NEHEMI 13 - Tupuri Bible

Nehemi ʼwũy faage jag Baa jar Jwifn wo

¹ Ti wur sen ni à kal kee kefder mani Moyisn ne jar no, day à raw daʼge ni ga je Amoŋn wo de je Mohabn bay wo nen laage yoo tayge jar mani Baan wo wa hase,

² wer maga á hay caa wo pel jar Israyel wo le de rege wo de bii gà day hã wo mopo go ne Balaam maga á mo faɗ ra go ama Baa raw kol faɗgen go diŋ bosaʼa.

³ De maga à laa jag liŋgin no kay à raw caa ɓil Israyel wo go de waaren wo.

⁴ Go taŋgu sen meʼ Eliyakib je mooben raw hayge go ɓil tiŋ ma ti jeŋ tiŋ Baa wùr no, se hay diŋ kaw Tobiya.

⁵ Wersen se raw ʼwũy tiŋ naw ma kluu ne hẽne, diŋ tiŋ maga à hay taŋgu lag fẽẽre maga à hã ra wo ni mono, trusa no, de tasan wo, de dim coore ble no, dim yii ma defayn wo de dim noon wo ni mono. Sen hay nà diŋ tiŋ maga à hay hã faage ɓe ne jar Lefid wo, jar ʼwad siŋn wo de jar gor jag tiŋn wo doo mono diŋ tiŋ ma lag fẽẽre maga à caa nen sen go ma jar siɗ jagn wo mono.

⁶ Ndi hay bay Jerusalem ni de maga fẽẽre sen joŋ wo mo wa, werga ndi hay fer wo go see waŋ Artagserses waŋ Babilon nen kiŋgi ma de doo swaʼ ti ɓog maga se hay joŋ waŋ mono. Go ti tawge kiŋgin mono, waŋ raw hã

⁷ faage le me maga ndi mo fer le Jerusalem. Nen ɓi raw baa ɓlagge maga Eliyakib hay joŋn ti maga se ʼwũy tiŋ naw go ne Tobiya ɓi feele tiŋ Baan mono.

⁸ Ɓil ɓi cee me debaŋ ti re seno. Ndi kal lag fẽẽre maga wo diŋ ma Tobiya mo ɓuy wo go siigi,

⁹ ndi day ga fãã tiŋ nawn wo go. Ndi raw kol fẽẽre ma tiŋ Baan wo go ni, de fẽẽre maga à hã ra, de trusa no.

¹⁰ Ndi raw laage pa ga à hã nen fen mani jar Lefidn wo ne hara gà day jar Lefidn wo de jar ʼwad siŋ ti ngel joŋren hay daŋ wo, wosela ɓuy ɓil pay ɓe.

¹¹ Ndi raw joŋ kwãy ne jar car kiidan wo, ndi day ga : Wer mayse ga à tob tiŋ mani Baan go la? Ndi kal tay jar Lefidn wo le de jar ʼwad siŋn wo, ndi raw fer rage jag joŋre ɓaara no.

¹² Mo so no, jar Juda wo ɓuy raw wo age de dim coore ble no, dim yii ma defay wo de noon ɓil tiŋ ma lag fẽẽren wo.

¹³ Ndi kal hã faage tiŋ fẽẽren wo ne Selemiya je siɗ jag no, ne Sadog je had wããre Baa no, ne Pedaya, jobo boŋ yoo jar Lefidn wo, Hanan je ni Sakur, je ni Mataniyan hay kay rage ni lay werga riŋ ɓaara hay go de leʼge ga á wo diŋ jar ma de deele wo. Á raw hã joŋre ɓesge fẽẽre ne hẽẽre ɓaaran wo ne hara doo.

¹⁴ Ɗig ti mbo ti ɓi, O Baa ɓi no, wer fen se kay no, day yõõ ti go ti joŋre maga ndi joŋ ra ti faage ɓe see tiŋ mani ɓin wo de faage wããre ɓo ma de ɓodgen wo mo wa.

¹⁵ De ngar ngel sen ni ndi raw ko jar po wo yoo jar Juda wo hãɗ yii ti ngel hãɗgen wur Saba, horge wo coore le ti gesaŋ le liŋ ti gerhẽẽre wo, horge wo yii, leʼge tlalum, leʼge hõõ wo de wer fen soɗge ma hon wo la ɓuy, a wo de ɓaara Jerusalem ti wur Saba. Ndi raw ruu rage go pel ti wur maga á hay wo go yeɗ fẽẽre rege ɓaaran wo go mono.

