SIŊ WORA 8 - Tupuri Bible

Togoɗge mani Baan wo de kluu mani je táabay no

¹ Ne waŋ siŋ no, Ti gitid. Siŋ ma Dafidi.

² Manwuri, Waŋkluu wùr no! Doo ga ɗúu ɓon go de woore ti tamsir ɓuy mono! Ndo diŋ je maga ndo go de kaŋ togoɗge ɓon ciŋ ti ngel ma ciŋ no.

³ Diŋ jag weere kleere wo, de weere ma ti pãã wo, Ga ndo tõõ kããge togoɗge ɓo no, ma mbuɗ sõõre jar hee ɓon wo no Ma joŋ doole je heen ga á mo hay go baʼa, je maga de giŋ ndo mono.

⁴ De maga ndi ko ngel ma ciŋn we, fẽẽre maga ndo joŋ ra de doo ɓo mono, Few de gér wora, maga ndo cor ra mono,

⁵ Je táabay bà diŋ wose maga ndo joŋ nen ɗiggi ti ɓe la? Day wel je tabayn bà diŋ wose maga ndo kaŋ ɗiggi ti ɓe la?

⁶ Ndo joŋn go de kos Baa, Day ndo kal hã togoɗge ne hẽne, hã twore ne hẽne.

⁷ Ndo kaŋn wãã wããre fẽẽre maga ndo joŋ ra de doo ɓo mo ɓuy no, Ndo laa fẽẽre wo go ɓuy ne hẽn gesiŋ ɓaale.

⁸ Fǐiri wo de deere wo wer kẽẽ ɓuy. Koh hayba nàyre ma mbásga wora,

⁹ Weere dweere ma ciŋ wo de cẽẽ ma nen maarog wo De fẽẽre maga seɗ wo nen bii mo ɓuy no.

¹⁰ Manwuri, Waŋkluu wùr no! Doo ga ɗúu ɓon ti tamsir la ɓuy de woore!