NEHEMI 9 - Tupuri Bible

Jar Jwif hẽẽ wo bii ma wii fuggi ɓili

¹ Nen naw doo ɓog ti naa nen few se ma de renamn mono, jar Israyel kal wo tayge le de lag bugu wo ti de sir ma hẽẽ bii.

² Jar maga sen hay wo ti wer mani Israyel raw wo caa ɓil see ɓaara go de waaren wo ɓuy, day á wo ma wii fuggi ɓil ti ɓlagge ɓaaran wo de debaycõõre mani pããre ɓaaran wo.

³ De maga á wo wo go odge ti deele ti ngel ɓaaran mono, à raw keege ɓil kefder jag liŋgi mani Manwuri, Baa ɓaaran nen ler swaʼa day saara nen ler swaʼ pa, saara wii fuggi ɓil ti ɓlagge ɓaaran wo, leɗ wo monɗra pel Manwuri, Baa ɓaara no.

Jarn tos wo Baa

⁴ Josuwe, Bani, Kadmiyel, Sebaniya, Buni, Serebiya, Bani wo de Kenani raw wo ɗiigi ciŋ ti ngel maga jar Lefid od wo pel jar wãɗ wããre ni mono. Saara ngar jag wo kloŋ ne Manwuri, Baa ɓaara no.

⁵ Josuwe, Kadmiyel, Bani, Hasabniya, Serebiya, Hoddiya, Sebaniya wo de Petahiya jar Lefidn kal wo ga : Pud we go ciŋ, togoɗ we Manwuri, Baa ɓay sagsage. Daga à mo togoɗ ɗúu ɓe ma de togoɗgen maga go ciŋ ti togoɗge wo domge ma honla ɓuy tuu mono!

⁶ Diŋ ndo, ndo boŋ tuu Manwuri, ndo hay joŋ ngel ma ciŋ, ndo hay joŋ ngel ma ciŋ ti ngel ma ciŋ nà diŋ ndo, de fẽẽre maga wo wo ni mo ɓuy no. Ndo hay joŋ tamsir de fẽẽre ma ti ɓen wo, maarog wo de fẽẽre ma nen ɓaaran wo ɓuy. Ndo hã tenen ne fẽẽre sen wo ɓuy day jar durgi ma ciŋ leɗ wo monɗra pel ɓo.

⁷ Diŋ ndo Manwuri, Baa, ndo hay baa Abram, ndo kal le go de ɓe ɓi leege Ur mani jar Kalden wo, day ndo raw kaŋ ɗúu ne hẽn ga Abraham.

⁸ Ndo kal daʼ jiili ɓe de deele pel ɓo, day ndo raw tay jag de ɓe ma hã sir mani jar Kanaan wo, jar Hitidn wo, jar Amoridn wo, jar Feresidn wo, jar Yebusn wo, jar Girgasidn wo go ne wer mani ɓen wo. Ndo raw ooge ti wããre ɓo no, werga ndo keɗede.

⁹ Ndo hay ko re maga hay caa pããre wùr wo le Ejipte mono, day ndo raw laa roo ɓaara ma jag maarog ma de sẽẽ no.

¹⁰ Ndo hay kaŋ fẽẽre kaŋ nen wo de fẽẽre mbuɗgi wo ne Farawoŋ ti, ne weere jõõre ɓen wo de jar sir ɓen wo ɓuy ti wer maga ndo hay go de koge ga á hay joŋ bon ɓaara go bay ngare, day ndo raw ra ɗúu see ɓo doo maga á wara no ɗa mono.

¹¹ Ndo hay caa ɓil maarog go ne hara pele, day saara cegaɗ wo go ɓil maarogn ti ngel de heege. Ama ndo srog jar maga hay maŋ wo blam ɓaara le niigi wo go ɓi tuu ma kuɗum doo húulì maga leʼ go nen bii maga yuu de egre no no.

¹² Ndo hay koɗ rage de ceg de swìl swaare, de suŋ de swìl wùu maga hay go ler ngel ne hara pel ti faage maga á hay wo de maŋge ɓe mono.

¹³ Ndo hay cwaa le ti húulì Sinay, ndo hay wãã wããre le ne hara le ciŋ hãã day ndo raw hã jag liŋgi ma ɓod faage wããre ma de deele wo ne hara, hã jag liŋgi ma cwãyn wo ne hara de wããre ma de yergen wo de jag liŋgi ma de daŋ kããran wo.

