OSE 9 - Tupuri Bible

Fẽẽre jar mani Baan leʼ wo jag go ɓuy

¹ Israyel, fruy wa Taa go de fruygi doo sir ma lan wo no wa Doo ga ndo maŋ blam fruygi, tob Baa ɓon go Doo ga ndo hay dage diŋ poɗge ma de demge, Ti yaage coore ble wo!

² Ama yaagen wo de ngel hãã tlalum Kãã ge wo ma wùu rage gà. Day yii ma defayn mbuɗ gi ra doo

³ Á lag ge wo ɓi sir mani Manwurn ni gà Efrayim fer ge Ejipte, Day á re ge wo fẽẽre ma de demge wo go Asiri

⁴ Á joŋ ge wo siigi jag ne Manwur de yii gà Siigi jag ɓaaran coo ge jag ɓe gà Á joŋ ge see ɓaara doo hoole húulí nono Jar maga reen ge wo mo ɓuy joŋ ge wo go de demge Ama hoole ɓaaran joŋ ge diŋ ma jag ɓaara, Á kal ge ɓi tiŋ mani Manwurn gà.

⁵ Nday joŋ ge wur few ma kluurin wo joŋge la, Wur few mani Manwurn ɓa?

⁶ Werga koɗa, á wo de rawge doo maga ngeln gfaf go mono Ejipte yãã ge waare ɓaara, Mof hã ge ngel ma joŋ tipaale yaŋ ne hara. Daswa yãã ge solay ɓaara ma de wooren wo no Day hõõre tĩĩ gi wo go ɓil mburyug ɓaaran wo no.

⁷ Á wo le de age wur bon no Á wo de seege, wur poɗge no Israyel konn ge yaŋ de see ɓe! Je ndar nen wããren loɗge go, Je maga de Nenterse tin lir go Sen diŋ wer joŋre ɓo ma kluu maga Bay ti ngel ɓe wa, wo de hun ma kluu no.

⁸ Efrayim diŋ je gor ngel maga de giŋ Baa ɓi no, Je ndar nen wããre no... Rew ma bag weere dweere Go de cirgi ti faage ma ɓen ɓuy. Caage hee yaŋ liŋ ni Baa ɓe no,

⁹ Á wo go de wumgi nen joŋre ma de glubgi no Doo maga ti wur ma Gibeyan wo mono, Manwur fer ge yaŋ ɗiggi ti joŋre ɓaara Maga bay ni naŋ wa mono, Á yam ge ra yaŋ le wer ɓlagge ɓaaran wo no.

À mbuɗ sõõre Waŋkluu

¹⁰ Ndi hay daʼ Israyel doo leʼge tlalum ma ti puuli nono Ndi hay hay ko pããre ɓay wo doo leʼge Koo figiye ma taŋgun wo nono, Ama, á raw wo see Baal-Pewor Á men wo see ɓaara go ne sõõre ma horge see wo Day á kol wo go horge see Doo mo maga saara dan debaŋ nono.

¹¹ Efrayim? Togoɗge ɓen ur gi yaŋ doo wedwee nono Biŋgi bay wa so, Maŋge ɓiili bay wa so Ɓiili bay wa so

¹² De maga á gẽɗ wo weere we no, Ndi car ge nen ɓaara go see ɓaara taŋgu maga á joŋ wo jar kluuri go Ge mo lay no, gaali ti ɓaara lay, de maga Ndi ɗee ge we go see ɓaara mono.

¹³ Efrayim, de maga ndi ko nen we wo nen Tir no, á de Peɗge doo ngel koɗge ma gluf gluf nono. Ama Efrayim go patala diŋ ma woge de weere Ɓen wo ne je ma id rage go.

¹⁴ Han ne hara, O Manwuri!... Ndo hã ge ne hara diŋ may la?... Hã ɓiili maga cwaɗ go ne hara De jag wããre maga bay law pãã wa.

¹⁵ Blagge ɓaaran naa nen le go Gilgale Ndi caa hee de ɓaara nà diŋ ni. Wer joŋre ɓaara ma de ɓlagge no Ndi nii gi ra go liŋ ni ɓi. Ndi baa ge wùu da rage gà. Waŋre ɓaaran ɓuy wo diŋ baŋdi.

¹⁶ Efrayim go de baa doo see Kããge ɓe go de kolge de hege Á joŋ ge wo de leʼge ti gà so Day hayga á joŋ wo we de weere no, Ndi joŋ ge nen taw weere ma dage maga laa wo Le go ɓil ɓaara yaŋ wo go, Weere ɓaara maga á da wo ra mono.

¹⁷ Baa ɓin srog ge ra wo go Diŋ wer maga á coʼ wo sug ɓe gà Day á joŋ ge wo diŋ jar ɗee go ti holaŋ sir wo ga tiʼ i.