NEHEMI 6 - Tupuri Bible

Jar hee naa wo nen pa

¹ Saŋbalade, Tobiya, Gesem je Arabn wo de jar hee wùr ma lan raw wo laage ga ndi boo kor ma ti ɓi leegen we go, day ndugla po bay ti ɓe wa so hase. De sen ni ndi hay bay de her jag tiŋn wo ni wa ɗa.

² Mo so no, Saŋbalad wo de Gesem raw wo ɓoʼ jobo le riŋ mege gana : Á le, naa wo go ndalge Kefrim ɓil log ma Ono no. Saara hay ɗig ga saara mo joŋ me de ɓlagge.

³ Ndi raw fer wããre wo ne hara jag jar soolen wo gana : Joŋre kluu doo ɓi ma joŋge, ndi kãã ma woge gà. Joŋge joŋge ga joŋren oo ge wer maga ndi menn go day ndi raw wo go see ɓay la?

⁴ Saara dog soole se boŋn le ne ndi ɓaale naa, day ndi fer mbi wo ne hara tum diŋ yiŋgi jag se boŋn lay.

⁵ Saŋbalad fer dog soole sen le ne ndi ma de dwee pa, se ɓoʼ le diŋ wejõõ ɓen de leeder ma de bul jag doo kay.

⁶ Á hay de yerge ɓil ɓe ga : Wããre go de raŋge yoo wer jar wo, day Gasmu wãã lay ga nday de jar Jwif nday de ɗiggi ga nday mo joŋ ti graŋ go, day wersen so ga ndo fer boo korn mono. Á de wãɗge ga ndo kol ge waŋ ɓaara,

⁷ ga ndo de see ɓo, ndo go de lag jar ndar nen wããre Baa go lag Jerusalem maga á mo ʼwaa wo ɓay go ne jar ti ɓo ga waŋ yaŋ ti sir Juda. Patala wããre sen nà wo ge daʼ waŋ, a le ni naa ɓoʼ ma naa go ti kẽẽ.

⁸ Ndi kal ferge wo ne hẽn gana : Wããre se ga ndo wãã ra mo hãʼ à bay wãã rage wa, á diŋ fen maga ndo caan jag ɓo caage!

⁹ Jar maga hay da wo mo ɓuy ga saara caa hẽẽne wùr go hay wo wãɗge gana : À woo wo mbaara doo yaŋ go, day joŋre joŋ ge gà. Patalam no, Baa ɓi no, hãã egre ne ndi!

¹⁰ Ndi raw woge ni Semaeya je ni Delaya, je ni Mehetabeel no. Se raw yoŋge, day ga : Naa see de kããra wo go ɓil tiŋ mani Baan ti gisiɗgi ɓe ɓedew day ni nà tẽg jag tiŋ Baan wo ti naa. Werga jar hee wo le de age ma ʼwar ndo go, day á a ge wo nà de suŋ ma ii ndo go.

¹¹ Ndi raw ferge gana : Je twar doo ndi nono daŋ de ɗee! Wose sen doo ndi nono ga kal ɓil tiŋ Baa day joŋ ge tenen pa nà diŋ wo so la? Ndi kal ge ni gà.

¹² Ndi raw koge ɓe go ga hay ɓoʼn le nà diŋ Baa gà ama á hay wãã wããre doo kayn no nà werga Saŋbalad wo de Tobiya hay hã wo mopo ne hẽne.

¹³ De maga saara hã mopo ne hẽn doo kay no mono, saara hay de kaŋ ɗiggi ɓaara taʼ ga ndi yãã jag ɓe yaŋ, ndi joŋ ɓlagge yaŋ ni doo kay nono, saara ɓoʼ riŋ ɓi go siigi de ɓlagge ma ɓoʼ foo ɓi go.

¹⁴ O Baa ɓi no, ko Tobiya, Saŋbalad wo de joŋre ɓaaran wo, ko Nawdiya, wãy ma ndar nen wããre Baa gon lay, de te jar ndar nen wããre Baa go ma lan ga kiɗ wo caa hẽẽne ɓi go mono.

¹⁵ Korn ɓoʼ jag go ti naw doo dwee ti ɓog nen naw doo ɓog ti dwee nen few Eluli.

¹⁶ De maga jar hee wùrn wo ɓuy laan wo mono, jar dehãy ma ti wùr karan caa wo hẽẽne go, sõõre joŋ ra go pel wùri, day saara raw koge de ti ngel ɓaara ga joŋren ɓoʼ jag diŋ wer dage Baa wùr no.

¹⁷ Ti wur sen wo ni mo lay no, jar kluuri ma ti sir Juda po hay wo yer leeder wo ne Tobiya ceɓ lay, day leeder Tobiya hay wo daɗ rage ceɓ lay.

¹⁸ Werga jar debaŋ ti sir Juda hay tay wo go de ɓe de haʼge haʼge, werga Sekaniya je ni Aran hay de da may ɓe day wel ɓe Yohanan hay de da may mani Mesulam je ni Berekiyan lay.

¹⁹ Á hay wo keege ɓe draʼ pel ɓi day fer wo wo de wããre ma jag ɓi ne hẽne. Tobiya hay ɓod leeder le ma caa hẽẽne ɓi go.