SIŊ WORA 7 - Tupuri Bible

Manwuri, blaw kiida ɓin go

¹ Siŋ lawge maga Dafid ʼwaan ne Manwur ti re Kus je ma ti wer mani Benjamen mono.

² Manwuri, Baa ɓi no! Ndi kiɗ ngel yãã waŋ ɓin diŋ see ɓo. Yãã me go jag jar joŋ coo ɓin wo no, day bud me go,

³ Doo hẽẽne maga á mo cerag wo ndi go doo mingir wo no wa, Maga raw de fen ɓe no, day je yããge ɓe go bay wa mono.

⁴ Manwuri, Baa ɓi no! Hayga ndi joŋ sen mokay we, Hayga joŋge nen yaŋ ɓi coo doo ɓi no,

⁵ Hayga ndi fer fen ma de ɓlagge we ne je maga wùr hay jam de kããra we no, Hayga ndi frum fẽẽre je hee ɓin we go bay faage no,

⁶ Daga je hee ɓin mo maŋ mbe blam ɓi, day mo wo mbe baa mege, Daga á mo srog mbe tenen ɓin go gesiŋ. Daga á mo legad mbe togoɗge ɓin go nen ɓurgi! Iggi

⁷ Manwuri, ur go ciŋ! De ɓil sõõge ɓo no, Ur go ciŋ see baage põõ mani jar hee ɓin wo no. Ndo je maga ndo joŋ de deele wããren wo mono, Hay go de pũygi ti ɓi.

⁸ Daga tayge jar mo cir bà wo ti ɓo go yaw, Ndo ma ɓon hay le go wãã wããre ɓaara ciŋ ti ɓaara!

⁹ Manwur caa kiida wer jar wo, Kaŋ me ti ngel de deele ɓi no, O Manwuri! Doo maga ndi keɗed nono, doo maga ndi de deele no lay!

¹⁰ Taw ɓlagge maga jar debaycõõren joŋ wo ne mono go, Day ni ndo kay je ma keɗed no, Ndo diŋ je maga ndo go de ko jiili jare, go de ko ɗiggi Ma de yoŋren wo no, ndo Baa ma keɗed no!

¹¹ Gidigli ɓin le ɓiŋ Baa maga yãã jar maga jiili ɓaara de deele go mono.

¹² Baa diŋ je caa kiida ma de deele Baa maga ɓil ɓe sõõ mbe ti naw tum

¹³ Hayga je debaycõõren coo we gà no, á ɓod saŋ moslam ɓe no, Á baŋ toŋwaa ɓe no, day kal kaŋge ɓe go ti toŋ.

¹⁴ Á grag see ɓe go de fẽẽre durgi ma id húulí. Kal baŋ waa wo go lag ma roɗ ngel wo go.

¹⁵ Koɗa, á ti joŋre ma joŋ re maga bay keɗed wa mono. Á ɗaw ɓlagge ɓil ɓe, kal biŋ fen maga bay cwãy wa.

¹⁶ Á caa jag tuu, day kal teege ɓe. Day se kal leʼge ɓi tuu maga se hay tee ne mono.

¹⁷ Ɓlagge ɓen fer leʼge ne hẽn ti toga, Day joŋre girgir ɓen fer le ne hẽn ti pẽẽgeti.

¹⁸ Ndi togoɗ ge Manwur yaŋ wer keɗed ɓe no, Ndi ʼwaa ge siŋ yaŋ ma hã togoɗge ne ɗúu Manwuri, Je ma Ciŋ Hãã debaŋ no.