RUD 2 - Tupuri Bible

Rud wo fleg blam jar ɓil pay ni Bowase

¹ Kaw war Nawmi ma mbaŋ hay yaŋe. Bloo sen la hay diŋ je ma ti feele mani Elimeleg no, á diŋ je maga à de koge ɓe, se de horog lay, ɗúu ɓe ga Bowase.

² Ti wurpo Rud may jar Mohabn wii kaa ɓe Nawmi gana : Hã faage me ma woge fleg blam jar ɓil pay wer je maga ndi ko we nen je ɓen de el mono. Nawmi raw fer wããre ne hẽn ga : See mbo, may ɓi.

³ Rud kal rawge so, á wo fleg blam jar ɓil pay wer jar po wo de we coore ble. Paga se wo daʼge mono payn diŋ ma Bowas kaw Elimeleg maga á wo ɓi feele po boŋ.

⁴ Blam sen mono, Bowas hay le liŋ raw nduugi. Á raw joŋ suseʼ ne jar we cooren wo ga, Daga Manwur mo hay de ɓay. Jarn raw wo ferge wo ne hẽn lay ga : Daga Manwur mo kaŋ bosaʼ mo ti.

⁵ Bowas raw wii je gor jar weegen wo ga : Sen mo caw diŋ may waare ma wo se ne?

⁶ Je ma gor jar weegen wo ga : Á diŋ may jar Mohab maga Nawmi nduu le de ɓe wer ɓi sir Mohab mono.

⁷ Á wii faage ga men se far coore ble maga gwaɗ go blam jar weegen wo mono, day á mo caw diŋ maga se nduu we keɓaa hãã de jag toŋ, á mbe deele caw ngel iggi ɓe bay wa ɓuy, á ig we no ni se semagga koɗe.

⁸ Bowas raw wii Rud ga : Coʼ sug ɓo de ele may ɓi, ti naw sen la ni ndo wo fleg blam jar ɓil pay ma je tigriŋ wa so, taw mbo flegge wer mayre gebeere ma ɓin wo la ni so.

⁹ Ko ngel maga jar weegen wo ni mono, ni ndo see blam ɓaara. Ndi go de wii weere jõõre ɓin wo ga á mo duʼ wo ndo wa. De maga jwaale kaŋ ndo we no, bii maga weere jõõre ɓin jon wo mono ni ndo wo mbo joge tuu lay.

¹⁰ Rud raw leʼge gesiŋ pel Bowas day wiin gana : Ndi diŋ may jar sir waare lay, day diŋ wer may ga ndo joŋ me de el doo sen ga, ndo kaŋ ɗiggi ti ɓi nono mo la?

¹¹ Bowas raw wiigi ɓe ga : À bag blam wããre ɓo me, ti fen maga ndo joŋ see kaa ɓo, hãã le ti wur maga war ɓo huu wo go mono. Day ndi de koge ga ndo men man ɓo wo le go de pan ɓo, de sir ɓo maga ndo biŋ le ni mono, ma nduugi hayge yoo jar po wo maga ndo hay bay go de ko rage pel bol wa.

¹² Nen daga Manwur mo poɗ mo ti sen mo deŋ ɓuy no. Daga Manwuri, Baa mani jar Israyel wo no, maga ndo á hulgi graŋ ɓe mo poɗ mo ti joŋre ɓon wo ɓuy.

¹³ Rud day ga : Ndo joŋ de el see ɓi debaŋ, waŋ ɓi no, werga wããre ɓon kal me jag jiili de woore debaŋ. Ndo hã teŋge nen me doo maygebe ɓo no no, day ndi bay diŋ maygebe ɓo wa lay mono, sen de ele.

¹⁴ De maga á lag wo rege mono, Bowas raw wii Rud ga : a le rege ɓiŋ wùr la. Caa hoole ni ndo deʼ mbo nee tuu lay. Doo sen nono, Rud raw hayge ɓiŋ jar weegen wo no, Bowas raw hã coore ble ma de cogge ne hẽne. Rud re, kãã go, hãã te ɓe gwaʼ go doo ɓe ni.

¹⁵ Rud fer urgi go ciŋ ma fleg blam jar pa. Bowas raw wii jar joŋre ɓen wo ga : Menn we mbay farge yoo coore ble ma bay weegen lay, car we põõ ne hẽn wa.

¹⁶ Lag we mbay coore maapo le go blam, ni nday menn mbay go nen maga á mo far ne. Daŋge ɓuy car we põõ ne hẽn ti mopo wa.

¹⁷ Rud sii farge hẽẽ, de law mono, se kal yaʼge go ɓum maga se far ne mono, sen kal baa bugu boŋ.

¹⁸ Á raw age go de ɓe liŋ, raw kaŋ nen kaa ɓe ni. Blam sen se raw hoo rege maga hay gwaʼ le keɓaa doo ɓe ni mono raw hãge ɓe ne kaa ɓe.

¹⁹ Kaa ɓe raw wiigi ɓe ga : Ndo fleg blam jar ma sen wara nà la gen pa? Ɓil pay ma hon pa? Daga Baa mo kaŋ bosaʼ ne je ma joŋ de el see ɓon ti. Rud raw bag blam wããre sen ne kaa ɓe ga je maga se joŋ joŋren ɓil pay ɓen mono à ɗen ga Bowase.

²⁰ Nawmi wii kaa ɓen ga, Daga Manwur mo kaŋ bosaʼ ne hẽn ti, Manwur maga ko decoo jar ma tenen wo doo jar ma de húulí wo no lay mono. Á day wii Rud ga : Bloo sen mo caw see ɓo diŋ kaw naa ma mbaŋ ti wer ma hor naan wo.

²¹ Rud day ga : Á wii me yaw ga ndi mo wo mbi ti naw sen la tum flegge wer jar weege mani sen wo no.

²² Nawmi raw wii Rud ga : De el debaŋ may ɓi. Wo mbo flegge wer mayre gebeere mani ɓen wo no.

²³ Rud raw mbe tawge joŋ joŋre wer mayre gebeere mani Bowasn wo ni so, hãã go ti wur maga weege coore blen taw go. Day de maga joŋre cooren blen taw go ɓuy mono, Rud raw mbe hayge ɓiŋ kaa ɓe sen lam no.