NEHEMI 4 - Tupuri Bible

¹ Jarn raw wo kaŋ ɗiggi ɓaara ti joŋre no. Ama Saŋbalade, Tobiya, jar Arab wo, jar Amoŋ wo de jar Asdod raw wo sõõ ɓil debaŋ de maga saara laa ga joŋre booge kor ma ti Jerusalemn de seege day ndugla ywaalen wo go de rebge mono.

² Saara raw wo ɓoʼ jag le go ɓuy ma age leʼ Jerusalem, maga saara mo ɓlagn go.

³ Wur raw tos Baa wùr no, day wùr raw lag jar gor ngel de suŋ lay, de ceg lay doo ɓaara ma kaŋge ne hara nene.

⁴ Mo pa no Juda hay wo wãɗge gana : Egre wùr bay ma soɗ põõren wo wa, sir ma horgen raw debaŋ lay, wùr kãã ma boo korn gà so.

⁵ Jar hee wùrn hay wo wãɗge lay ga : A daʼ ge wo wer ne mopo gà has lay, ko ge wo mopo meʼ gà lay, hãã naa wo ge go yoo ɓaara rus tuu, naa id gi ra go day naa dig gi joŋre nà de faage ma se kay no.

Nehemi grag jar ɓen wo go see jar heen wo

⁶ Paga jar Jwif maga hay wo wo de tiŋ see ɓaara ni hay á wo go riŋ wùr ɓaale hwale, saara hay age le go ti ngel ɓuy see wùri.

⁷ Diŋ wersen ndi raw lag jarn go ti moobe taʼtaʼ ɓaale korn le nen faale, go ti ngel ma de ɗaŋraŋ wo, go de moslamre ɓaaran wo, de jawre ɓaaran wo de toŋwa ɓaaran wo doo.

⁸ Ndi raw ko nene, ndi raw urgi go ciŋ day ndi riŋ jar kluurin wo, jar car kiidan wo de te jar ma ɓuyn wo ga : Joŋ we hẽẽne ɓaara wa! Fer we ɗig ti ti Waŋkluu ma kluun ga joŋ hẽẽne ne jar mono! Dur we ti hẽẽre ɓay wo, ti weere ɓayn wo de mayre ɓayn wo, ti naare ɓayn wo de tiŋ ɓayn wo!

⁹ De maga jar hee wùrn wo wo laage ga à go de riŋ wùr mono, Baa raw ɓlag joŋre ɓaara maga saara hay ɗign go. Wùr raw ferge jag kor no, wosela ɓuy jag joŋre ɓe no.

¹⁰ Hãã le ti wur sen ni, nus weere jõõre ɓin joŋ wo joŋre, nus ma lan wo de hoo jawre wo, gidigli wo, toŋwa wo de kroŋ wo doo lay. Waŋren wo ɓuy hay wo le de kaŋge wer jar Juda wo.

¹¹ Jar maga hay wo boo korn wo de jar maga hay wo soɗge noga horge fẽẽre põõren hay wo joŋ joŋre de doo po boŋ lay, wo de ɗaw fen durgi ti doo ma lan lay.

¹² Wosela ɓuy yoo jar maga hay wo booge hay de saʼ moslam ɓen sag ɓe, day saara hay joŋ joŋren nà doosen nono. Je maga hay ʼwad cõõn hay de oole ɓiŋ ɓi.

¹³ Day ndi riŋ jar kluurin wo, jar car kiidan wo de te jar ma ɓuyn wo ga : Joŋren nà debaŋ lay, de mbeɗ jag lay, day naa wo go nà see kããra mbeɗa mbeɗa jag kor no, go see kããra hãã hãã lay.

¹⁴ Ti ngel maga nday laa roo cõõn wo ni mono, ni nday tay we le see ɓi, Baa naan dur gi yaŋ mbe wer naa.

¹⁵ Wùr see de joŋre de pel nà doo kay no so no, jar maapo plaŋ yoo wùr de hoo jaw doo de maga waa naa wer le go mo hãã, hãã wo go de law de maga gér ko wo go ciŋ mono.

¹⁶ De sen ni ndi raw riŋ jarn pa ga : Daga wosela ɓuy mo nà Jerusalem ɓiŋ wejõõ ɓe no. Naa gor we ngel de suŋ, day naa joŋ joŋre de cege.

¹⁷ Wùr hay bay go naa õõbe ma ti wùrn wo wa ɓuy, ko ndi, hẽẽre ɓin wo, jar peele ɓi ma jõõren wo, jar gor ngel maga hay wo seege wer ɓi wo draʼa, hay doo wosela ɓuy nà diŋ fẽẽre durgi ɓen wo de bii ma joge tawa tuu.