OSE 14 - Tupuri Bible

Jar ndar gogn pẽẽ wo go

¹ À joŋ ge Samari diŋ doo je joŋ re Diŋ wer maga á giŋ Baa ɓe no Á leɗ ge wo yaŋ go jag jaw À ndreɗ weere ɓaara ma kleere wo go, Day à cerag ge ɓil naare ɓaara ma de ɓiili wo yaŋ go.

² Israyele, fer le see Manwuri, Baa ɓo no Werga maʼ ɓaale diŋ joŋre ɓo maga bay ni naŋ wa mono

³ Hoo we wããre ma cooge tigriŋ le doo ɓay Day ni nday fer we le see Manwuri. Wii we ne ga : Fug ɓil go ne wùr ti joŋre Wùr maga bay wo ni naŋ wa mo ɓuy no, Day ni ndo yãã mbo wùr de ele. Hay nen maga wùr de ngaɗ deere ne ndo, Wùr hã ge yaŋ mo diŋ togoɗge ma jag wùri.

⁴ Je Asyrin yãã ge wùr ge go gà Wùr ɗii gi piiri gà Day wùr wãã ge ne fẽẽre maga wùr joŋ ra de doo wùr ga : Ndo diŋ Baa wùr gà! Werga ti jeŋ ɓo mono, je holgen ko decoo gà.

⁵ Ndi pẽẽ ge ra yaŋ go jag ndarge gog ɓaara no Ndi da ge ra yaŋ de dage maga go sog boŋ Wer ɓil de waŋ ɓin bay ti ɓaara wa so

⁶ Ndi joŋ ge yaŋ ti Israyel doo meebe nono Á fuɗ gi yaŋ doo saŋgu nono Á laa ge cẽw yaŋ doo yoo koo ma Libaŋ nono

⁷ Sug ɓe giŋ gi yaŋ go Á joŋ ge yaŋ de woore doo koo Olifiye nono Day fõõ ge yaŋ doo yoo koo ma Libaŋ nono.

⁸ Á fer ge wo yaŋ le, Jar maga wo de lagge nen cee ɓe mono Á fer ge wo yaŋ jee coore ble Day á fuɗ gi wo yaŋ doo pay tlalum nono Ɗúu ɓaara raage yaŋ doo yii ma Libaŋ nono

⁹ Mayse tay Efrayim de sõõre wo pala? Ndi coʼ ge sug ɓe yaŋ, ndi maŋ ge blam ɓe yaŋ de kaŋ nen ne hẽn ti. Ndi joŋ ge yaŋ doo koo Sipre ma de goɗ sug nono Leʼge ɓon a le diŋ see ɓi.

¹⁰ Daga je maga yaŋ de ko re no Mo hay de ti ngel see fẽẽre sen wo no! Daga je maga yaŋ de ti ngel no, mo laa wer ɓaara! Werga faage mani Manwurn wo de deele Jar ma de deelen seege wo yaŋ ni Ama jar joŋ ɓlaggen leɗ ge wo ni lay.