OSE 10 - Tupuri Bible

Joŋre tosge Baan leʼ wo jag go de joŋre waŋ no

¹ Israyel hay diŋ tlalum maga lir doo go, á hay leʼge. De maga leʼge ɓen joŋ ngaɓa mono, Se kal dus ngel siɗ jag wo ngaɓa lay De maga sir ɓaaran hay de woore mono Se kal lag lar húulìn ma de jagge ti kẽẽn wo lay.

² Jiili ɓaara go de dawge Á soɗ ge wo mbaara põõre ɓlagge ɓaaran yaŋ Manwur srog ge ngel siɗ jag ɓaaran wo yaŋ go Mbug gi húulì ɓaara ma de jagge ti kẽẽn wo yaŋ go.

³ Day patala saara wãã wo so ga : Waŋ wùr bay wa, Werga naa joŋ hẽẽne doo Manwur gà Day waŋn so mokay no, á de hay kay naa ti mayse ni la?

⁴ Nen wããre maga á wãɗ wo mono Day kal wo haɗ haɗge ma bay ngar ni, Kal wo joŋ tayge jage. Doo kay no mono, kiida joŋ ge yaŋ nen jorge le ni Doo koo maga de nee-waa jage, Jor ɓil pay ma de paɗge wo nono.

⁵ Jar ma ɓi leege Samari hã wo togoɗge Ne wedày boo biŋni ma Bet-Aven no, Jarn ra wo ti sõõ doo húulì nono Day jar siɗ jag maga wo ti peele ne hẽn mono taɗ ge wo yaŋ wer ɓe, Ti togoɗge ɓe maga de rawge yoo ɓaara mono.

⁶ À hãn ge go ne Asiri, Han go kado ne waŋ Yareb Sõõre baa ge Efrayim yaŋ doo Day sõõre joŋ ge Israyel yaŋ ti wããre ɓe maga se wo De ngaɓ rage pel mo deŋ no,

⁷ Ma Samarin sen go de ma joŋge, de waŋ ɓe no, Á joŋ doo defõõre maga caa ciŋ ti bii wo nono.

⁸ Ngel siɗ jag ma de farge ciŋn wo, ma Bet-Afen ti ngel maga Israyel joŋ ɓlagge ni mono, á ɓlag ge ra yaŋ go. Daswa wo de hõõre klewge wo yaŋ go ti ngel siɗ jag ɓaaran wo no. Á wii gi wo húulì ma lablab wo yaŋ ga : Hul we go ne wùr ti!

Israyel we fen maga á hay joʼn mono

⁹ Tĩĩ wer le ti wur ma Gibeyan wo hãã mono, Ndo joŋ ɓlagge Israyele! Á wo de lagge nà diŋ ni, day á coo ge wo gà Patala jar se maga bay wo de deele wa mono, daga dur ra. Durgi sen joŋ ge nen yiŋ rage nà bay Gibeya dera tuu wa pa?

¹⁰ Ndi joŋ ge bon ɓaara doo maga ɓil ɓi da nono Day jar tay ge wo ti ɓaara yaŋ Á kog ge ra yaŋ wer ɓlagge ɓaara ma ɓog wo no.

¹¹ Efrayim hay diŋ maydày tigli ma de deele ndolom Maga da ɓum coore, Ama ndi ɓoʼ jug yaŋ ne hẽn ti soole ɓe ma de woore no Ndi jag ge soole Efrayim, Juda jee ge yaŋ,

¹² Day nday, joŋ we diŋ joŋre ma keɗede We we diŋ ti jag liŋgi ɓe Kraw we mbay pay ma defay Á go patala diŋ wur ma kiɗ Manwuri Hãã go ti wur maga á nduu Day dus joŋre ma keɗedn ne nday

¹³ Nday hay joʼ ɓlagge so lay no We we joŋre ma debay ngar wo lay so. Re we leʼge joŋre cugi nen jar ɓayn so Werga ndo hay de kaŋ ɗiggi ti faage ɓo no, Ti bogawla ma yoo jar ɓon wo no.

¹⁴ Ngarge jag ma gulum gulum naa le yoo jar ɓon wo no Day kor ɓo ma kiŋ kiŋ mbug gi wo yaŋ go Doo maga Salman ɓlag Bet-Arbel go wur durgi nono Ti wur durgi maga á ndreɗ maben go ne weeren wo ti mono.

¹⁵ Mo kay diŋ gaali maga Betel kaŋn ge ne nday see wer Ɓlagge ɓay ma de hãã debaŋ maga nday joŋ ne mono. De maga ngel tee le go no kay tuu mono Waŋ Israyel joŋ ge gà so.