NAHUM 2 - Tupuri Bible

¹ Ko we ɓaale je maga le de age sii wããre ma de cõõre Ga jam joŋ we so le de rage ciŋ ti húulì wo mo caw no. Nday jar Juda no, joŋ we mbay few ɓayn wo so, Bag we jag hãge jag ɓayn wo go so! Werga je ma debaycõõren hee ge ni ɓay gà so hase, À go de tawge ɓe.

² Ninife, je taw jarn le de urgi ma seege go mo ti! Oo go gor ti kor ma de egre kiŋkiŋ no! Kaŋ nen ɓo wo go ti faagen wo taʼ taʼa! Saʼ ɓil ɓo, bag jag see ɓo go!

³ Werga Manwur fer we le de togoɗge mani Jakob no, Diŋ togoɗge mani Israyel pay tlalum ɓe maga jar frum jarn hay frumn wo go, Day brag wo jag doo ɓen wo go mono.

À frum gi Ninif go

⁴ Kroŋ ma doo blumri durgin wo de sẽẽre, Jar ma de egre jag jawn wo de hee õõbe ma sẽẽre yiŋ yiŋ wo ti. Boore pus durgi ɓaaran bel wo wùu. Ti wur maga á sraɗ wo go ma durgi mono, manjawren sag wo pliɗ pliɗi.

⁵ Pus ɓaaran kaŋ wo le mbliʼ mbliʼ ti faagen wo, Cir wo ngeln wo go ɓuy. Á wo tiʼ doo dol maga wo de wùu jag nono. Á ɗee wo deparday doo sagge Baa nono.

⁶ Waŋ Ninif de kaŋ ti ti jar ɓe ma de egre jag jawn wo. Ama ɓaale ɓaara baŋ ge go, á far ge wo ciŋ ma seege gà. Jar heen hoo ge wo wo deparday ma woge ti jeŋ kor no, Kaŋ ge wo gidigli nen ɓaara de ɓe.

⁷ Jag faage maga nduɗ wo wo go jag maarog bul gi wo go, Tiŋ mani waŋn leʼ ge go.

⁸ Ndo leʼ jag we go so! Ma de hayle go dlahn gwaʼ we go glog koɗe. À raw we de ɓe. Mayre tigliiri ɓe maga hay wo joŋ peele ne hẽn car wo roo doo glur wo nono, Lag wo doo go jag jiili ɓaara.

⁹ Ninif hay ɓa doo man tuu bii wo nono. Ko jar ma ɓil ɓen wo go ti ɗeere mo tiʼ no! À wii ra wo gana : Lag we ɗa! Lag we ɗa! Ama jobo bay mbuɗ nen le wa hase.

¹⁰ Frum we solay so! Frum we boo biŋni! Horog wo de wer fẽẽre ma de ɗúu ma nges jarn wo mbaara ni deŋ, Á taw wo go gà hase!

¹¹ À ʼwar tiʼ i, ɓlag kaʼa, mbug kaʼa! Jiili jar daŋ wo ra go ɓuy, ɓaale jar bay wo deŋge wa so! Sag jar wo go de ce rage ɓuy! Nen jar go ti bii taʼtaʼ ɓuy lay!

Ninif kol go bay egre

¹² Mayse joŋ ngel iggi mingir sen wo la? Ngel rege weere mingir se maga bloo mingiri, Man mingir wo de wel mingir hay wo raŋge ni, Day jobo ma duɗ rage hay bay wa has mono, ngel sen gen yaw la?

¹³ Ndo bloo mingir maga bag nàyre le ne weere ɓon wo, Ndo hrag soole jar le ne maare mingir ɓon wo day ndo hay go bag tuu ɓon wo go de này, Bag ngel iggi ɓon wo go de har wo mono,

¹⁴ Ndi yaŋ wo yam ndo, Manwur Pantway wãã doosen nono! Cug ndar yaŋ go de pus durgi ɓon wo, Day moslam kafge nen weere mingir ɓon wo yaŋ go. Ndi hoo ge nàyre ɓo maga ndo hay bag ra wo yaŋ le go ɓil sir ɓon doo. Jobo laa ge gẽẽge jar soole ɓon wo gà so hase.