NAHUM 3 - Tupuri Bible

Fen maga kaŋ wer Baa go ɓlag Ninif mono

¹ Faɗge go ti ɓi leege maga id jar go day kag cíi jar go lay mono! Ti ɓi leege maga go de baa ɓil de geteʼ wo de hun mono! Ɗiggi ɓe tum ti frumgi jar go!

² Roo mbreŋ wo de roo ɓaale pus durgi wo le mo deŋ samge no! Piirin per wo ciŋ! Pusn yor wo ciŋ!

³ Jar piirin sam wo pũũri we le yaw! Moslam car wùu jage! Manjaw sag pliɗ pliɗi! Coo jar maga daʼ wo wããge bay wa! Húulí cor ɗib ɗibi! Coo húulí bay wa! À far ne húulí ti giɓliŋ giɓliŋ!

Sõõre wùu ti Ninif go

⁴ Sen nà wer figliw ma de raw wùu mani wãy figliw Maga jãɗ jar le de woore ɓen wo de hila ɓen wo mono. Á hay yeɗ wer jar wo go de figliw ɓe ma de raw wùu no. Wer hila ɓen wo se yeɗ nen jar po wo go ti ɓĩĩni ɓaara taʼ ɓuy.

⁵ Ndi wo de woge mo ti, Manwur Pantway wãã doosen nono. Ndi hoo ge jag rob ɓon yaŋ go ciŋ mo were. Ndi kaŋ ge nen wer jar wo ɓuy yaŋ go ti glog koɗ ɓo no, Kaŋ ge nen waŋre yaŋ wo go ti ngel sõõre ɓo no.

⁶ Ndi laa ge jããre yaŋ go mo ti. Ndi gefaf ge ndo yaŋ go day ndi kol ge mo yaŋ go diŋ fen ko nene.

⁷ Doo kay nono, wosela maga nen ɓe ko ge ndo we mo ɓuy, Yãã ge yaŋ de ɗee doo ɓo de ngar jag gana : À frum Ninif we go. Wose lawn ge bà la? Ndi wo bà le kiɗ jar jãã nen ɓon wo le nà gen la?

Re ma caa Ninifn diŋ te maga caa Tebes mono

⁸ Ndo bà ɗawa de daŋ ɓi leege No-Amoŋ maga hay de laage ti holaŋ jag doo Niln wo, Day go de cir ti de bii wo cwẽẽ mo yawla? Laɓ ma ti ɓen hay diŋ maaroge, maarog hay de ɓoʼ kor ne hẽn ti.

⁹ Sir Etiyopi hay de egre debaŋ, Ejipte doosen no lay. Sir Pud wo de jar Libi hay wo diŋ progre ɓe wo.

¹⁰ Ama de sen ɓuy à hoo jar sir ɓen wo wo go ti sir po, À hoo ra wo go ti daŋgay. À ndreɗ weere ɓe ma ti pããn wo go ɓuy ti jeŋ faage wo ɓuy. À naa wãywáale go ti jar wãã re ɓen wo, À baŋ jar kluuri ɓen wo de receʼ wo.

¹¹ Ndo de see ɓo à dingil ge mo yaŋ go, Day ndo yoŋ ge yaŋ lay. Ndo de see ɓo ndo kiɗ gi ngel yãã waŋ yaŋ go doo hẽẽne je hee ɓon lay.

Ninif joŋ ge de egre gà

¹² Kor ɓo ma de egre kiŋkiŋn wo ɓuy wo doo koo hõõ maga wo de tĩĩ leʼge nono. De maga á gas ra we no, saara leɗ le go ne wosela maga de sãy re rage ti jage.

¹³ Koɗa jar ma ɓil ɓon wo doo naare wo nono. Jag faage ɓo ma kluurin wo go de buŋgi hwiŋ hwiŋ kaʼ kaʼ ne je hee no. Wùu go de roɗ manyãã ɓo ma jag ɓaaran wo no.

¹⁴ Ɗa bii go ciŋ jag ɓo ma gor ti wur maga à cir ge ti ɓo go mono! Fer ʼwũy kor ɓo ma de egre kiŋkiŋn wo! Kal nen pããge cãã pãy! Fer ʼwũy ngel jii brig ɓon go!

¹⁵ Wùu roɗ ge ndo yaŋ wo go ni, moslam kaf ge ndo go. Á lor ge mo yaŋ go doo gejer nono. Mbol we go ti kẽẽ doo gejer wo nono! Mbol we go ti kẽẽ doo magalga wo nono!

Wer jar po hala yee ge wo nen go

¹⁶ Ndo dus jar trere ɓon wo wo go ti ngel debaŋ, De daŋ gér ma ciŋ wo doo gejer maga blar graŋ ɓe wo go day ur mono.

¹⁷ Jar gor ngel ɓon wo doo magalga wo nono. Jar joŋre ɓon wo doo maapoɗ maga lag wo ti sugway wo de maga ngel de ceere nono. Day de maga wur naa le go mono, Saara pud go jobo kãã ma ko ngel maga á hay wo ni mo gà so.

Á diŋ re maga saŋgu ɓe bay wa

¹⁸ Waŋ Asiri, jar koɗ sir ɓon laa wo naa go, Jar ɓo ma de egre jag jawn laa wo doo ɓaara go gesiŋ. Jar sir ɓon wo go de welge ciŋ ti húulì wo. Je tay ti ɓaara le bay wa hase.

¹⁹ Saŋgu bay ma rug wããge ma de caa mogen wa. Wããge ɓon go diŋ ma ʼwar mo ge. Jar maga laa ge wo wããre ti ɓo mo ɓuy, Maʼ ge wo doo yaŋ jag de feg ti re maga caa ndo mono. Werga wose hay we so ga debaycõõre ɓon hay bay duɗgi ɓe ceɓ wa la?