SAKARI 11 - Tupuri Bible

À ɓum sir ma de egre debaŋn wo ge yaŋ

¹ Libaŋ bul jag tiŋ ɓon wo go, Day wùu mo kal wo roɗ koore seder ɓon wo go,

² Ndum we koore Sipres wo, werga koo seder leʼ we go, Koore ma de woore ndilim ndilim à seɗ sen wo we go! Ndum we, koore cen ma Basan wo, Werga yoo koo maga ngel kalge yoo ɓe hay bay wa mono taw we go!

³ Ko ɗa, ngarge jage, ndumgi jar koɗ horog wo mo deŋ no, Werga à seɗ woore ɓaaran we go. Ko ɗa ngarge jag ndumgi weere mingir wo mo deŋ no, Werga à seɗ maŋge ti ciŋ ma bii Jurdẽẽ we go.

Jar koɗge ma ɓog wo no

⁴ Wãã doo kay nono diŋ Manwuri, Baa ɓi no ga : Koɗ sããre maga wo go diŋ ma woge ngaɗge mono!

⁵ Jar maga yeɗ wo ra mono, Ngaɗ ge wo ra go bay ko decoo. Wosela ɓuy maga yeɗ ge wo ra go mono day ge gana : Suseʼ ne Manwuri, Werga ndi daʼ horog we! Day je koɗ rage po boŋ Bay ko decoo ɓaara wa ɓuy.

⁶ Werga ndi men ge jar po wo ɓi sir ni gà hase, Kay diŋ jag Manwuri. Ko ɗa, go de hã faage jar téebeere wo diŋ ndi de see ɓi Ne kããra doo ti holaŋ ɓaara de see ɓaara Day ne waŋre ɓaaran wo doo, Á geɗeb ge wo nen sirn yaŋ go Day ndi yãã ge ra go doo ɓaara gà.

⁷ Doo kay nono, ndi kal koɗ sããre maga hay wo go ma woge ngaʼge mono, sããre ma de coocoo wo no. Ndi kal hoo grawre ma koɗ rage doo ɓoge. Ndi kal kaŋ ɗúu ne maapo boŋ ga : Barge, kal kaŋge ne ma lan ga Tayge. Day ndi kal koɗ sããren wo no.

⁸ Ndi kal yee nen jar koɗge ma swaʼn wo go nen few boŋ. Á hay srog wo wer ɓi go ga ndi mo ɗaw see ɓi wa so, day, ma ɓaara ti see ɓaara mo lay no, ndi hay bay de cõõre jag ɓaara wa so lay.

⁹ Doo kay nono ndi kal wii sããren wo ga : Ndi koɗ ge nday gà so! Daga maga sen go nen húulí mo huu mbe go, maga sen go ma yee nen mo lay no, mo yee mbe nen go lay, day maga sen wo nen gwaʼge mono, mo re wo kããra go ti holaŋ kããra lay.

¹⁰ Ndi kal maŋ graw ɓi maga à ɗen ga Barge mono, ndi kal hragge ɓe go ma ɓlag tayge jag ɓi maga ndi hay tayn de wer jar wo ɓuy mono go.

¹¹ Tayge jagn kal ɓlagge go wur seno. Day sããre maga sen wo nen coocoo dedaŋ kããra ɓuy, ga hay wo de kaŋ ɗiggi ti ɓi mono, kal wo koge ga mbe doosen nono á hay diŋ wããre Manwur mbe kidolgi.

¹² Ndi kal wii rage ga : Hayga á coo we jag ɓay no, hã we poɗge ɓin go me, hayga bay we wa lay no, ni nday joŋn we wa lay. Á kal wo ngaɓ solay ma poɗ mege nen solay boo hwalhwal swaʼa.

¹³ Manwur kal wii mege ga : Laan wo go ne je borge, yoo se ma de woore maga á ngaɓn wo solay ɓe nen yee mege no mono! Ndi kal hoo solay ma hwalhwal swaʼ no, ndi kal laage ɓe ɓi tiŋ mani Manwurn ne je borge.

¹⁴ Blam ɓe ndi kal harag graw ɓi ma de ɓogn go maga à ɗen ga tayge mono, ma ɓlag tayge hẽẽrebe ma ti holaŋ Judan wo go de Israyele.

¹⁵ Manwur wii me ga : Grag see ɓo tigriŋ doo je koɗ horog ma de loɗge nono!

¹⁶ Werga ndi de see ɓi, Ndi nduu yaŋ de je koɗge po maga nduu gi ɓen kay ge wer sããre maga wo go de yeɗ nen mo gà. Á wo ge kiɗ ma kleen gà pẽẽ ge maga wããge de caa sen mo gà maga sen de el ɗa mono se hã ge rege ne hẽn gà. Ama á re ge này maga sen de goɓre ge go, day plawn ge go hãã ti fũygi-ɓaale ɓe taɗ taɗe.

¹⁷ Gaali ti jar koɗge ma de ɓlaggen wo, Maga tob wo sããren wo go mono! Daga moslam mo car ra doo, Day mo ɓer ra ti nen ma ɓaŋ ware, Daga doo ɓe mo hig go ɓuy, Day nen ɓe ma ɓaŋ war mo huu go ɓuy!