SAKARI 14 - Tupuri Bible

Durgi ma blam tawn wo de nduugi Manwuri

¹ Koɗa, wur naw mani Manwur yaŋ le age! À ɓes ge fẽẽre ɓayn de see ɓayn wo yaŋ go Ti holaŋ ɓay ni ɓay ni doo ga.

² Ndi tay ge ti wer sir wo yaŋ le go Jerusalem ɓuy ma durgi À yãã ge ɓi leegen yaŋ, À dag ge tiŋ wo yaŋ go hrab hrab, Day à suɗ gi yaŋ de naare ɓay wo, À hoo ge nus ɓi leege no, raw ge yaŋ de ɓe, Ane te jar maga gwaʼ ge wo mono, Sen gwaʼ ge wo mbaara ɓi leege ni.

³ Manwur kal ge yaŋ go, Day dur gi wer sir sen wo yaŋ Doo maga á hay dur ti wur durgin nono.

⁴ Ɓaale ɓe kaŋ ge yaŋ ti wursen Ti húulì maga koore Olife wo ti ɓe mono, Maga de ngafge de Jerusalem, Wo nen wer no kay mono. Húulì maga koore Olife wo ti ɓe mono Celer ge yaŋ go ti gisiɗgi nen wer lay, nen pel lay Caa ge log yaŋ ti holaŋ ni kluu debaŋ Nus húulì maapo boŋ yaʼ ge yaŋ wo go nen ɓaŋ gloŋhwede, Nus ma lan yaʼ ge yaŋ wo go nen ɓaŋ ni wãybane.

⁵ Doo kay nono, nday daŋ ge yaŋ wo go Ti log húulì ɓin wo. Werga log húulìn wo ge wo go kaŋge hãã Atsale. Nday daŋ ge yaŋ doo maga nday hay Ɗee pel daɗge sir ma ti wur mani Osiyas Waŋ Judan nono. Manwuri, Baa ɓin nduu gi yaŋ Day, jar ɓe ma bay ɗagn joŋ ge wo yaŋ wer ɓe.

⁶ Doo kay nono ti wursen mono, Poɗag joŋ ge gà ceere joŋ ge gà Glas joŋ ge gà lay

⁷ Á joŋ ge diŋ naw maga go ni no boŋ no, Naw maga Manwur de koge ɓe, Maga joŋ ge mokay bay diŋ ngel ceg wa lay, Bay diŋ ngel suŋ wa lay Ama wo dayge ge de law no kay mono poɗag naa ge nen yaŋe.

⁸ Doo kay nono ti wursen mono, Bii ma de siggi yigyig kal ge yaŋ le go Jerusalem, Plaŋ yuu gi yaŋ wo nen jag maarog ma nen wer no, Plaŋ yuu gi yaŋ nen jag maarog ma ɓaŋ lan lay. Sen joŋ ge doosen nono de yaale lay, ti cege lay.

⁹ Manwur joŋ ge diŋ Waŋ ma ti tamsirn ɓuy. Ti wur sen mono, Manwur joŋ ge diŋ Baa ma boŋ no, Day ɗúu ɓe joŋ ge diŋ ɗúu ma boŋ no.

¹⁰ Sirn ɓuy joŋ ge go doo Araba nono, Le Geba kaʼ hãã go Rimmon Nen ɓaŋ ni wãyban Jerusalem Day Jerusalem joŋ ge yaŋ go de maŋge ciŋ Day joŋ ge ti ngel ɓe ni, Le jag tiŋ mani Benjamen kaʼ Hãã go ti ngel jag tiŋ ma taŋgu no, Hãã go jag tiŋ ma de her cõõ wo no. Day hãã le ti tiŋ ma de gẽẽre ma Hananeyel no, Hãã go ti ngel hãɗ fẽẽre mani waŋ no.

¹¹ À lag ge yaŋ de tiŋ ɓil ɓe Day fen maga go de diggi joŋ ge gà so, Jerusalem hay ge yaŋ go de yõõ ti.

¹² Mokay diŋ bulfũŋ maga Manwur ɓoʼge ne wer jar Wo ti ɓuy maga wo ge wo de soode ɓaaran wo dur Jerusalem mo ɓuy no. Hõõgese wosela ɓuy buu gi go deele deŋ, Nen ɓe buu gi wo le go ɓi hul ɓaaran ni kaɗ kaɗe, Day trum ɓe buu gi le go jag ɓe ni kaʼa.

¹³ Ti wursen mono, Manwur joŋ ge re ma gijig gijig debaŋ yaŋ ti holaŋ Ɓaara je ma lan ɗaw ge doo je ma lan yaŋ Day je ma lan maŋ ge doo yaŋ ciŋ see je ma la no.

¹⁴ Juda dur gi yaŋ ɓi leege Jerusalem, Day à tay ge horog ma ti wer sir ma ti jeŋ wo ni kara Ɓuy yaŋ go pur debaŋ : Boo biŋni wo, boo solay wo, de õõbe wo ra.

¹⁵ Bulfũŋn leʼ ge go ne piiri wo ti lay, Gerhẽẽ wayla wo, manyoŋyoŋ wo, gerhẽẽ wo, De horog maga joŋ ge wo mbásga sen ni mo ɓuy, Bulfũŋ sen joŋ ge de maŋ ma lan pa.

¹⁶ Doo kay nono, jar maga gwaʼ ge wo yoo wer sir Maga hay nduu wo dur Jerusalem mo ɓuy, Wo ge wo yaŋ nen kiŋgi tum Ma leʼ monɗra pel waŋ, Manwur Pantway, Ma joŋ few mburyugi.

¹⁷ Doo kay nono hayga, wer jar po wo ti sir la, Bay wo we woge Jerusalem Ma leʼ monɗra pel waŋ, Manwur Pantway wa no, Baa ra ge ni ɓaara gà.

¹⁸ Hayga wer jar Ejipte Bay wo we woge wa, hayga á nduu wo we gà no, Baa ra ge ni ɓaara gà. Sen joŋ ge diŋ bulfũŋ maga Manwur Ɓoʼn ge ne wer sir maga wo ge wo Jerusalem Ma joŋ few mburyug gà mono ti.

¹⁹ Sen joŋ ge diŋ bon maga daʼ sir Ejipte, Diŋ bon ma daʼ wer sir lan wo ɓuy maga Bay wo woge joŋ few mburyug wa mono.

²⁰ Ti wursen mono, à yer ge yaŋ Ti kondoloŋ ma soole piirin ga : Debay ɗag mani Manwuri no! Day teɓoole maga wo ɓi tiŋ mani Manwurn mono Joŋ ge wo doo kalis ma ti ngel siɗ jagn nono.

²¹ Teɓoole maga wo Jerusalem de Juda mo ɓuy Joŋ ge wo bay ɗage, ma Manwur Pantway. Jar maga nduu gi wo joŋ siigi jag mo ɓuy, Hoo ge wo ra yaŋ ma kar này. Day jar joŋ trere joŋ ge ɓi tiŋ mani Manwur Pantwayn Ti wursen gà so.