¹⁴ Le ciŋ hãã ndo raw kaŋ nen ɓaara ti wur Saba ɓo ma bay ɗag no day ndo kal yer wããre jag liŋgi wo, wããre ma de yergen wo de jag liŋgi ne hara nen doo Moyis, wejõõ ɓe no.

¹⁵ Le ciŋ hãã ndo raw hã hoole ne hara de maga koŋne hay cee ra mono, ndo yuu bii le go nen húulì de maga jwaale hay kaŋ ra mono, day ndo raw riŋ rage ga á mo yãã wo sir maga ndo hay hãʼ go ga ndo hãn ne hara mono.

¹⁶ Ama saara de pããre wùr kal wo ɓaaran far ti see ɓaara ciŋ, deŋ wo gor ɓaara go. Á hay hoo wo sug ti jag liŋgi ɓon wo gà.

¹⁷ Saara day wo yãã jag ɓo gà ɗig wo ti ti fẽẽre ma ngil jar maga ndo hay joŋ ra wer ɓaara mo gà. Saara raw deŋ gor ɓaara go, day wer ti graŋ ɓaaran saara kal baa waŋ pel ɓaara maga saara mo fer jag gebee saara no. Day ndo diŋ Baa maga ndo fug ɓil go ne jar ti, ɓil ɓo de ele day ndo ko decoo jare. Ndo bay sõõ ɓil deparday wa, ndo joŋ ɓil de el ti jar debaŋ day ndo tob ge ra go gà

¹⁸ ko bà de maga á raw wo yor wedày day wãã wo ti ɓe ga : Israyele, mo nà diŋ Baa ɓo maga kal le go de ɓo Ejipte mono, ko bà de maga á joŋ wo ti graŋ go see ɓo has ɓuy, las wo ndo mo ɓuy no.

¹⁹ Wer koge decoo jar ɓo ma kluu no, ndo hay tob ra go ɓil puulin gà swìl swaaren men seele go pel ɓaara ma kaŋ nen ɓaara ti faagen gà lay, swìl wùun men ler ngel go ne hara de suŋ ti faage maga á hay wo de maŋge ɓe mo gà lay.

²⁰ Ndo hay hã Nenterse ɓo ma de el ne hara maga á mo ko wo car ɓil fẽẽren wo go, ndo hay peŋ ra de man ga á mo hee wo jag wa gà day ndo hã bii ne hara ma ii jwaale ɓaara pa.

²¹ Nen kiŋgi doo naa, ndo hay oo ti ɓaara kay rage ɓil puuli, mopo pẽẽ ti ɓaara meʼ gà ɓuy õõbe ɓaaran ngrag wo go gà lay, ɓaale ɓaara hay wuɗ wo gà lay.

²² Ndo hay hã sir waŋre wo go de wer jar wo go ne hara ɓi coo doo maga progre maga wo haagu de ɓaara mo hay wo go ma ɓaara. Á hay yãã wo sir mani Sihon no, diŋ sir mani waŋ Hesbon no, yãã wo sir mani Og waŋ Basan no.

²³ Ndo raw tes weere ɓaara wo doo gér ma ciŋ wo no no, day ndo raw woge de ɓaara ti sir maga ndo hay wãã go ne pããre ɓaara wo ga á wo ge wo yaŋ yããge ɓe mono.

²⁴ Day weeren laa wo ɓi sir no, yãã wo ne. Ndo mbuɗ fuy jar sirn wo go ne hara pele, diŋ jar Kanaan wo, day ndo hã ra go ne hara ɓi coo doo de waŋre ɓaaran wo de jar sirn wo nen maga á mo joŋ wo ra doo ga ɓil ɓaara da nono.

²⁵ Á hay yãɗ wo ɓi leege ma de egre wo de sir maga fẽẽre joŋ wo ni debaŋ, yãɗ wo tiŋ maga wo go de bagge de horog ma de el ma honla wo ɓuy, yãɗ wo gutugri ma de terge wo, payre tlalum wo, koore Olifiye wo de koo maga à re leʼge ɓaara wo debaŋ. Á hay re wo, wuɗ wo go, goɓ wo go raw wo joŋge go ti twore wer ɓil de el ɓo ma debaŋ no.

