SIŊ WORA 2 - Tupuri Bible

Waŋ maga Baa go de kaa noo ne hẽn ti mono

¹ Diŋ wer may ga wer sir gijig wo mo deŋ, Day jar ɗig wo mo deŋ bay blam diŋ ɗiggi mayla?

² Waŋre ma ti tamsirn bag wo jag see ɓaara go, Day jar kluurin tay wo jag go wer kẽẽ boŋ Ti Manwuri, day ti Mesi ɓen lay.

³ Naa ɓlag tayge ɓaaran go Naa laa gyam ɓaaran wo go see naa hãã!

⁴ Je maga le go de hayle ciŋ ti fege, Waŋkluu ti feg ti ɓaara.

⁵ Á de fer wããre ne hara nen sõõge ɓil ɓe no, Day, de tĩĩgi go de waŋ ɓe no, á caa hẽẽne ɓaara.

⁶ Hay kaa noo go ne waŋ ɓin ti mono diŋ ndi, Le Siyoŋ, ti húulì ɓi ma bay ɗag no!

⁷ Ndi dus gi wããre kefder maga Manwur kal ne go ge yaŋ wo go. Manwur hay wãã me gano : Ndo diŋ wel ɓi! Joŋ nen biŋ moge go wara mono diŋ ndi.

⁸ Wii mbo ndi, ndi hã ge wer sir wo yaŋ ne ndo diŋ tabul ma horge. Day ndi hã ge jag sir tawge wo yaŋ ne ndo diŋ nen mo ma ɓo.

⁹ Ndo wãã ge wããre ɓaara yaŋ de graw boo, Ndo weseg ge nen ɓaara ge go doo teɓoole pãy nono.

¹⁰ Day patalam no, waŋre wo, hay we car ɓil wããre wo Jar car kiida ma tamsir wo, yãã we hadge no!

¹¹ Joŋ we peele ne Manwur de hooge sug ti ɓe, Hay we nen fruygi, hay we daɗge.

¹² Klew we wel no, doo hẽẽne maga á mo sõõ ɓil wa, Day ni nday mo bas go ti faage ɓayn wa. Werga sõõge ɓil ɓen go mbaŋ ma doʼ wùu, Jar maga wo wo yãã waŋ see ɓe mo ɓuy, wo de daʼ see ɓaara.