ROM WO 1 - Tupuri Bible

Pol hee jag ne jar Rom wo

¹ Mokay diŋ wããre ɓi Pol wejõõ Yeso Kris. Baa ɗe me maga ndi ma hay diŋ je peele Yeso day maŋ ndi go sagsag ma siɗ Wããre ɓe ma de cõõren go.

² Wããre ma de Cõõre sen diŋ maga Baa hay wãã le go ti ɓe taŋgu ɓaa jag jar ndar nen wããre ma jag ɓen go day go de yerge ɓi kefder ma bay ɗagn mono.

³ Á wãã diŋ ti Wel ɓe Yeso Kris maga biŋ le go ti cẽw mani Dafid de hõõgese je tabay mono.

⁴ Ama Nenterse ma bay ɗag raw naa nen ɓe go de egre ga á diŋ Wel Baa, diŋ de maga á bir le go yoo jar ma de húulín wo mono, ma kaŋ nen jar ga Yeso diŋ Waŋkluu.

⁵ Wer Yeso, Baa raw joŋ ɓil de el ti wùri, raw hã peele ɓen ne wùr doo ma woge de wer jar ma honla ɓuy hã ɓil ɓaara ma yãã jag ɓe wer ɗúu Yeso.

⁶ Nday de keege yoo jar sen wo lay, nday jar ma ɓi leege Rom maga Yeso ɗe we le mono.

⁷ Ndi yer wo ne nday jar dage mani Baa ma Rom wo ɓuy, nday maga á ɗe we le maga nday mo hay bay ɗag mono. Daga Baa Pan naa wo de Waŋkluu Yeso Kris mo joŋ wo ɓil de el ti ɓay mo hã wo jam ne nday.

Pol ga se wo ge yaŋ ko jar jag Baa ma Rom wo

⁸ Taŋgu, ndi joŋ suseʼ ne Baa ɓin wer Yeso Kris ti ɓay ɓuy wer maga jar wo go de wããge ti hãge ɓil ɓay ne Kris ɓi sir krub ɓuy mono.

⁹ Baa maga ndi kol wejõõ ɓe sii Wããre ma de Cõõre mani Wel ɓen go ne jar de jiili ɓi ɓuyn yaŋ de koge ga ndi wãã diŋ cwãy wããre, á de koge ga ndi yaŋ ɗig ti ti ɓay tum.

¹⁰ Tum nen tosge ɓi ndi wii Baa ga hay ga ɓil ɓe da we no, á mo hã faage me ma woge ni ɓay.

¹¹ Werga ndi de dage debaŋ ga ndi mo wo ko weege, maga ndi mo wo de fen maga Nenterse hãn ne wùr ne nday nen maga nday mo kol de egre.

¹² Daŋ ge ɓuy, ndi da ga ndi mo hay yoo ɓay, maga naa mo coɓ nen de kããra, wer hãge ɓil naa se boŋn ga naa ɓuy de hãge ɓe ne Yeso Kris mono.

¹³ Nday hẽẽre ɓi no, ndi da ga nday mo hay de koge ga ndi yaŋ kiɗ faage tum ga ndi wo ni ɓay, day hãã patala ndi bay de daʼ faage wa ɗa. Ndi da ga joŋre ɓi mo leʼ mbèere yoo ɓay doo ga á de joŋge yoo wer jar lan wo no lay.

¹⁴ Werga ɓèere ti ɓi maga ndi mo wo go see jar Greg wo, see jar ma yoofíi wo, see jar ma de ko re wo, see jar ma bay ko reen wo lay.

¹⁵ Diŋ wersen ndi da debaŋ ga ndi wo sii Wããre ma de Cõõren ne nday jar Rom lay.

Egre Wããre ma de Cõõre no

¹⁶ Sõõre siigi Wããre ma de Cõõren go bay joŋ mege wa, werga á diŋ egre Baa maga yãã wosela maga hã ɓil ɓe we mo ɓuy go, ma yãã jar Jwif wo go taŋgu, blam sen, ma yãã jar maga bay wo jar Jwif wa go lay.

¹⁷ Werga, Wããre ma de Cõõren kaŋ nen jar go ga á kol nen Baa de deele diŋ de hãge ɓil lay, wer hãge ɓil lay, doo maga á go de yerge ga : Je ma de deelen joŋ ge tenen caw diŋ wer hãge ɓil nono.

