SIŊ WORA 5 - Tupuri Bible

Tosge je maga Baa yãã ne see ɓe

¹ Ne waŋ siŋ no. De síilí wo. Siŋ ma Dafidi.

² Manwuri! coʼ sug ɓo laa wããre ɓin wo no, Laa wer ne ndumgi ɓi no.

³ Hay ɗeged ti ɗúu ɓi ma de ngarge jag no, waŋ ɓi no, Baa ɓi no! Ndi tos diŋ ndo!

⁴ Manwuri! De jag toŋ mono, ndo laa gẽẽge ɓi De jag toŋ mono, ndi naa nen see ɓi ne ndo, day ndi hay gorge.

⁵ Werga ndo diŋ Baa maga ndo bay joŋ fruygi ti debaycõõre wa, Ɓlagge bay le joŋge ɓiŋ ɓo wa.

⁶ Jar dogjag bay wo gregge pel ɓo wa Ndo hee de jar maga joŋ wo re maga bay keɗed wa mo ɓuy no.

⁷ Ndo caa wer jar car geteʼ wo go. Jar kag cíi jar wo de jar joŋ nen jar wo mono, Sen horge wo see ne ndo Manwuri.

⁸ Ama ma ɓi, wer ɓil de el ɓo ma kluu no, Ndi wo ge yaŋ liŋ ni ɓo. Wer hẽẽne maga à nen joŋge ɓe doo ɓo mono, Ndi leʼ monɗra jag tiŋ ɓo ma bay ɗag no.

⁹ Manwuri! Koɗ me ti joŋre mani ɓo ma keɗedn doo jar hee ɓin wo no. Raʼ faage mani ɓon wo go me pele.

¹⁰ Werga mopo maga go tinoo no taʼ bay nen wããre ɓaaran wa hase. Le nen ɓil ɓaara diŋ glubgi sagsage. Kiŋ ɓaara diŋ tuu húulí maga go de hãʼ jage. Trum ɓaara diŋ ma joŋ tawgi.

¹¹ Joŋ ra doo jar joŋ re nono, O Baa! Nii ra wo go wer ngaɓa ɓlagge ɓaara ma de hãã maga bay wo keege wa mono. Werga á wo de giŋ moge.

¹² Doo kay nono jar maga wo wo yãã waŋ see ɓo mono, joŋ ge wo fruygi yaŋe, Daga á mo hay wo joŋ fruygi tumtum, day ndo koɗ ge ra yaŋ, á joŋ ge wo fruygi yaŋ ni ɓo. Jar maga da wo ɗúu ɓon mono.

¹³ Werga Manwuri, ndo kaŋ bosaʼ ne je ma keɗedn ti Ndo cir ti ɓe go de de el ɓon doo gidigli nono.