OSE 7 - Tupuri Bible

Gujug gujug maga go tiʼ ɓuy de gaali maga le de seege

¹ De maga ndi hay daga ndi pẽẽ Israyel go mono, Joŋre mani naŋ ga mani Efrayimn wo de joŋre ma de ɓlagge Mani Samarin joŋ wo nen ndar nen go. Werga á joŋ wo ti faage ɓe gà. Je freŋ joŋ nen nduugi, Ngaɓa ɓaaran joŋ nen maʼge go siigi buɗul

² Á hay bay wo wããge jag jiili ɓaara ga Ndi fer ge yaŋ ɗiggi ti ɓlagge saaran wa. Patala joŋre ɓaaran de cir ti ɓaara so, á wo pel ɓi.

³ Á fruy wo ɓil waŋ de joŋre ɓaara ma de ɓlagge no, Fruy wo ɓil waŋre wo de joŋre cugcugla ɓaara no.

⁴ Á wo ɓuy diŋ jar figliw, De maŋ ngel maga je jiɗ hoole pẽẽ jiin go mono. Á men yaɗ wùu ni go, Tĩĩ wer de maga á waŋ nen coon go mono Hãã de maga á wo go urgi mono.

⁵ Ti wur mani waŋ naan mono, Waŋren kol wo see ɓaara go de cegè, Wo go de leʼ wùu kwiŋ doo yii Waŋ kal yiŋ doo de jar feg ti jar wo no,

⁶ Á kal wo yaʼ see ɓaara le ɓiŋ ɓe Jiili go de taa wùu doo ngel jiɗ hoole pẽẽ nono De suŋ mokay no, jiili ma de wùun leʼ naa Ama de jag toŋ mokay no, se fer doʼ wùu ngil tigriŋ

⁷ Á wo go ɓuy de leʼ wùu kwiŋ doo ngel jiɗ hoole pẽẽ nono. Á lig wo jar car kiida ɓaaran wo go Waŋre ɓaaran leɗ wo ɓuy Maapo bay ɗe ɗúu ɓi yoo ɓaara wa ɓuy

⁸ Efrayim tay go yoo ngaɓan wo no Efrayim kol go doo gato maga à hay ngiɗn gà nono

⁹ Jar waare taw wo egre ɓe go Day se bay koge doo ɓe wa. Tããbe de baage ɓe Day se bay koge doo ɓe wa

¹⁰ Maŋge ti ciŋ ma Israyeln go de ma joŋ sedewa ti ɓe Á bay wo ferge le ɓiŋ Manwuri, Baa ɓaaran wa, Day mbe de sen mo deŋ ɓuy no, á bay kiɗgi ɓe wa

¹¹ Efrayim kol go doo kurgudu maga loɗ go nono, Ga ti ɓe bay wa nono. Á hay ɓoʼ ɗúu ne Ejipte Á hay raw wo Asiri.

¹² De maga á de rawge mono, Ndi cir bày ɓin ne hara ti, Ndi trom ra doo weere dweere ma ciŋ wo nono. Ndi joŋ bon ɓaara doo maga ndi hay de wii Rage ti tayge ɓaaran nono.

¹³ Gaali ti ɓaara diŋ wer maga á ɗee wo go see ɓi hãã mono! Ɓlagge go de leʼge ti ɓaara, diŋ wer maga á hay joŋ wo Ɓlagge ma de hãã wo see ɓi! Paga ndi hay de dage ga á mo hay wo go ti see ɓaara Á car wo geteʼ me see debaŋ

¹⁴ Á bay wo ɗe mege jiili ɓaara wa, Ama á ndum wo diŋ ti ngel súuli ɓaara Á tay wo ti diŋ ga saara mo daʼ coore Ble wo de yii ma defay. Day á ɗee wo go see ɓi hãã.

¹⁵ Hay had ra diŋ ndi Ndi hay coɓ doo ɓaara Day á ɗig wo ɓlagge see ɓi

¹⁶ á fer wo le, ama bay see ɓi wa Á wo doo toŋwaa maga go kar nono Waŋre ɓaaran leɗge wo go jag jaw Diŋ wer jag ɓaara ma de hege no Day à feg ge yaŋ ti ɓaara wo Ejipte.