Wããre Baa go de baa jar téebeere wo ɓuy

¹⁸ Ɓil Baa de sõõ ge le ciŋ ɓaa ti wer ɓlagge ma honla wo ɓuy, de wer joŋre mani naŋ gà maga jar téebeere joŋ ra wo mo ɓuy, ma dig nen cwãyn go reʼreʼ mo ɓuy no.

¹⁹ Kidolgi, fen maga jar kãã wo ma ko Baa see ɓe yaŋ mbe go tinoo nen jar poɗage, Baa de see ɓe kaŋ nen jar we go ni poɗag lay.

²⁰ De maga Baa joŋ tamsirn de fẽẽre ma ɓil ɓen wo le mo hãã no, sen maga a ko ga se Baa no kay mono, egre se ma debaŋn no kay no, see se maga bay go tinoo wan draʼ, jar mo kon wo wer joŋre se maga se joŋ ra mono.

²¹ Wersen wããre Baa go de baw jare. Jar tebere wo mbaara de koge ga Baa nen togoɗge, ama saara day togoɗge ɓe gà day wo joŋ suseʼ ne hẽn gà lay. Ɗiggi ɓaara raw kol ge go de loɗge pa so yaw, ɓil ɓaara ma de loɗgen raw bagge go de suŋgu mbaŋ mbaŋ.

²² Á raw wo wãɗge ga saara diŋ jar ma de ko re, paga saara go de loɗge yaw.

²³ Á hay wo nen maga á leɗ wo monɗra diŋ ne Baa ma de togoɗgen ga huu gà mono, day saara raw wo leɗ monɗra diŋ ne fodo mopo ma de joŋge de maŋ je tabay maga huu go mono, de fodo dweere wo de nàyre ma ɓaale naa naa wo, de fẽẽre ma lagadgen wo yaw.

²⁴ Wersen Baa raw men rage ti joŋre se ma de ɗagn wo, doo ga ɓil ɓaara da nono, maga á mo see mbaara joŋ re sõõre ne see ɓaara ti so.

²⁵ Á raw wo coo cwãy wããre Baa go de geteʼe, fen maga Baa joŋ ne, saara leɗ monɗra ne hẽne, leɗ wo monɗra ne hẽn de daŋ Baa je joŋ fẽẽren wo, Baa maga de togoɗge le tum sagsag mono. Amen!

²⁶ Diŋ wersen Baa raw men rage joŋ re sõõre wo doo ga ɓil ɓaara dan no so no, naare wo de see ɓaara men wo woge go see werpiiri ɓaara wo, raw wo rawge suɗgi diŋ de kããra ɓaara naare wo.

²⁷ Werpiiri raw wo men woge go see naare ɓaara doosen lay, raw wo baa wùu dage diŋ kããra ɓaara werpiiri wo, joŋ wo re sõõre de kããra ɓaara werpiiri wo. Ama á daʼ ge wo bon ɓaaran yaŋ de see ɓaara wer joŋre ɓaara ma de ɓlaggen wo.

²⁸ Baa wo ko ge ga á laa wo fer ge ko see Baa ga mono, se raw men rage go ne ɗiggi ɓaara ma de dog jag no, maga á mo joŋ wo mbaara fẽẽre maga á hay bay wo nen joŋge ɓe wa mbaara.

²⁹ Wersen ɓil ɓaara raw bagge go de joŋre ma bay ngar ma honla ɓuy, de debaycõõre, de dage fẽẽre hram, de hãã, de huni, de idgi húulí, de leɗge kããra, de tawgi ma jãɗ jare, debaycõõre,

³⁰ bag go de lagge jar ne kããra ti, de wãɗge re ma de ɓlagge ti kããra, de carge hee de Baa, de joŋge sõõre jar gà de farge ti see ɓaara ciŋ, de keɗge see ɓaara ga riŋ ga saara, de ɗiggi ɗeŋ ma joŋ ɓlagge, day wo yãã jag pan ɓaara wo de man ɓaara wo gà.

³¹ Á day wo laa wer mopo ga, ndar wo gog wããre, hig wo jiili ɓaara go graŋ graŋ, ko wo de coo jar gà lay.

³² Bà mbe de maga á wo mbaara go de ko cwãy wããre mani Baan ga jar ma joŋ re ma doosen wo nono, á mo id ra go mo ɓuy no, de sen ɓuy saara mbe de seege pel joŋ re sen wo, daŋge ɓuy, fer wo togoɗ jar joŋ re sen wo yaw.