SAKARI 10 - Tupuri Bible

Wii we diŋ Manwuri, bay diŋ sõõre wo wa

¹ Wii we Manwur ga Baa mo ra ti wur ɓe ma de tob no! Manwur ɓod ge ɓurgi yaŋ le Day raa ge Baa yaŋ ne hara bid bidi Á tĩĩ gi fíi yaŋ ne wosela ɓi tway ɓe.

² Werga Terafẽẽ car wo ne nday diŋ geteʼe, Jar hadge ndar wo ne nday bay diŋ nen wããre ma ti ngel ɓe wa, Lwaʼge maga à lwaɗ ra mo deŋ wo ɓil koɗ ɓuy Day bay wo teŋ nen jobo wa. Diŋ wersen ga á wo go de welge doo horog ma de car ɓil wo mo tiʼ no. Á wo nen bone, diŋ wer maga je koɗ rage bay wa.

À budgi jar yaŋ wo go

³ Sõõge ɓil ɓin doʼ wùu ne jar koɗgen wo ti Day ndi nduu gi yaŋ yiŋ bloore togloŋren wo no, Werga Manwur Pantway nduu kay horog ɓen wo no, tiŋ mani Juda no, Day hã ge togoɗge yaŋ ne hẽn Doo piir maga á wo de ɓe jag durgi nono.

⁴ Húulì ma ti cõõ tiŋ kal ge le go diŋ see ɓe Dog tiŋ ma de coʼge kiŋn kal ge le go diŋ see ɓe Toŋwaa durgin kal ge le go diŋ see ɓe Waŋren laa ge wo le go ɓuy diŋ see ɓe

⁵ Á joŋ ge wo doo blumri maga Dag wo pããge ma ti faage wo go jag jaw nono. Á dur gi wo yaŋ, Werga Manwur joŋ ge yaŋ de ɓaara. Day jar maga sen wo de ɗiigi ti piiri mono, Wùu gi wo ti yaŋ de sõõre

⁶ Ndi kol ge tiŋ mani Judan yaŋ go blum Ndi yãã ge tiŋ mani Josefn yaŋ go, Ndi fer ge yaŋ lag rage liŋ, Werga ndi ko decoo ɓaara, Day á joŋ ge wo yaŋ doo maga ndi hay bay go de men rage wa nono. Werga ndi diŋ Manwuri, Baa ɓaara no, Day ndi yiŋ gi jag yaŋ ne hara.

⁷ Efrayim kol ge yaŋ doo blum nono, Jiili ɓaara daʼ ge fruygi maga yii hãn mono yaŋ ge. Weere ɓaara kon ge wo yaŋ, day fruy gi wo yaŋ. Jiili ɓaara joŋ ge fruygi yaŋ wer Manwuri.

⁸ Ndi ʼwaa ge flew yaŋ ma tay ti ɓaara Werga ndi yãã ra go, Day á tes ge wo yaŋ doo maga á hay wo tesge nono.

⁹ Ndi dus gi ra yaŋ go yoo wer jar wo, á mo hay bà wo wo go hãã draʼ, á ɗig gi wo yaŋ ti ɓi. Á joŋ ge wo yaŋ sug sug de weere ɓaara wo, day fer ge wo yaŋ le.

¹⁰ Ndi fer ge ra yaŋ le ɓi sir ni jar Ejipte wo le Day ndi tayge ti ɓaara yaŋ le ɓi sir ni jar Asiri wo le Ndi fer ge yaŋ le de ɓaara ɓi sir Galaad wo de Libaŋ, Day ngeln kãã ge ra gà.

¹¹ Á caa ge nen maarog bonn yaŋe Á mbar ge kaŋngaw maarog yaŋ De kuɗum bii Nil wo ɓuy hig gi wo yaŋ go. Maŋ ge ti ciŋ mani jar Asirin wo taw ge yaŋ go Day graw waŋ mani jar Ejipten wo yaʼ ge yaŋ go.

¹² Egre ɓaaran joŋ ge yaŋ diŋ Manwuri, Day á see ge wo yaŋ diŋ ti ɗúu ɓe, Kay diŋ jag Manwuri.