NEHEMI 5 - Tupuri Bible

Jar Jwif ngrum wo jage, Nehemi ʼwũy re seno

¹ Jar po ma yoo jar Jwifn wo de naare ɓaara raw wo ngrum jag debaŋ ti hẽẽre ɓaara jar Jwifn wo.

² Ma la wo ga : Wùri, weere wùr wo de mayre wùr wo, wùr ngaɓa, wùr de sãy coore ble ti ma rege nen maga wùr mo hay tenen tiʼ i.

³ Ma lan wo ga : Wùr kaŋ payre wùr wo go de payre tlalum wùrn wo de tiŋri wùrn wo ma daʼ coore ble nen ngel koŋne no.

⁴ Ma tigriŋ wo pa ga : Wùr hay yãɗ solay go ti payre wùrn wo de payre tlalum wùrn wo maapoɗ lombo mani waŋ no.

⁵ Hõõgese wùr mbe nà doo hõõgese hẽẽre wùrn wo no lay, weere wùr wo mbaara nà doo weere ɓaaran wo no lay, day koɗa, wùr hã weere wùr wo de mayre wùr wo go ma joŋ gebeere, mayre wùr wo debaŋ wo go jag ɓe yaw, doo wùr wo go ploʼ ploʼo, day payre wùrn wo de payre tlalum wùrn kol wo go diŋ ma jar tigriŋ wo.

⁶ De maga ndi laa ngrumgi jag sen wo de wããre se kayn wo mono, ɓil ɓi raw sõõge debaŋ.

⁷ Ndi raw bag jag ɓe le go ɓil ɓi ga ndi mo ruu jar kluurin wo de jar car kiidan wo, day ndi kal riŋ rage ga : Mayse! Nday taɗ fẽẽre ne hẽẽre ɓayn wo de bii mo gà! Ndi raw ɗe tayge ti ma kluu ti re ɓaara.

⁸ Ndi day riŋ ra ga : Naa hay fer le cor hẽẽre naa jar Jwif maga à hay yeɗ ra wo go ni jar dehãy wo, egre naa hoo hooge, day nday de see ɓay tuu nday yeɗ hẽẽre ɓayn wo go, day à yee ra mbe go nà diŋ ne naa tuu lay! Saara kal ferge go baʼa, ngar maga saara mo fer ni no kay bay nen ɓaara wa hase.

⁹ Blam ɓe ndi kal ga : Fen maga nday de joŋge ɓe bay ti ngel ɓe wa. Nday hay bay maga nday joŋ hẽẽne doo Baa nen maga jar dehãy maga wo diŋ jar hee naa mo mbuɗ wo fuy naa wa gà yawla?

¹⁰ Ndi de see ɓi, hẽẽre ɓin wo de weere jõõre ɓin wo, wùr hay taɗ solay wo de coore ble wo we ne hara lay. Naa men ɓèere sen go ne hara ti so!

¹¹ Wara, naa fer payre ɓaaran wo, payre tlalum ɓaaran wo, koore olifiye ɓaaran wo de tiŋ ɓaaran wo ne hara, naa men go ne hara see suŋgu no, see coore ble no, see yiin wo de noo maga naa hay taɗ ne hara mo lay.

¹² Saara raw ferge ga : Wùr fer ra yaŋ ne hara day wùr wii gi mopo doo ɓaara gà hase. Wùr joŋ ge mbe fen maga ndo wããn yaŋ mbe. Mo so no ndi raw ɗe jar siɗ jagn wo le, ndi raw joŋge ga jar kluurin wo de jar car kiidan mo haʼ wo go pel ɓaara ga saara lag yaŋ ti wããre no.

¹³ Ndi raw gejag jiba õõbe ɓi ma kluun go, ndi day gana : Daga Baa mo gejag je maga oo ge we ti wããren gà wo go faale tiŋ de horog ɓen wo ɓuy, day je sen la mo hay go de gefafge, mo hay go doo ploʼ ploʼo! Ngaɓan ɓuy kal wo ga : Amen. Saara raw togoɗ Manwuri. Jarn kal wo lagge ti wããre no.

¹⁴ Ti wur sen ni waŋ raw hay ndi go diŋ je wãã re prog ma ti sir Juda no, tĩĩ le nen kiŋgi ma de doo ɓogn hãã wo go nen kiŋgi ma de doo swaʼ ti ɓog maga waŋ Artagserses de ma joŋ waŋ mono, nen kiŋgi hwal ti ɓoge, ko ndi, ko hẽẽre ɓen wo, wùr hay kaŋ nen wùr ti mo maga je wãã re progn hay nen yããge ɓe mo gà.

¹⁵ Go taŋgu ɓi mono, jar wãã re prog ma taŋgun hay wo gay jarn wo, hay wo yãɗ hoole wo de yii doo ɓaara ciŋ ti solay boo ma doo naan ni pa, weere jõõre ɓaaran wo draʼ hay wo go waŋ ti jar lay. Ndi hay bay joŋge doosen no wa, doo hẽẽne Baa.

¹⁶ De daŋ sen pa yaw mono, ndi joŋ joŋre ti ʼwũygi kor no, wùr yee pay jobo gà lay weere jõõre ɓi ma jõõren wo ɓuy tay wo le go day lag wo jag joŋre lay.

¹⁷ Jar hay rege pel ɓi kis ti ɓe doo dwee, diŋ jar Jwif wo de jar car kiidan wo, ndi bay de kee jar maga hay wo le age ti wer jar maga wo ti wùr mo karan wo ni gà.

¹⁸ À hay ngaʼ day boŋ, sããre ma tinoo wo hiiraʼ de weere dweere wo tum nen naw yoo horog mani ɓin wo. Ti naw hwal hwal tum à hay go yuu yii go debaŋ ti ngel ɓe doo maga à hay de sãy ɓe no tuu no. Bà de sen ɓuy ndi hay bay wii nen fẽẽre maga hay diŋ ma je wãã re progn wa werga joŋren hay põõ jarn wo debaŋ.

¹⁹ Ɗig ti ti ɓi de ele O Baa ɓi no, wer fen maga ndi joŋn mo ɓuy see wer jar sen wo mono!