OSE 12 - Tupuri Bible

Jar po maga wo jag mbuɗ foo Baa hãã le ti tĩĩgi were

¹ Efrayim cir ti ɓi go de joŋre ma cugucugu Day tiŋ mani Israyeln cir ti ɓi go de joŋre bagge bii jar lay. Juda yaŋ mbe seege wer Baa ɗa Á yaŋ mbe seege bay ndar gog wer Baa ma bay ɗagn ɗa

² Efrayim re diŋ leege Day maŋ diŋ blam leege ma nen were Nen naw tum á car diŋ geteʼe, day frum fẽẽre Á joŋ tayge jag de Asiri Day à raw de noo Ejipte.

³ Manwur patala ti kiida de Juda Day á yiŋ gi Jakob yaŋ diŋ see seele ɓe Á joŋ ge nen poɗge ɓe diŋ wer joŋre ɓe

⁴ Le ɓil man ɓe, Jakob ɗaw hẽn ɓen ti diŋriŋ ɓaale

⁵ Day ti wur maga á kol go de ko re mono, Á kal leʼ degũ de Baa Á leʼ degũ de je peele Baa, day kal naa blum Jakob kal rage, kal wii ɓil de el ɓe no, Jakob hay daʼn Betel Day diŋ ti ngel sen ni ga Baa fer wããre ne naa.

⁶ Manwur diŋ Baa pan tway Manwuri : À fer ɗiggi ɓe nà diŋ doosen nono.

⁷ Day ma ɓon ndo fer ge yaŋ le see Baa ɓo no Ɗaw jag liŋgin wo de joŋre ma de deele no Hay mbo de kaŋ ɗiggi tum ti Baa ɓo no.

⁸ Kanaan de kelew ma ngaɓ fẽẽre ma de ɓlagge doo Á da joŋ coo jare.

⁹ Efrayim kal nà ga : Ti cwãy ɓen mono, ndi daʼ horog ɓi Ndi joŋ nen daɗ fẽẽre ɓi de see ɓi Ama, á ɓuy tuu diŋ mo maga ndi daʼn de joŋre ɓi À daʼ ge mopo ni ɓi maga bay ngare, Day se diŋ ɓlagge mono bay wa,

¹⁰ Day ma ɓin, ndi diŋ Manwuri, Baa ɓo no, Le hãã Ejipte tuu. Ndi joŋ ge yaŋ nen hay moge de tiŋ wer mburyug wo tigriŋ Doo ma ti wur maga nday joŋ few ma kluuri wo nono.

¹¹ Ndi hay fer wããre ne jar ndar nen wããre ma jag Baan wo, Ndi hay dus ndarge nen wããre wo Day jag jar ndar nen wããre ma jag Baan wo Ndi hay ngaɓ wããre ma de jag jõõ wo go.

¹² Hayga joŋre Galaad yaŋ diŋ joŋre Maga bay ti faage ɓe wa no, Ti cwãy ɓen á joŋ ge wo diŋ jar ma de koɗ koɗe Á joŋ wo siigi jag de bloore deere wo Gilgale. Doo kay nono ngel siɗ jag ɓaaran joŋ ge Doo húulìn ma de jagge ti kããra wo, Ti blam ngel ma de paɗge ɓil pay wo.

¹³ Jakob daŋ de ɗee ti mbásga ma Aram wo Israyel joŋ peele diŋ ti wãy boŋ Day ti wãy boŋ, á koɗ horog wo.

¹⁴ Diŋ de je ndar nen wããre go Ga Manwur cegaɗ jar Israyel wo le go Ejipte Day diŋ de je ndar nen wããre go Ga jar Israyel joŋ wo de ɗawge kay

¹⁵ Efrayim car jiili Manwur go de hãã debaŋ Waŋkluu ɓen ɓoʼ ge ɓlagge ɓe ma de hããn yaŋ ne hẽn ti Á ɓoʼ ge wããre mbuɗgi foo ɓen yaŋ ne hẽn ti.