SAKARI 13 - Tupuri Bible

¹ Ti wursen mono, À bul gi kããge bii yaŋ ne Tiŋ mani Dafid no, De jar Jerusalem wo, Ma fãã ɓlagge ɓaaran wo go de De demge ɓaara no.

Manwur caa ge wer sõõre wo yaŋ go de jar wãɗ wããre Baa ma de geteʼ wo no

² Ti wursen mono, Wããn doo kay nono, diŋ Manwur Pantway Ndi yee ge nen ɗúu sõõre wo yaŋ go ɓi sir no Nen maga à mo fer ɗig ti ɓaara wa so hase. Ndi yee ge nen jar ndar nen wããre ma jag Baa wo yaŋ go de ɗiggi ma de demgen wo no.

³ Hayga jobo naa nen wããre we pa no, Á joŋ ge mokay pan ɓe wo de man ɓe Maga biŋ wo ne go mokay wãã ge wo yaŋ ne hẽn ga : Ndo joŋ ge caw tenen gà Werga ndo hay carge ti ɗúu Manwuri! diŋ geteʼe. Day pan ɓe wo de man ɓe maga biŋ wo ne go mono, Turn gi wo go, de maga á naa nen wããre we no.

⁴ Ti wursen wo mono, á joŋ ge mokay Jar ndar nen wããre kol ge wo de sõõre ti wããre ɓaara maga saara ndar nen ɓe mono, wosela ɓuy yoo ɓaara go ti ma ɓe, De maga á ndar ge wo nen wããre we mono. Á laa ge wo õõbe ma kluu ma de fũy ti nen maga Saara mo bag bii jar gà so.

⁵ Wosela ɓuy yoo ɓaara wãã ge yaŋ ga : Ndi bay diŋ je ndar nen wããre wa, Ndi diŋ je jeege siri Werga á yee me le go yeege ti klee ɓi ɓaa.

⁶ Ama à wãã ge yaŋ ne hẽn lay ga : Wããge ma sen de car moge doo mo deŋ diŋ wããge maysela? Á fer ge wããre yaŋ ga : Sen diŋ wããge maga à hay mbar me le Liŋ ni jar maga hay wo da mege mono.

À ko we patala ga Manwur diŋ Baa ma cwãy no

⁷ Moslam, pũy go see je koɗ ge ɓi no, Day, see je maga wùr ɓi sirn de kããra mono! Kay diŋ jag Manwur Pantway. Caa je koɗge no, Day ni sããren mo dus wo ɓil go, Day ndi coŋ ge ge doo ɓi yaŋ ne ma kleeren wo no.

⁸ Doo kay nono ɓi sirn ɓuy, Kay diŋ jag Manwuri. À caa ɓil ɓe we swaʼ no, ma ɓog Maga à caa ge ma sen wo go mono saara huɗ gi wo go, Day ma lan wo mono sen gwaʼ ge wo yaŋ ni lay.

⁹ Ma de swaʼ maga gwaʼge mono ndi ɓoʼn ge nen wùu Day ndi yorn ge go, Doo maga à yor boo solay nono, Ndi lamn ge yaŋ Doo maga à lam boo biŋni nono, Á ɗe ge ɗúu ɓi yaŋ, Day ndi coʼ ge sug ɓe yaŋ. Ndi wãã ge yaŋ ga : Jar ɓin diŋ saara! Day se wãã ge yaŋ ga : Manwur diŋ Baa ɓi no!