NEHEMI 1 - Tupuri Bible

Nehemi tos ti jar Jwif wo

¹ Wããre Nehemi je ni Hakaliya no. Nen few Kislef nen kiŋgi ma de doo ɓog maga Artagserses ti waŋ mono, ndi hay Suse ɓi leege ma kluu no.

² Hanani, diŋ jobo yoo hẽẽre ɓin wo de jar po wo mbag raw wo a ge le ti sir Juda. Ndi raw wii jag ɓaara ti jar Jwif maga hay yãã wo le go jag daŋgay day gwaʼ wo mono, ti Jerusalem lay.

³ Saara kal ferge ne ndi ga : Jar maga yãã wo le go jag daŋgayn yaŋ mbaara wo ti prog ma Judan ni, á wo nen re ma kluu, sõõre go de wùu ti ne hara lay. Kor ma ti Jerusalem go de nduɗ ywaale, day jag tiŋn wo go de roɗge de wùu lay.

⁴ De maga ndi laa wããre sen wo mono, ndi raw hayge gesiŋ, ndi ra, day ndi raw joŋ naw pur nen lawge. Ndi raw hẽẽ bii, ndi raw tosge pel Baa ma ciŋ no.

⁵ Ndi day ga : O Manwuri, Baa ma ciŋ no, Baa ma kluu maga à nen hẽẽ moge mono, ndo maga ndo oo ti tayge jagge day ndo ko decoo jar maga da wo ndo day ɗaw wo jag liŋgi ɓon wo mono!

⁶ Daga ndo mo coʼ sugi, day nen ɓo mo bul wo go ma yiŋ jag ti tosge mani wejõõ ɓo no. Ndi tos patala pel ɓo de suŋ lay, de ceg lay ti jar Israyel weere jõõre ɓon wo, ndi de wii fuggi ɓil ti ɓlagge jar Israyeln wo, ti ɓlagge wùr maga wùr joŋ ra see ɓo mono, wùr de jar ni ɓi wùr hay joŋ ɓlagge.

⁷ Cwãy, wùr joŋ fen ma bay ngar go see ɓo, day wùr hoo sug ti jag liŋgi ɓon wo gà ti wããre ma de yergen wo de jag liŋgi ma ɓod faage wããre maga ndo hay hã ra ne Moyis wejõõ ɓon wo mo gà lay.

⁸ Fer ɗig ti ti wããre maga ndo hay yern go ne Moyis wejõõ ɓon mono, ndo hay wãã ne wùr ga : Hayga nday see we de deele gà no, ndi dus gi nday yaŋ wo go yoo wer jar wo ra.

⁹ Ama, hayga nday fer we le see ɓi, nday ɗaw jag liŋgi ɓin wo we, day nday joŋ joŋre we de ɓaara no, ko nday mo hay bà wo go de welge ti jag sir tawge yaw, ndi tay ge ti ɓay yaŋ le ni, day ndi fer yaŋ le de ɓay ti ngel maga ndi hay baan ma ra ɗúu ɓi ni mono.

¹⁰ Jar Israyel wo diŋ weere jõõre ɓo, á wo diŋ jar mani ɓo maga ndo hay yãã ra le go de egre ɓo ma debaŋ no, de doo ɓo ma de egren mono.

¹¹ O Waŋkluu, coʼ mbo sug laa tosge mani wejõõ ɓon wo de weere jõõre ɓo maga da wo hẽẽ ɗúu ɓon mono! Joŋ wara ga wejõõ ɓon mo sii ti, day joŋ mbo ga á mo coo jag bloo seno. Ndi hay diŋ je gus rege mani waŋ no.