²⁶ Ama saara raw hooge de ɓo, joŋ wo ti graŋ go see ɓo, mbuɗ wo faale go ne jag liŋgi ɓo no, id wo jar ndar nen wããre ɓo maga hay wo kam rage ga á mo fer wo le see ɓo wo go, day hã see ɓaara ne lasge lasge sag sage.

²⁷ Mo so no ndo raw hã rage go ne jar hee ɓaaran wo doo, saara joŋ bon ɓaara. Ama ti wur reen mono, saara kal rage mo ti, day ndo, ndo raw laa jag ɓaara le ciŋ hãã. Wer ɓil de el ɓo ma kluu no, ndo raw hã jar yãã rage wo ne hara ma yãã rage go doo jar hee ɓaaran wo no.

²⁸ De maga á daʼ wo see ɓaara mokay saara fer tĩĩ wer joŋ ɓlaggen pel ɓo pa. Mo pa no, ndo kal tob rage go ne jar hee ɓaaran wo, saara kol go wãã re ɓaara. Ama saara fer rage mo ti pa, ndo, ndo laa jag ɓaara le ciŋ hãã day wer ɓil de el ɓo ma kluun ndo hay yãã ra we go ɓaale puri.

²⁹ Ndo hay kam ra maga á mo fer wo le ti jag liŋgi ɓo no, ama saara raw far ti see ɓaara ciŋ day wo yãã jag liŋgi ɓon wo gà. Á kal wo joŋ ɓlagge see jag liŋgi ɓo ma ɓod faage wããre ɓo maga hã wo tenen ne je táabay maga joŋ joŋre de ɓaara mono, raw wo far bay ɓaara ciŋ doo ti graŋ, deŋ wo gor ɓaara go day wo yãã jag gà.

³⁰ Ndo hay soɗ ra nen kiŋgi puri, ndo hay bag wããre ne hara de Nenterse ɓon nen doo jar ndar nen wããre ɓon wo, ama saara laa coʼ sug gà. Mo so no ndo raw hã rage go ne jar sir waare wo ɓi coo doo.

³¹ Wer ɓil de el ɓo ma kluu no, ndo hay caa wer ɓaara go gà ndo hay tob ra go gà lay werga ndo diŋ Baa maga ndo joŋ ɓil de el ti jare, day ndo ko decoo jar lay.

³² Patalam no, O Baa wùr no, Baa ma kluu no ma de egre debaŋ ga à joŋ hẽẽne doo ɓo, ndo maga ndo oo ti tayge jage, day ndo joŋ ɓil de el ti jar mono, ko re maga de caa wùri, waŋre wùr wo, minisdir wùrn wo, jar siɗ jag wùrn wo, jar ndar nen wããre Baa go ne wùrn wo, pããre wùr de jar ɓon wo ɓuy hãã le ti wur mani waŋre ma Asirin wo hãã go wara doo fen po ma meʼ no wa.

³³ Ma ɓo ndo go de yogge ti re maga hay á wo ne wùr ti mo ɓuy no werga ndo hay naa nen see ɓo go diŋ je ma de deele day wùr raw joŋge diŋ ɓlagge.

³⁴ Waŋre wùrn wo, minisdir wùrn wo, jar siɗ jag wùrn wo de pããre wùr hay see wo ti jag liŋgi ɓon gà á coʼ wo sug jag liŋgi ɓon wo gà lay, laa ruugi maga ndo hay ruu rage mo gà lay.

³⁵ Ti wur maga á hay wo ti sir ɓaara, go de ngesge de de el ma debaŋ maga ndo hay joŋ see ɓaara ɓil sir ma de diy maga joŋ fẽẽre, sir maga ndo hay hãn go ne hara mono, saara laa joŋ peele ne ndo gà laa wo mbuɗ faale ne joŋre ɓaara ma de ɓlaggen wo gà lay.

³⁶ Wara wùr go gebeere mo lag so no! Wùr go diŋ gebeere ti sir maga ndo hay hãn ne pããre wùr wo maga á mo re wo fẽẽre maga joŋ wo ni de fẽẽre ma de el ma ɓil ɓen wo mo lag so no!

³⁷ Fẽẽre maga joŋ wo ni debaŋ kol wo go diŋ ma waŋre maga ndo hã wùr go ne hara ga á mo wãã wo re wùr mono, sen nà wer ɓlagge wùrn wo. Á wo de ma joŋ hoogesee wùr wo de horog de fũy wùrn wo doo ga ɓil ɓaara da nono, day wùr go nen re ma kluu debaŋ!