je ma debaycõõren maʼ go ti giniɗi, Ti joŋre maga se hay joŋ ra de doo ɓe mono. Glegge jõõ no Iggi

¹⁸ Jar debaycõõre ngiɗ wo nen wo ni jar ɓi tuu wo Wer sir maga yõõ wo ti go ti Manwur mo ɓuy no.

¹⁹ Werga à bay go yõõ ti ti je coon ma tum wa hase, Ɗiggi maga jar ma nen bon wo de kaŋge ɓe taʼ mono bay go tawge wa.

²⁰ Ur go ciŋ Manwuri! Daga je táabay mo naa blum wa! Daga ndo mo caa kiida wer sir wo pel ɓo!

²¹ Caa bii go ne hara ɓili, O Manwuri! Daga á mo hay wo de koge ga saara diŋ jar téebeere koɗe!