¹⁶ Jar Tir hay wo we de tiŋ ni lay, saara hay age de cẽẽ wo de wer fẽẽre trere ma hon wo la ɓuy day hay wo yeɗ rage go ne jar Juda wo de jar Jerusalem wo.

¹⁷ Ndi kal ruu jar kluuri ma Judan wo, ndi day riŋ ra ga : Wer joŋre se de ɓlagge ga nday de joŋge ɓe mo hãʼ nà ga hãy ga nday ɓoʼ foo wur Saban go la?

¹⁸ Pããre naa hay joŋ wo nà bay diŋ te mo se kayn wo wa yawla? Baa naan hay á de re ma de caa naa wo mo deŋ ɓuy ne naa ti lay, ne ɓi leegen la ti lay. Day nday fer ur wùu bagge põõ ɓen ne Israyel ti diŋ de ɓoʼge foo wur Saban go pa!

¹⁹ Blam ɓe de maga ngel baa swena go ti jag faage ma Jerusalem wo ti wur síilí ma taŋgu wur Saban mono, ndi kal ga : Mbar we jag faagen wo go day à mo bul ra go nà blam wur Saba no. Ndi raw lag jar po wo mbag yoo weere jõõre ɓin wo go jag faagen wo ma maŋ jag jar go ga á mo laa wo le de fẽẽre soɗge wo le ti wur Saban wa.

²⁰ Doo kay no so no, jar treren wo de jar yeɗ wer fẽẽre ma hon wo la ɓuy raw wo nage ɓaale boŋ ko ɓaale ɓog draʼ wo go nen faale kor ma Jerusalem no.

²¹ Ndi raw ruu rage wo gana : Wer mayse ga nday nà jag korn la la? Hayga nday dog we pa no, ndi baa ge doo ne nday see. Hãã de sen ni saara bay age ti wur Saba wa so hase.

²² Ndi raw riŋ jar Lefid wo ga á mo fãã wo see ɓaara go ma age gor jag tiŋn wo, maga á mo hay wo go bay ɗag ti wur Saba no. O Baa ɓi no, ɗig mbo ti ɓi wersen mokay pa no, ɗaw mbo ndi doo nen ɓil de el ɓo ma kluu no.

²³ De sen ni pa mono, nen ɓi raw baa jar Jwif maga hay da wo mayre Asdod wo, mayre Amoŋ wo de mayre Mohab wo mono.

²⁴ Nus weere ɓaaran hay wo wããge diŋ jag Asdode, hay bay wo de ko wãã jag Jude wa, saara hay de koge diŋ jag jar po wo la, noga jag jar maapo wo wo go.

²⁵ Ndi raw ruu rage, ndi kal faɗ rage go. Ndi mbar ma baapo wo, ndi ndar riŋ ti ɓaara go. Ndi raw joŋ ge ga á mo haʼ wo go de ɗúu Baa ga : Nday hã ge mayre ɓay wo ne weere ɓaara wo gà day nday da ge mayre ɓaara wo ne weere ɓay wo gà lay, ma ɓay gà lay.

²⁶ Salomoŋ waŋ Israyel hay joŋ ɓlagge nà bay ti te fen sen wa yawla? Waŋ po hay bay doo se yoo ngaɓa jar dehãyn wo wa, Baa ɓen hay dage ɓe day Baa hay hayn go waŋ ti Israyel wo ɓuy ama naare dehãyn kog wo ne go nen ɓlagge.

²⁷ Nday da nà ga à mo laa ti ɓay ga nday de ma joŋ ɓlagge ma kluu doosen no lay, ga nday bay de deele see Baa naan wa so ti maga nday de da naare dehãy wo lay so yawla?

²⁸ Je ni Yoyada je ni Eliyakib je mooben hay de hã may ɓe ne Saŋbalad je Horoŋ no, ndi kal niigi ɓe wo go see ɓi hãã.

²⁹ O Baa ɓi no, ɗig ti mbo ti ɓaara, werga á glub wo ngel siɗ jagn go, ɓlag wo tayge jag de jar siɗ jagn wo de jar Lefidn wo go mono.

³⁰ Ndi raw caa ɓil ɓaara go de waaren wo, day ndi fer joŋge ga jar siɗ jagn wo de jar Lefidn mo hoo wo sug ti fen maga á hay wo nen hoo sug ti mono, wosela ɓuy jag joŋre ɓe.

³¹ Ndi kal joŋge ga à mo lag ti joŋre saʼge hããre ma siɗ jag no, go de ngaɓge de wur ɓe taʼ taʼa, ga à mo lag ti hãge jag fẽẽren wo lay. O Baa ɓi no, ɗig ti mbo ti ɓi de ele!