NEHEMI 8 - Tupuri Bible

Esdras kee wããre Baa ne jare

¹ Few ma de renamn raw age, jar Israyel hay wo go de lagge ɓi leege ɓaaran wo. Mo so no jarn wo ɓuy raw wo tayge le go see kããra doo jobo boŋ nono ti ngel ma jag faage Biin wo. Saara raw riŋ Esdras je had wããre Baan ga á mo maŋ kefder jag liŋgi mani Moyis maga Manwur hay yern ne Israyel le.

² Esdras je siɗ jagn raw maŋ jag liŋgin le pel ngaɓa maga hay de tayge diŋ werpiiri wo, naare wo de wosela ɓuy maga laa wo wer fen maga se laan de sug ɓe mo ɓuy no. Sen nà ti naw ma taŋgu nen few ma de renam no.

³ Se kal kee kefder le de jag toŋ hãã wo wur de deele ti ngel maga jag faage Biin wo, pel werpiiri wo, naare wo jar maga laa wo wer mopo mono. Jarn wo ɓuy lag wo seɗem coʼ sug keege kefder jag liŋgi no.

⁴ Esdras je had wããre Baan hay go de oole ciŋ ti koo po maga à hay kaŋn ma seno. Matitiya, Sema, Anaya, Uri, Hilkiya wo de Maaseya hay wo de odge ti doo war ɓe, Pedaya, Mikayel, Malkiya, Hasum, Hasbadana, Sakari wo de Mesulam hay wo ti doo gùr ɓe lay.

⁵ Esdras raw bul ɓil kefdern go de nen jarn ɓuy werga á hay go de oole ciŋ hãã de daŋ jarn wo no, day de maga se bul ɓil kefdern go mono, jarn raw hooge go deele ɓuy.

⁶ Esdras raw joŋ suseʼ ne Manwuri, Baa ma kluu no. Jarn wo ɓuy raw yiŋ jag de horge doo ciŋ ga : Amen! Amen! Saara raw laa kõyõgre gesiŋ, raw wo leɗ monɗra pel Manwur de mbuɗ nen gesiŋ.

⁷ Josuwe, Bani, Serebiya, Yamin, Akub, Sabetay, Hodiya, Maaseya, Kelita, Asariya, Yosabad, Hanan, Pelaya wo de jar Lefidn hay wo go naa wer jag liŋgin go ne jarn wo maga á mo laa wo wer ɓe, day jarn raw wo lagge go deele.

⁸ Á hay wo kee kefder jag liŋgi mani Baan go de cragge day saara hay go naa wer ɓe maga jar mo laa wo wer fen maga saara hay kee ne hara mono.

⁹ Nehemi je wãã re prog no, Esdras je siɗ jag ma naa wer wããre Baan wo de jar Lefid maga hay wo had jarn kal wo riŋ jarn wo ɓuy ga : Wur se kaʼn wara diŋ wur maga go sagsag ma Manwuri, Baa ɓay no. Law we wa, ra we wa lay! Sen nà werga jarn wo ɓuy hay ra wo de maga saara laa wããre jag liŋgin wo mono.

¹⁰ Esdras hay riŋ ra ga : See we, wo we re này ma de noo wo, jo we fẽẽre ma bay jiigi wo day hã we te ɓaara ne jar maga ma ɓaara bay wo go de ʼwũygi wa ɗa mono. Werga, wur sen diŋ wur maga go sagsag ma Waŋkluu naa no, law we wa werga fruygi mani Manwurn diŋ egre ɓay no.

¹¹ Jar Lefidn hay wo teŋ nen jarn wo ɓuy ga : Hem we mbay werga wur sen diŋ wur ma sara. Law we wa so!

¹² Jarn wo ɓuy kal wo rawge rege lay, joge lay maga saara mo hã te ɓe ne jar lay, saara mo joŋ fruygi ma kluu lay. Werga, á hay laa wo wer wããre maga à hay naa wer ɓaara ne hara mono.

Jar Jwif joŋ wo few mburyugn wo

¹³ Ti naw ma de ɓogn mono, waŋre ma ti feele ma yoo jarn wo ɓuy, jar siɗ jagn wo de jar Lefid raw wo tayge le see Esdras je had wããre Baan ma lagge seɗem coʼ sug wããre jag liŋgi no.

¹⁴ Saara wo daʼge de yerge ɓil jag liŋgi maga Manwur hay yern nen doo Moyis ga jar Israyel wo nen nage ɓil mburyug ti wur joŋge few ma nen few ma de renam no,

¹⁵ ga á wo nen ʼwad ɓay go ɓi leege ɓaaran wo ɓuy lay, go Jerusalem lay ga : Laa we wo go yoo húulì wo, hrag we sug koo Olifiye le, sug koo Olifiye ma mbásga, sug koo mirte, sug hare wo de sug koore ma kliɓkliɓ wo ma bag mburyug wo doo maga á de yerge nono.

¹⁶ Mo so no jarn raw wo laage go, kal wo hragge ɓe le. Saara raw wo bag mburyug wo, wosela ɓuy ciŋ ti tiŋ ɓe ma de lawge, jar po wo feele ɓaara wo, ɓil feele tiŋ mani Baa no, ti ngel ma jag faage Biin wo, ti ngel ma jag tiŋ mani Efrayim no.

¹⁷ Ngaɓa jar maga hay wo le ti daŋgay day fer wo le mo ɓuy raw wo bag mburyug wo, saara lag go ɓil mburyug wo. Tĩĩ le ti kal mani Josuwe je ni Nun hãã a go ti wur sen mono, jar Israyel joŋ wo te mo ma doosen no kay gà fruygi joŋ debaŋ debaŋ ti wur sen ni.

¹⁸ À hay keege ɓil kefder jag liŋgi mani Baan nen naw tum, tĩĩ le ti naw ma taŋgun hãã wo go ti naw ma blam no. Á raw joŋ few nen naw renam day à kal joŋ tayge ma kluu ti naw ma de nenmaʼn doo maga á joŋn tum nono.