NEHEMI 3 - Tupuri Bible

Jar lag wo jag korn booge

¹ Eliyakib je mooben kal wo hooge go ciŋ de hẽẽre ɓe jar siɗ jagn wo, saara raw boo jag tiŋ Sããren wo. Saara ɓoʼ jag ɓe go, her wo jag tiŋn wo go ni. Á ʼwũyn wo le hãã ti tiŋ ma de gẽẽre mani Meya no, hãã wo wo go ti tiŋ ma de gẽẽre mani Hanane el no.

² Ɓiŋ ɓe mono, jar Jeriko hay wo booge, Sakur je ni Imrin hay booge ɓiŋ ɓe ni lay.

³ Jar Senaa raw wo boo jag tiŋ cẽẽn wo. Saara her koore go jag ɓe day her wo jag ɓen wo go ni de manyãã ɓen wo de boore ma coɓge ɓen wo.

⁴ Ɓiŋ ɓaara mono, Meremod je ni Uri, je ni Hakosn hay joŋ joŋre ma ʼwũy kor no. Ɓiŋ ɓaara pa, Mesulam je ni Berekiya je ni Mesesabeeln hay joŋ joŋre, Sadog je ni Baanan hay joŋ joŋre ɓiŋ ɓaara lay.

⁵ Jar Tekowa maga jar kluuri ɓaaran laa wo yãã jag waŋ ɓaaran joŋ peele ne hẽn gà joŋ wo joŋre ɓiŋ ɓaara.

⁶ Yoyada je ni Paseya wo de Mesulam je ni Besodiya raw wo ʼwũy jag faage ma ɓaaɓaa no. Saara her koore wo ni, her wo jag ɓen wo ni de manyãã ɓen wo de boore ma coɓge ɓen wo.

⁷ Ɓiŋ ɓaara mono, kal joŋ joŋre diŋ Melatiya je Gabawoŋ no, diŋ Yadon je Meronodn wo de werpiiri ma Gabawoŋ wo de ma Mispa maga á wo le ti ngel maga je wãã re prog ma ɓaŋ sen faale maarog ma de pããgen la de hayle ni mono.

⁸ Ɓiŋ ɓaara mono, joŋ joŋre diŋ Usiyel je ni Harhaya jobo yoo jar yor boo biŋnin wo, joŋ joŋre ɓiŋ ɓe diŋ Hananiya jobo yoo jar joŋ trusan wo. Saara ɓoʼ jag boo kor ma ti Jerusalem ma ti ngel sen go, hãã wo wo go ti kor ma de diy no.

⁹ Ɓiŋ ɓaara mono, joŋ joŋre diŋ Refaya je ni Hurn ga diŋ waŋ sir Jerusalem ma ɓaŋ po plaŋn mono.

¹⁰ Ɓiŋ ɓaara mono, Yedaya je ni Harumafn raw joŋ joŋre pel tiŋ mani ɓe no, ɓiŋ ɓe mono joŋ joŋre diŋ Hatus je ni Hasabniya no.

¹¹ Malkiya je ni Harimn wo de Hakub je ni Pahat-Mohabn raw wo ʼwũy ngel maapo ni cab ti kor ni wo de tiŋ ma de gẽẽre ma ti ngel jiɗ fẽẽren wo.

¹² Ɓiŋ ɓaara mono, joŋ joŋre diŋ Salum je ni Halohes waŋ ɓaŋ Jerusalem ma plaŋn wo de mayre ɓe wo.

¹³ Hanun wo de jar Sanowa raw wo ʼwũy jag faage ma ti Por no. Saara boon go, raw wo her jag ɓen wo ni de manyãã ɓen wo de boore ma coɓge ɓen wo. Saara joŋ joŋre wo ti korn ni nen meeder kiskis dwee pa, hãã wo wo go ti jag faage Rumgi no.

¹⁴ Malkiya je ni Rekab, waŋ sir ma ɓaŋ Bet-Hakeremn raw ʼwũy jag faage Rumgi no. Se boon go, raw her jag ɓen wo ni de manyãã ɓen wo de boo ma coɓge ɓen wo no.

¹⁵ Salum je ni Kol-Hose, waŋ sir ma ɓaŋ Mispan raw ʼwũy jag faage Gedel no. Se boon go, raw ʼwũy ti ɓen go, her jag ɓen wo ni de manyããn wo de boore ma coɓge ɓen wo no. Se ʼwũy kor ma ti man gloŋ ma Silowe ti jeŋ pay sugnee mani waŋ no, hãã wo go ti ngel maga à ɗii le go ɓi leege mani Dafid ni mono.

¹⁶ Le nen blam ɓe mono, Nehemi je ni Asbug waŋ sir ma ɓaŋ Bet-Sur maapo plaŋ raw joŋ joŋre ma ʼwũy korn hãã wo go pel tipaale mani Dafidn wo, hãã wo go ti gloŋ maga à hay teen teege mono, hãã wo go ti tiŋ mani blumrin wo no.

¹⁷ Le nen blam ɓe mono, joŋ joŋre diŋ jar Lefid wo, diŋ Rehum je ni Bani no. Ɓiŋ ɓe mono, joŋ joŋre ti ɗúu sir ɓe diŋ Hasabiya waŋ ɓaŋ sir Keyla ma ɓaŋ po plaŋ no.

¹⁸ Le nen blam ɓe mono, joŋ joŋre diŋ hẽẽre ɓaaran wo, diŋ Bafay je ni Henadad waŋ sir ma Keyla ma ɓaŋ po plaŋ ma la no.

