OSE 13 - Tupuri Bible

Wããre Húulí jar maga giŋ wo Baa mono

¹ De maga Efrayim hay mokay á wãã wããre mono á joŋ hẽẽne Á hay diŋ je ma pel Israyele Ama á kol see ɓe go de ɓlagge wer wããre goŋge Baal Day á daʼ húulí

² Patala no, á wo mbaara jag joŋ ɓlaggen ɗa Á kneʼ wo fodo boo ma de yorge jag ɓaara de solay ɓaara no. Joŋ wo sõõre maga ɗign diŋ saara Á wo ɓuy joŋ ra diŋ jar ma de ko joŋ fẽẽre sen wo À wãã ti ɓaara ga : Jar maga joŋ wo siɗ jag de jag de jar téebeere mono Joŋ wo mbaara nen leʼ monɗra ne weere deere wo pa.

³ Diŋ wersen á joŋge wo doo swaare ma de jag toŋ nono, Doo meebe maga leʼ de jag toŋ day dwas go nono Doo fíi maga beɗem beɗem maga pud go ti yaage nono Doo cug maga ndar go ti tiŋ nono.

⁴ Day ma ɓin ndi diŋ Manwuri, Baa ɓon Le hãã Ejipte Ndo bay de ko Baa ma tigriŋ dedaŋ mege wa Day je yãã jar gon diŋ ndi tawa.

⁵ Je maga hay de ko moge le ti puuli diŋ ndi Ɓi sir maga go de heege pasgeɗage

⁶ De maga á wo wo daʼ ngel maga hõõ de laage ni Gelifgelif so mono, saara taa go, Saara wuɗ go Day saara kol far ti see ɓaara ciŋ Diŋ wersen so ga ti ɓaara yõõ go ti ɓi mono.

⁷ Ndi joŋ ge yaŋ see ɓaara doo mingir nono Doo Bel maga de laa gǔu ti faage nono Ndi maŋ ge blam ɓaara yaŋ de kaŋ nen ne hara ti taʼa.

⁸ Ndi yiŋ gi ra yaŋ doo này Urs maga à hoo weere ɓe go nono. Ndi naa ge hõõge yaŋ go ne jiili ɓaara ti Day ti ngel sen ndi lig gi ra go doo man mingir nono Này ma mbásga geɗebge wo nen ɓaara go.

⁹ Israyel à ɓlag mo go mo hãʼ so no. Wose nduu gi kay ndo so la? Wer maga ndo hay giŋ ndi

¹⁰ Waŋ ɓon gen sola? Á mo yãã mo go ɓi leege ɓon wo ɓuy so Jar car kiida ɓo maga ndo hay wããge ti ɓaara ga : Hã waŋ ne ndi de waŋre ɓaara wo wer ni mo ɓa?

¹¹ Ndi hay hã waŋ ne ndo de maga ɓil ɓi hay de waŋ mono Day ndi baan ge le go diŋ de maga ndi de baa põõ mono.

¹² Ndi de ɗaw joŋre mani naŋ gà mani Efrayimn kay Ɓlagge ɓen de ɓoʼge ciŋ tiʼ i

¹³ Ceege maga joŋ wãy maga leʼ biŋgi mono leʼ ge yaŋ ne hẽn ti. Á diŋ mbarga maga koge re ɓe meʼ koɗe Maga ti wur maga à de mo yaw no, Se day le go kalge ɓil man ɓe gà

¹⁴ Ndi yãã ge ra yaŋ go jag ngel mani jar ɓi tuu wo Ndi coo ge ra yaŋ le doo húulí O húulí fẽẽre durgi ɓon genla? Ngel mani jar ɓi tuu wo, tawge jar ɓon go gene? Koge decoo bay nen ɓi wa!

¹⁵ Efrayim hay diŋ ngel ma de rumgi ti holaŋ hẽẽre ɓen wo. Leege ma nen wer nduu gi yaŋ Ɓodge egre Manwur ur le ti puuli á hig gi blam bii ɓen yaŋ go Og ge gloŋ ɓen yaŋ go À ɓlag ge ngel lag horog ɓe ma de wooren yaŋ go.