OSE 6 - Tupuri Bible

¹ Á we le, naa fer we see Manwuri! Werga á crag mbe naa go ane, day á pẽẽ naa yaŋ go Á ɓum mbe naa ane, day á saɗ wããge naa yaŋ

² Á fer ge naa yaŋ tenen ti naw ɓoge Wur naw ma de swaʼn mokay á hoo naa yaŋ go ciŋ, Day naa joŋ ge yaŋ tenen pel ɓe sugi

³ Naa ko we, ni naa kiɗ we faage ma koge ɓe Nduugi ɓen go diŋ fen ma tinoo doo ngel teege nono. Á nduu gi see naa doo bii nono, Doo baa rage maga nduu rage de ancoo ti sir nono.

⁴ Ndi joŋ ge ndo nà joŋge la Efrayim? Ndi joŋ ge ndo nà joŋge la Juda? Seele wer jag liŋgi ɓayn doo swaare ma de jag toŋ nono, Doo meebe ma de jag toŋ maga dwas ge go nono

⁵ Diŋ wursen so ga ndi ɓum ra de jar ndar nen wããre ma jag Baa wo, Ndi id ra go de wããre ma jag ɓi Kiida ɓin joŋ ge wo yaŋ go poɗag doo ngel ceg nono.

⁶ Werga ti ɓi diŋ sãy maga nday mo see wer jag liŋgi, Bay diŋ sãy siɗgi jag wo wa. Koge maga nday mo hay de ko Baa nen ɓi de el dedaŋ Siɗgi jag maga à roɗ mo ɓen go ɓuy mono.

Fẽẽre ma horgese wo Israyele

⁷ Ma ɓaara, doo Adam nono, á cegaɗ wo go ti tayge jag no. Á caa wo hee de ɓi diŋ mo taʼ lam no.

⁸ Galaad diŋ ɓi leege ma jar joŋ hãyhãy wo, Maga de laa gǔu ma kaa cíi go.

⁹ Doo baŋdi maga wo de beg jobo nono Ngaɓa jar siɗ jagn ngaɗ wo jar ti faage ma Sikem. Sen mokay diŋ fen horge see

¹⁰ Liŋ ni Israyel mono, Ndi yaŋ de ko fẽẽre horge see wo ni Efrayim joŋ figliw nà diŋ ni Ga Israyel go de dem see ɓe mono.

¹¹ Ma ɓo mo lay no, wur weege ɓo go de gragge lay De maga ndi ferge jar ɓi ma de hooge ti daŋgayn wo we le no.