¹⁹ Ɓiŋ ɓe mono, Eser je ni Josuwe waŋ Mispan raw ʼwũy ngel maapo ni cab pel ngel maga à ɗii wo ti ngel lagge soode wo ni ti ngel maga korn hee hlug go ni mono.

²⁰ Le nen blam ɓe mono, Barug, je ni Sabayn raw baa wùu ʼwũy ngel po ni cab pa, tĩĩ le ti ngel ma de hee hlugn hãã wo go ti jag faage mani Eliyakib je moobe no.

²¹ Le nen blam ɓe mono, Meremod je ni Uri, je ni Hakosn kal ʼwũy ngel maapo ni cabe, tĩĩ le ti jag faage mani Eliyakibn hãã wo go ti tawge ti tiŋ mani Eliyakib no.

²² Le nen blam ɓe mono, joŋ joŋre diŋ jar siɗ jag maga wo wo go de tiŋ ɓil fuln mono.

²³ Le nen blam ɓaara mono, Benjame, wo de Hakub joŋ wo joŋre pel tiŋ ɓaaran wo. Le nen blam ɓaara mono, Asariya je ni Maaseya je ni Ananiyan joŋ joŋre ɓiŋ tiŋ mani ɓe no.

²⁴ Le nen blam ɓe mono, Binuwiy je ni Henadadn raw ʼwũy ngel ma tigriŋ ni cab pa, tĩĩ le ti tiŋ mani Asariyan hãã wo go ti ngel maga korn hee hlug go ni hãã wo go ti ngel maga á hee cõõ go ni mono.

²⁵ Palal je ni Usay raw joŋ joŋre pel ngel ma de hee hlugn wo de tiŋ ma de gẽẽre de daŋ kããra maga hee cõõ le go ti tiŋ mani waŋn ti jeŋ feele tiŋ daŋgayn mono. Le nen blam ɓe mono, joŋ joŋre diŋ Pedaya je ni Pareos no.

²⁶ Jar Netiniyẽẽ maga wo de tiŋ ti Ofeln joŋ wo joŋre hãã wo go pel jag faage Biin wo go nen nen wur botoŋ lay, pel tiŋ ma de gẽẽre ma de hee cõõn lay.

²⁷ Le nen blam ɓaara mono, jar Tekowa ʼwũy wo ngel maapo ni cab pel tiŋ ma kluu ma de gẽẽre maga hee cõõ go mono, hãã wo go ti kor ma Ofel no.

²⁸ Le nen ciŋ ti jag faage Piirin wo mono, jar siɗ jagn joŋ wo joŋre, wosela ɓuy jag tiŋ ɓe.

²⁹ Le nen blam ɓaara mono, Sadog je ni Imern joŋ joŋre jag tiŋ ni ɓe. Le nen blam ɓe mono, Semaeya je ni Sekaniyan, je gor jag faage ma nen wur botoŋn raw joŋ joŋre.

³⁰ Le nen blam ɓaara mono, Hananiya je ni Selemiyan wo de Hanun wel ma de hiiraʼ mani Salafn ʼwũy wo ngel maapo ni cab ti korn ni. Le nen blam ɓaara mono, Mesulam je ni Berekiyan raw joŋ joŋre pel tiŋ naw ɓe no.

³¹ Le nen blam ɓe mono, Malkiya, jobo yoo jar yor boo biŋnin wo raw joŋ joŋre hãã wo go ti tiŋ mani jar Netiniyẽẽn wo de jar treren wo, pel jag faage Mifkad no hãã wo go ti tiŋ naw ma de gẽẽre ma ti ngel ma de hee hlug no.

³² Jar yor boo biŋni wo de jar trere joŋ wo joŋre ti holaŋ tiŋ naw ma de gẽẽre ma ti ngel ma de hee hlugn wo de jag faage Sããren wo.

Jar heen giŋ wo jar boogen wo

³³ De maga Saŋbalad wo laage ga wùr de boo korn mono, ɓil ɓe raw cege ɓe day se coo jag ɓe gà hase.

³⁴ Se raw fegge ti jar Jwif wo. Á raw wããge pel hẽẽre ɓen wo de soode ma Samarin wo ga : Jar Jwif ma se de hoo egren joŋ wo nà mayla? À men ge ra go ɓoʼ jag ɓe so? A siɗ gi wo baa jag yaŋ ni? A day ɓoʼ ge wo jag ɓe go so? Á fer ge bà wo go frug húulí maga hay wo go de yoŋre nen sir wo de sããge wo le go ciŋ so?

³⁵ Tobiya je Amoŋn hay ɓiŋ ɓe ni, day ga : A mo boo mbaara tawa ɗala! Hayga baygama po yoʼo we le no, á caa ge ywaale yaŋ mbe ti kor húulì ɓaara no.

³⁶ Coʼ sugi, o Baa wùr no, werga à go de ɓoʼ foo wùri! Fer kaŋ mbuɗgi fuy ɓaaran ne hara ti doga, day hã ra go maga à mo frum ra wo go, à mo raw wo go de ɓaara ti sir maga á caa wo nen yaŋ wo go ti daŋgay ni mono.

³⁷ Fug ɓil go ne hara ti debaycõõre ɓaara wa lay, day ɓlagge ɓaara mo yee nen go pel ɓo wa lay, werga á kiɗ wo jag jar maga wo de booge mono.

³⁸ Wùr hay boo kor no, gẽẽre korn ɓuy tuu hay go de woge ti nus ɓe.