RUD 4 - Tupuri Bible

Bowas kol ti ngel Elimelege

¹ Bowas kal rawge jag tiŋn ti ngel kluu maga á tay kneʼ wããre wo ni mono, á kal hayge gesiŋ yeʼe. Kaw Elimeleg maga á hay wii Rud ti ɓe la kal heege tuu lay. Bowas raw ɗege ɓe le ga : A le hayge lam ɗa mbo. Je sen la raw yaʼge le ɓiŋ ɓe.

² Bowas raw hoo jar po wo hwal yoo jar kluuri ma ɓi leegen wo ni, day ga : Lag we go gesiŋ lam no. Á raw wo lagge go gesiŋ.

³ Á raw wii je maga de hay hoo tabul mani Elimeleg la gana : De maga Nawmi fer le liŋ ga á hayle ni jar Mohab wo mono, de kiɗgi patala ga se yee pay mani kaw naa Elimelegn go.

⁴ Ndi raw ɗiggi ga á de el maga ndi sii wããre sen mo ɗa lay. Patala ndi ɗig ga daga ndo mo joŋ nen cooge ɓe pel jar kluuri naa wo no. Ndo yaŋ nen coo pay no, ni ndo coo ne, bay wa lay no, ni ndo siin go me nen maga ndi mo laa lay, werga jobo bay go pel ɓo ti sen mo taʼ wa, je de ɓog ɓon diŋ ndi tuu seŋ lay. Bloo sen la kal wããge ne hẽn ga, ndi coon mbi yaŋ.

⁵ Bowas day ga : Wur maga ndo ndar doo Nawmi go see payn mono, ndo hoo ra wer kããra de Rud may jar Mohabn wãy je húulín ɓuy, ma ferge maŋ ɗúu je húulín ciŋ ti tabul ɓe ma horge no.

⁶ Bloo maga hay nen hoo Rud la wo laa sen mono, raw fer wããre ga : Ti sen mo taʼ ni ndi joŋ nen menge ɓe. Sen bay ma ɓlag tabul ma horge me la wa so. Kol mbo patala joŋ joŋre sen mokay ti ngel ɓi so. Ndi hã faage mo, werga á bay diŋ mo joŋge doo ɓi wa.

⁷ Hay ti wurpo ni jar Israyel wo mono de maga jar po leʼ wo we joŋ yoo mopo lay bla noga leʼ wo we cooge ɓe laybla no, jobo boŋ yoo ɓaara raw naa taarag ma ɓaale ɓen go, raw hãge ɓe ne je ma la no, ma joŋ sedewa ti holaŋ ɓaara.

⁸ Je maga hay nen hoo tabuln la raw naa taarag ma ɓaale ɓen go raw hãge ɓe ne Bowas day wiin ga, Coon mbo ma ɓo.

⁹ Doo sen nono, Bowas raw wii jar kluuri ɓaaran wo ɓuy gana : Nday diŋ jar sedewa ɓi wara ga ndi hoo tabul mani Elimelegn we doo Nawmi de fẽẽre mani jar ni ɓen wo, Kilyon wo de Mahlon.

¹⁰ Day ndi joŋ nen hoo Rud may jar Mohab no, wãy mani Mahlon no, ma ferge maŋ ɗúu ɓe ciŋ ti tabul ma horge mani ɓe no, nen maga ɗúu ɓe mo joŋ nen tawge go yoo hẽẽre ɓe wo wa. Fẽẽre maga jar ni ɓaara joŋn wo mono, daga ɗúu ɓe mo hay yoo ɓaara ni lay. Patala nday diŋ jar sedewa.

¹¹ Jar kluurin de jar maga hay wo ti ngel ni kal wo fer wããre ne hẽn ga : Wùr diŋ jar sedewa mbe. Ama daga Baa mo kol wãy maga day woge wo kalge liŋ ni ɓo mo caw doo Rasel wo de Leya nono, werga á wo ɓog ɓuy diŋ naare maga laa wo tiŋ mani Israyeln mono. Daga ndo mo hay de horog debaŋ ti moobe mani Efrata no, daga ɗúu ɓo mo hay de rage ɓi leege Betlehem.

¹² Daga Baa mo hã weere mo de wãy sen ngaɓa, daga feele mani ɓon mo joŋ doo mani Perets wel mani Judan wo de Tamar nono.

Bowas hoo Rudi, wo ge biŋ Obede

¹³ Diŋ doo kay no so no ga Bowas hoo Rud wãy ɓe. Á raw woge ɓin ɓe, Manwur raw hã ɓiili ne Rudi, se raw biŋ wel ma tware.

¹⁴ Naare wii wo Nawmi gana : Bosaʼ, bosaʼ Manwuri, ti maga á kaŋ je ɗaw mo ge mo pel mono. Daga kaa ɓon mo kol de ra ɗúu ɓi sir Israyele.

¹⁵ Mbargan mokay fer yaŋ hã egre ne ndo, fer yaŋ soɗ tããbe ɓo, werga biŋn diŋ kaa ɓo maga da mo mono, kaa ɓo maga yaŋ nen weere renam mono.

¹⁶ Nawmi raw maŋ mbargan go jiili ɓe, hãã gẽẽn go.

¹⁷ Naare ma ti jeŋ wo ni raw wo wããge ti mbargan ga : Nawmi daʼ wel we. Saara kal kaŋ ɗúu ne hẽn ga Obed. Obed wo ge joŋge diŋ pan Isayi, pan Dafidi.

Ɗúu moore Dafid wo mokay no

¹⁸ Mokay diŋ ɗúu moore Dafid wo, tĩĩ wer ti Peretse.

¹⁹ Perets diŋ pan Hesron, Hesron diŋ pan Ram, Ram diŋ pan Aminadab.

²⁰ Aminadab diŋ pan Nason, Nason diŋ pan Salmon,

²¹ Salmon diŋ pan Bowas, Bowas diŋ pan Obed.

²² Obed diŋ pan Isayi, Isayi diŋ pan Dafidi.