MISE 7 - Tupuri Bible

Mise de lawge

¹ Re de caa mege werga ndi doo je maga we blam kããra nono, Doo je maga kol hãã leʼge koore wo blam nono. Leʼge koore po wo see kããra tiyir taʼ ma rege bay wo wa so, Leʼge koo hõõ se ma defay maga ndi de sãy ɓaara ti bay wo wa so lay.

² Je maga hoo sug ti jag liŋgi caa wer go ti sirn la, Je ma de deele bay boŋ wa so hase. Á wo go ɓuy de laa gǔu ma kaa cíi jar go, Wosela ɓuy de ɓoʼ rew ne hẽn ɓe no.

³ Doo ɓaara go de hadge de joŋge ɓlagge : Waŋn go de gor fen maga se kaŋ ne jar ti mono, Je car kiidan carn ti fẽẽre, Je kluun go yeʼ de hãʼ jag ɓe tuu lay. Á wo ɓuy jag ɓaara go de tayge ma joŋ seno.

⁴ Je maga sen ɗawa yoo ɓaara doo kesme nono, Maga sen de deele ɗawan de daŋ laɓ hõõre ɓlagge. A mo nà diŋ wur maga jar gor ti ɓon hay wãã wo ti ɓe mo so no. Wur maga a nduu dur ndo a we go. Á wo go patala nen sõõre yaw.

⁵ Hã we ɓil ti bar ɓay po wa, Kaŋ we ɗiggi ti kan ɓay po wa lay. Ɗaw jag ɓo pel wãy ma wer ɓo no!

⁶ Werga wel ɓoʼ foo pããbe go, May ur durgi de man ɓe, Wãy weln ur durgi de kaa ɓe, je hee wosela ɓuy diŋ jar ma liŋ ni ɓe wo.

⁷ Ma ɓin ndi kaŋ ge nen ɓi ɗeger nà ne Manwur ti, Fen maga ndi gorn ɓin nà doo Baa ma pẽẽ mege no. Baa ɓin coʼ ge mbe sug ɓi yaŋ.

Fen gorge jar mani Baan wo

⁸ Feg ti ɓi wa, ndo je hee ɓi no! Ndi mo leʼ bà layblaʼ no, Ndi ur gi yaŋ mbi go ciŋ. Ndi mo hayba go de hayle nen suŋgu layblaʼ no, Manwur diŋ poɗag ɓi no.

⁹ Ndi soɗ ge mbi bagge põõ mani Manwurn yaŋ, Werga ndi hay joŋ ɓlagge nà diŋ see ɓe. Sen nà hãã wo go ti wur maga á maŋ re ɓin doo, Day ʼwũy re ɓin go me mono. Á wo ge yaŋ go de ɓi nen poɗage, Day nen ɓi ko ge joŋre ɓe ma keɗedn yaŋ.

¹⁰ Je hee ɓin kon ge yaŋ doo ɓe, Day sõõre joŋn ge yaŋ, Je se maga hay riŋ mege ga Manwuri, Baa ɓin bà genla mono. Ndi kaŋ ge nen ɓi yaŋ ne hẽn ti ɗeŋrese. Patala ɓaale jar wo go de dreɓge ɓe doo pããge ma ti faage yaw.

¹¹ Ti wur maga à fer ge boo kor ma ti ɓon wo mono, À yaʼ ge haagu ɓon wo yaŋ wo ciŋ pel ni.

¹² Ti wur sen mono, jar a ge wo yaŋ le see ɓo le ti sir Asiri, Le ɓi leege ma Ejipten wo, le ɓil sir Ejipte, Hãã leʼ go ti maarog ma de pããge no. A a ge wo le ti jag maarog ma la, ti jag maarog ma la Le ti húulì ma la, le ti húulì ma la.

¹³ À ɓlag ge sirn go wer jar ma ɓil ɓen wo, Wer leʼge joŋre ɓaaran wo.

¹⁴ Kaŋ jar ɓon wo wo go ti hõõ de ge này ɓon doo, Diŋ jar ma ɓi kaw ma ti tway ɓo maga wo wo go de see ɓaara Tawa yooway ti húulì Karmel mono. Daga á mo kol wo wo go koɗge ɓil sir Basan Wo de sir Galaad doo ma ti wurpon wo nono.

¹⁵ Ndi joŋ ge yaŋ ga á mo ko fẽẽre mbuɗgi wo Doo ma ti wur maga ndo hay kal le go Ejipte nono.

¹⁶ Wer jar kon ge wo yaŋ day ti ɓaara wuɗ gi yaŋ go Doo sõõre bà mbe de maga á wo de egre mo ɓuy no. Á kuɓ gi wo doo yaŋ go jag ɓaara day sug ɓaara ndiŋ gi wo yaŋ go.

¹⁷ Á seɗ ge wo ɓurgi yaŋ doo cwe nono, Doo fẽẽre ma ti tamsir maga kir wo ti ɓiiri ɓaara wo nono. Á lag ge wo yaŋ le go ti ngel yoŋre ɓaaran Wo de daɗge deŋ deŋ ma woge see Manwuri. A joŋ ge wo hẽẽne yaŋ day hẽẽne ɓo caa ge ra yaŋ go.

¹⁸ Wose diŋ Baa doo ndo no ga fug ɓil go ti debaycõõre, Day cegaɗ go ne hun ti sagsag Diŋ wer jar maga gwaʼ wo yoo jar ɓon wo mo la? Á bay baa põõ go ma tum wa werga koge decoo jar de cõõre jag ɓe.

¹⁹ Á koge mbe decoo wùr yaŋ pa, Á kaŋ ge ɓaale yaŋ go ti ɓlagge wùr wo. Ndo laa ge mbo ɓlagge ɓaaran ɓuy wo yaŋ Wo go nen tuu bii ma kuɗum wer maarog gesiŋ.

²⁰ Ndo joŋ ge sedewa yaŋ mbo tum ga ndo de ɗaw Jakob doo, Ndo ko ge mbo decoo Abraham yaŋ tum Doo maga ndo hay hãʼ le go ne pããre wùr wo ɓaa nono.