SIŊ WORA 10 - Tupuri Bible

¹ Diŋ wer mayla Manwuri! Ga ndo oo le go hãã mo la? Diŋ wer may ga ndo yoŋ le go ti wur ma nen coocoon wo mo la?

² Jar debaycõõren wo de bag blam jar coocoon wo de maŋge ti ciŋ ɓaara no. Á wo go de joŋ coo doo ɓaara wer ɗiggi ɓaara ma de ɓlagge maga saara hay ɗag ra wo mono.

³ Werga je debaycõõren togoɗ see ɓe de haram ɓe no, Day je daɗge wer jarn faɗ Manwuri go day las ne lay.

⁴ Je debaycõõren kal wããge go de yõõ ti ga : Baa bay joŋ bon jobo wa. Baa bay wa has ɓuy yaw! Mono diŋ ɗiggi ɓen wo ɓuy so.

⁵ Ɗeŋ ɓen wo tum mono see wo ne hẽn were. Kiida mani ɓon raw wo go ciŋ hãã debaŋ ma dayge ɓe Á ɓoʼ egre la no kay tor jar hee ɓen wo wo go ɓuy.

⁶ Á kal wããge de ɓil ɓe ga : Ndi maʼ ge ɓaale gà. De wer maga ndar ge wo wer sar sar mo ɓuy bon daʼ ge me gà.

⁷ Jag ɓe go de baage de faɗge, de bagge bii jare, De joŋge freŋ wer trum ɓe no, Ni diŋ re wo de joŋre maga bay keɗed wa.

⁸ Á oo de laa gǔu ti jeŋ ɓi leege wo, Kal ii je maga bay de joŋ mopo wa wo go ti jeŋ, Nen ɓe bay go maŋge ti je coon wa.

⁹ Á le go de laa gǔu ti ngel ma ti jeŋ tiʼ doo mingir ɓi tuu ɓe nono, Á go de laa gǔu tiʼ ma naa je coon doo Á naa je coon doo, day kogn le ti bày ɓe no.

¹⁰ Á goɗom, á huli, Day je coon leʼ go ne hẽn ɓi coo doo.

¹¹ Á wãã de ɓil ɓe ga : Ti Baa go de yõõge Á go de yoŋ nen ɓe, á bay ko nen wa hase

¹² Ur go ciŋ Manwuri! Baa, maŋ doo ɓo ciŋ Yõõ ti go ti jar coocoo wo wa.

¹³ Diŋ wer may ga je debaycõõren ɗar Baa la? Á wãã de ɓil ɓe ga : Baa bay joŋ bon jar wa

¹⁴ Ndo ma ɓon ndo hay ko we, gayren wo de bon no. Ndo de ko rage maga ndo mo maŋ re ɓaaran doo Je coocoon go de tob see ɓe diŋ ne ndo Nduu caa war wel holgen diŋ ndo.

¹⁵ Harag doo je debaycõõren go, Joŋ bon debaycõõre ɓe no, day daga á mo yee nen go nen ɓo!

¹⁶ Manwur diŋ waŋ tumtum, hãã hãã wo pele Jar maga bay wo de ko Baa wa mono, wo go de caa wer ɓi sir sen la

¹⁷ Ndo de laa wããre jar coocoon wo no Manwuri! Ndo coɓ jag jiili ɓaara, ndo coʼ sug ɓaara,

¹⁸ Ma joŋ wel holgen wo de je maga à de joŋ coo ɓe ti ngel ɓe keɗede, Nen maga je táabay maga ndo naan le go nen sir mono, Mo hay de baa wùu joŋ hẽẽne ne jar wa.