RUD 3 - Tupuri Bible

Rud nà ɓaale Bowase

¹ Ti wurpo Nawmi, wii kaa ɓe Rud ga, May ɓi, daga ndi mo kiɗ ngel hayle go mo, nen maga ndo mo hay de fruygi.

² Doo maga ndo kon mbo no so no, Bowas se maga men ndo joŋ joŋre wer mayre gebeere ɓen wo mono, á diŋ je ma mbaŋ de werpiiri naan wo. Á wo yaŋ go ɓum coore ble ɓe ma ti yaagen law la.

³ Doo sen yog go, ni ndo jwed trusa see ɓo jwede, hee õõbe ɓo ma de wooren see ɓo. See, wo ti ngel maga á de ɓum coore ble ɓen ni mono, ama ni ndo naa nen see ɓo go taŋgu maga á bay rege wo de joge mo wa.

⁴ De maga á suu we no, er ngel maga á suu ni mono, blam ɓe ni ndo see, hoo jag õõbe ma ɓaale ɓe no, ni ndo suu ni. Á wii ndo yaŋ ti fen maga ndo nen joŋge ɓe mono.

⁵ Rud raw fer wããre ne kaa ɓe ga : Fen maga ndo wii me ti ɓe mono ndi joŋn yaŋe.

⁶ Á ɗii gi wo ma woge ti yaagen so. Á wo mokay la joŋ fen maga kaa ɓe hay ngaɓn ne hẽn mo ɓuy no.

⁷ Bowas re go re, raw joge wer ɓe lay, blam ɓe ɓil ɓe raw joŋge go fehhe. Á raw yaʼge wo go suugi ti jeŋ yaagen tiʼ i. Rud kal nduugi yaʼ suugi ɓaale ɓe eŋŋa.

⁸ Wo dayge ti gisiɗgi suŋ mono, Bowas raw urgi go ciŋ bodãy de temge, á wo jel see ɓe no kay kona wãy po de suuli ɓaale ɓe la tiʼ i.

⁹ Á raw wiigi ɓe ga : Á diŋ ndo wo se ɓa? Wãyn raw fer wããre ne hẽn ga, Á diŋ ndi Rud, maygebe ɓo no, ɗaw me doo ɓo werga faage ti ɓo ma hoo mege.

¹⁰ Bowas raw wiigi ɓe ga : Daga Manwur mo kaŋ bosaʼ mo ti, may ɓi. Fen maga ndo joŋ sen mo pa no, diŋ mo ma kaŋ nen ga ndo yãã jag kaa ɓo ti feele mani ɓe no. Ama maga ndo joŋ sen mokay daŋ ma taŋgun pa so yaw, werga koɗa, ndo da diŋ weere jõõre ma decoo noga de egre wo gà.

¹¹ Patala de ele, ɗig wa so hase. Ndi joŋ fen maga ndo de sãy ɓe ti yaŋ mo, werga jar ɓuy go de koge ga ndo diŋ manwãy po ma de ele.

¹² Á mbe cwãy kidolgi doo sen nono, ga ndi diŋ kaw ma mbaŋ ma hoo moge, ama je ma mbaŋ ma tigriŋ de daŋ mege yaŋ go.

¹³ Patala joŋ mbo nen nage la tiʼ i, ngel tee we go toŋ no, naa ko wããre sen yaŋe. Hayga á ɗig we ga se oo yaŋ ti ngel oole se, se hoo ndo yaŋ, ni á mo hoo mbe. Day hayga á wãã we ga wããre sen la joŋ doo se gà lay no, ma ɓin Manwur yaŋe, ndi yãã mo yaŋ see ɓi. Patala suu mbo tiʼ ɗa so, ngel mo tee go ɗa.

¹⁴ Rud raw mbe nage ɓaale ɓe ni tiʼ so, hãã ngel tee go. Á raw urgi go ciŋ de maga ngel busum busum ga jobo hay bay nen ko kẽẽ caw wa ɗa mono, werga Bowas hay ɗig ga daga jobo mo ko ga á hay nduu we la wa.

¹⁵ Day pa á wiin ga, naa õõbe ma kluu ma ti ɓon le go ni ndo blarn wo go. Rud raw blarge ɓe wo go, se raw ngaɓ coore ble ne hẽn ni kelew hwal ti dwee, raw maŋ ti ɓe de maŋ, blam sen Rud kal mbe rawge liŋ so.

¹⁶ Rud wo daʼ kaa ɓe, day kaa ɓe wiin ga : Nà ndo mbo may ɓi? Rud raw bag blam fen maga Bowas joŋn ne hẽn mo ɓuy.

¹⁷ Day wiin ga : Á ngaɓ coore ble le me doo mokay no ga fer liŋ daʼ kaa ɓo doo koɗ wa.

¹⁸ Nawmi wii kaa ɓen ga : Hay mbo eŋ may ɓi, wããre sen la taw tawge ne, ndo kon yaŋ mbo. Werga bloon mo caw hay ge wara yeʼ gà de maga wããre sen mo taʼla bay go de leʼ jag wa ɗa mono.